Man Killed Wife: ଭିଡିଓ କଲ୍‌ରେ ଝୁଲୁଥିଲା ଶବ, ୪ ବର୍ଷର ଝିଅ କହିଲା- 'ମାଆକୁ ଟାଙ୍ଗିଦେଲେ ବାପା...'

'ବାପା ମମିକୁ ରଶିରେ ଟାଙ୍ଗି ଦେଇଛନ୍ତି, ମମି ହଲଚଲ୍ ହେଉନି କି କିଛି କଥା କହୁନି...' ଏହା ଥିଲା ଏମିତି ଏକ ଭିଡିଓ କଲ୍ ଯାହାକୁ କେବେ କେହି କରିବାକୁ ଚାହିଁବେ ନା ଦେଖିବାକୁ ଚାହିଁବେ । ଏହି କଲ୍ କରିଥିଲା ଜଣେ ୪ ବର୍ଷର ନିଷ୍ପାପ ଶିଶୁକନ୍ୟା । ଯାହାର ବାପା ତା' ମାଆର ଶବକୁ ଆଖି ଆଗରେ ଝୁଲାଇ ଦେଇଥିଲା । ଏହି ହୃଦୟ ବିଦାରକ ଘଟଣାଟି ଉତ୍ତରପ୍ରଦେଶ ଗାଜିଆବାଦର । ପୁରା ଘଟଣା ଶୁଣିଲେ ଆପଣଙ୍କ ଆଖି ଓଦା ହୋଇଯିବ । 

ମୃତ ମହିଳା ହେଲେ ୩୫ ବର୍ଷୀୟ ରୁବି ରାଣୀ ।  ସେ ମୋରଦାବାଦର ଏକ ପ୍ରାଥମିକ ସ୍କୁଲରେ ଶିକ୍ଷୟିତ୍ରୀ ଭାବେ କାର୍ଯ୍ୟରତ ଥିଲେ । ୨୦୧୯ରେ ରୁବି ମୋଦିନଗର ନିବାସୀ ରୋହିତ କୁମାରଙ୍କୁ ବିବାହ କରିଥିଲେ । ରୋହିତ ପେଶାରେ ଜଣେ ସଫ୍ଟୱେୟାର ଇଞ୍ଜିନିୟର । ଦୁହେଁ ନିଜର ୪ ବର୍ଷର ଝିଅ ସହ ମୋରଦାବାଦର ବୁଦ୍ଧବିହାର ଅଞ୍ଚଳରେ ଭଡା ଘରେ ରହୁଥିଲେ ।

ଅଧିକ ପଢ଼ନ୍ତୁ : ଥାନାରେ ଥାର୍ଡ ଡିଗ୍ରୀ ! ପତିପତ୍ନୀଙ୍କ ଝଗଡ଼ାରେ ସ୍ବାମୀକୁ ପୋଲିସର ନିସ୍ତୁକ ମାଡ଼ଗଲେ ନେଇଗଲେ...

ବୁଧବାର ସନ୍ଧ୍ୟାରେ ୪ ବର୍ଷର ଶିଶୁକନ୍ୟା ନିଜ ଜେଜେମାଆକୁ (ରୁବିଙ୍କ ମାଆ) ଭିଡିଓ କଲ୍ କରିଥିଲା । ଆଉ ଭିଡିଓ କଲରେ ଯାହା ଦେଖାଇଥିଲା ତାକୁ ଦେଖି ସ୍ତବ୍ଧ ହୋଇଯାଇଥିଲେ ଜେଜେମାଆ । ମୋବାଇଲ ସ୍କ୍ରିନ ଆଗରେ ଝୁଲୁଥିଲା ଝିଅର ନିସ୍ତେଜ ଶରୀର । ଶିଶୁକନ୍ୟା କହିଥିଲା ଯେ, ବାପା ମମିକୁ ରଶିରେ ଏମିତି ଟାଙ୍ଗି ଦେଇଛନ୍ତି । ମମି କିଛି କଥା କହୁନାହାନ୍ତି କି ହଲଚଲ ହେଉନାହାନ୍ତି । ନାତୁଣୀ ମୁହଁରେ ଏକଥା ଶୁଣି ଜେଜେମାଆର ପାଦ ତଳୁ ମାଟି ଖସିଯାଇଥିଲା । ସେ ସଙ୍ଗେ ସଙ୍ଗେ ଏ ସମ୍ପର୍କରେ ପୋଲିସକୁ ଜଣାଇଥିଲେ ।

ସୂଚନା ଅନୁସାରେ, ରୋହିତଙ୍କ ଆର୍ଥିକ ସ୍ଥିତି ଭଲ ନଥିଲା । ସେ ରୁବିଙ୍କୁ ବାରମ୍ବାର ଟଙ୍କା ମାଗୁଥିଲେ ଏବଂ ଏହାକୁ ନେଇ ଦୁହିଁଙ୍କ ମଧ୍ୟରେ କଳହ ଲାଗି ରହୁଥିଲା । ଗତ ବୁଧବାର ଦିନ ରୋହିତ ରୁବିଙ୍କ ଆକାଉଣ୍ଟରୁ ୫୦ ହଜାର ଟଙ୍କା ୟୁପିଆଇ ଜରିଆରେ ନିଜ ଆକାଉଣ୍ଟକୁ ଟ୍ରାନ୍ସଫର କରିଥିଲା । ଏହି ସ୍ୱାମୀ-ସ୍ତ୍ରୀ ଗାଜିଆବାଦର ମୋଦିନଗରରେ ଏକ ଘର କିଣିଥିଲେ । ରୋହିତ କିଛି ଦିନ ହେବ ଘରର କିସ୍ତି ଦେବା ବନ୍ଦ କରିଦେଇଥିଲା ଏବଂ ରୁବି ଏକା କିସ୍ତି ପୈଠ କରୁଥିଲେ ।

ରୁବିଙ୍କ ପରିବାର ଲୋକେ ପୋଲିସ ଆଗରେ କହିଛନ୍ତି, ''ରୋହିତ ସେହି ଘରଟିକୁ ବିକିବାକୁ ଚାହୁଁଥିଲା । ହେଲେ ରୁବି ମନା କରିବାରୁ ସେ ତାକୁ ମାରପିଟ୍ କରୁଥିଲା ।'' ଏହାକୁ କେନ୍ଦ୍ରକରି ରୋହିତ ହିଁ ତାଙ୍କ ଝିଅକୁ ହତ୍ୟା କରିବା ପରେ ଟାଙ୍ଗି ଦେଇଛି ବୋଲି ସେମାନେ ଅଭିଯୋଗ କରିଛନ୍ତି । 

ଅନ୍ୟପଟେ ପୋଲିସ ଅଧିକାରୀଙ୍କ କହିବା ମୁତାବକ, ଘଟଣା ପୂର୍ବରୁ ରୁବି ରୋହିତକୁ କଲ୍ କରି ସେ ଆତ୍ମହତ୍ୟା କରିବେ ବୋଲି କହିଥିଲେ । ତେବେ ଏହା ହତ୍ୟା ନା ଆତ୍ମହତ୍ୟା ପୋଲିସ ସ୍ପଷ୍ଟ କରିନି । ଅଭିଯୁକ୍ତ ସ୍ୱାମୀକୁ ପୋଲିସ ଗିରଫ କରିବା ସହ ତା'ର ମୋବାଇଲ, ଲ୍ୟାପଟପ୍ ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ ପ୍ରମାଣ ଜବତ କରିଛି । ଘଟଣାରେ ଅଧିକ ଛାନଭିନ୍ ଜାରି ରହିଛି ।

ଅଧିକ ପଢ଼ନ୍ତୁ : ମହିଳା ଆଇଆଇସିଙ୍କ ଚିତ୍କାର; ନେଇଗଲେ ନେଇଗଲେ...