LIVE TV
ଦୟା ନଦୀ ଛଟା ଚିଙ୍ଗୁଡିକୁ ଗୋଟା ପୋହଳା । ବାଳକାଟି ମଟନ ସହ ପାରାଦୀପ ଇଲିସି । ଫାଇଲରେ ଦସ୍ତଖତ ହେଉ ଅବା ବିଲ୍ ପାସ୍, ସହକାରୀ ଯନ୍ତ୍ରୀ ମାଡାମଙ୍କର ଥିଲା ପୁଳା ପୁଳା ଡିମାଣ୍ଡ । ପ୍ରଥମେ ତୁଣ୍ଡକୁ ଟିକେ ଦେଶୀ ଆମିଷ ପରେ ପକେଟକୁ ପିସି । ନହେଲେ ଆଗକୁ ଯିବାକୁ ଦେଉନଥିଲେ ଫାଇଲ୍ । ଭିଜିଲାନ୍ସ ଜାଲରେ ପଡି ବନ୍ଧା ହୋଇଥିବା ଜଟଣୀ ବ୍ଲକ୍ ସହକାରୀ ଯନ୍ତ୍ରୀ ନିବେଦିତା ମହାନ୍ତିଙ୍କ ବିରୋଧରେ ଖୋଲିବାରେ ଲାଗିଛି ଅଭିଯୋଗର ଲମ୍ବା ଫର୍ଦ୍ଦ ।
Also Read
ବର୍ଷ ବର୍ଷ ଧରି ଚାଲିଥିଲା ପିସି କାରବାର । ଲାଂଚ ନେବାରେ କୁଆଡେ ଧୁରନ୍ଧର ଥିଲେ । ଆଉ ଶେଷରେ ଏ ଲାଞ୍ଚଖୋର ମନୋବୃତ୍ତି ଯୋଗୁଁ ପଡିଛନ୍ତି ଭିଜିଲାନ୍ସ ହାବୁଡରେ । ଜଣେ ଠିକାଦାରଙ୍କ ଠାରୁ ୫୦ ହଜାର ଟଙ୍କା ଲାଞ୍ଚ ନେବା ବେଳେ ଖଣ୍ଡଗିରିସ୍ଥିତ ଘରେ ଭୁବନେଶ୍ବର ଭିଜିଲାନ୍ସ ଟିମ୍ ତାଙ୍କୁ ରେଡ୍ ହ୍ୟାଣ୍ଡରେ ଧରିଛି ।
ଖାଲି ମଟନ, ମାଛ କି ଚିଙ୍ଗୁଡ଼ି ନୁହେଁ, ତଟକା ପନିପରିବା, ଛେନା ପୋଡ଼ ଏପରିକି ରାଜ୍ୟର ଯେଉଁଠି ଯାହା ପ୍ରସିଦ୍ଧ ଠିକାଦାରଙ୍କ ଠାରୁ ସେସବୁ ଝଡ଼ାଉଥିଲେ ଯନ୍ତ୍ରୀ ମାଡାମ୍ । କଥା କଥାରେ ପିସି ମାଗୁଥିଲେ । ଠିକାଦାରଙ୍କ ସହ ସହକାରୀ ଯନ୍ତ୍ରୀଙ୍କ ବାର୍ତ୍ତାଳାପର ଏକ ଅଡିଓ ବି ଏବେ ଭାଇରାଲ ହେଉଛି।
ସହକାରୀ ଯନ୍ତ୍ରୀଙ୍କର ଲାଞ୍ଚ କାରବାର ସାମ୍ନାକୁ ଆସିବା ପରେ ଏବେ ଖୋଳତାଡ଼ ଚାଲିଛି ତାଙ୍କର ସଂପତ୍ତିବାଡିର । ମାଡାମଙ୍କର ଉଭା କେତେ ପୋତା କେତେ ତା’ର ଖୋଳତାଡ଼ କରୁଛି ଭିଜିଲାନ୍ସ । ଭୁବନେଶ୍ବରର ନୟାପଲ୍ଲୀ ଓ ଖଣ୍ଡରିରି ସମେତ ଜଟଣୀ ଅଫିସରେ ଚଢାଉ ହୋଇଛି। ଭିଜିଲାନ୍ସ ଟିମ୍ ବିଭିନ୍ନ ଫାଇଲ ପତ୍ର ଯାଞ୍ଚ କରିବା ସହ ସମସ୍ତ କର୍ମଚାରୀଙ୍କୁ ପଚରା ଉଚରା କରିଛନ୍ତି । ତେବେ ଏ ସଂପର୍କରେ ଇଂଜିନିୟର ନିବେଦିତା ମହାନ୍ତିଙ୍କ ପ୍ରତିକ୍ରିୟା ମିଳିପାରି ନାହିଁ ।
ଲାଂଚ କାରବାର ହେଉ ଅବା ଆୟ ବହିର୍ଭୁତ ସମ୍ପତ୍ତି ଠୁଳ, ଭିଜିଲାନ୍ସ ଜାଲରେ ଗତ ସପ୍ତାହ ଭିତରେ ପଡିଲେଣି ଏକାଧିକ ବଡ଼ ମାଛ । ବଲାଙ୍ଗୀର ଲୋୟର ସୁକତେଲ ପ୍ରକଳ୍ପ ମୁଖ୍ୟ ଯନ୍ତ୍ରୀ ସୁନୀଲ କୁମାର ରାଉତ ହୁଅନ୍ତୁ ଅବା ଅବକାରୀ ବିଭାଗ ଯୁଗ୍ମ କମିଶନର ରାମଚନ୍ଦ୍ର ମିଶ୍ର, କାହାର ୩୪ ପ୍ଲଟ୍ ତ କିଏ ଅର୍ଜିଥିଲେ ରାଜଧାନୀରେ ବିରାଟ କୋଠା ସାଙ୍ଗକୁ ୫୨ଟି ପ୍ଲଟ୍ ଓ ଅମାପ ସମ୍ପତ୍ତି। ପୂର୍ବରୁ ବି ଅନେକ ଧରାପଡିଛନ୍ତି। ତେବେ ପ୍ରଶ୍ନ ଉଠୁଛି, ଭିଜିଲାନ୍ସ ଧରିବା ପରେ ବି କାହିଁକି ଖସିଯାଉଛନ୍ତି ଅଧା ବାବୁ ?
- Reported by:
- CHANDAN PAIKRAY , Niranjan Behera
