LIVE TV
ଚାରିଆଡ଼େ ଗଛଲତା, ଅପରିତ୍ୟକ୍ତ ଇଲାକା । ତାହାରି ଭିତରେ ଏଣେତେଣେ ଛିଟିକି ପଡ଼ିଛି ସିନ୍ଦୂର ସହ ନାଲି କନା । ବଡ଼ ମାଛକୁ ମାରି ଥୁଆଯାଇଛି । ଚିରା ଯାଇଛି ଜଣେ ବ୍ୟକ୍ତିଙ୍କ ଫଟୋ । ଏଇଠି ନିଶ୍ଚିତ କେହି ଅବିଦ୍ୟାର ଆଶ୍ରୟ ନେଇ କୌଣସି ଗୁଣି ଗାରେଡ଼ି କରିଛି । ପାରିପାର୍ଶ୍ୱିକ ସ୍ଥିତି ହିଁ ବୟାନ କରୁଛି, ଅନ୍ଧବିଶ୍ୱାସକୁ ଆଧାର କରି କିଏ ଜଣେ ମନ୍ଦ ବୁଦ୍ଧି ପାଞ୍ଚିଛି । ତାପୁଣି ସ୍ୱର୍ଗତ ପୂର୍ବତନ ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ପୁଅ ବିପ୍ଲବ ପାତ୍ରଙ୍କ ବିରୋଧରେ ।
କାରଣ ଚିରି ଫିଙ୍ଗାଯାଇଥିବା ଫଟୋଟି, ବିପ୍ଲବ ପାତ୍ରଙ୍କର, ଯାହା ସ୍ପଷ୍ଟ ବାରି ହେଉଛି । ଭଲ କରି ଆଉ ଥରେ ଦେଖନ୍ତୁ ଏହି ଫଟୋ ସବୁକୁ । ଦିଗପହଣ୍ଡିର ଅଁଳାଗୁଡ଼ା ରାସ୍ତା କଡ଼ରେ ଥିବା ଏକ ବରଗଛ ମୂଳରେ ଗଣି ଗଣି ୬/୭ ଖଣ୍ଡ କରି ଫିଙ୍ଗିଦିଆଯାଇଛି ବିପ୍ଲବଙ୍କ ଫଟୋକୁ । କେବଳ ବିପ୍ଲବଙ୍କ ଫଟୋ ନୁହେଁ, ତାଙ୍କ ସହଯୋଗୀ ସିମାଦ୍ରୀ ପାତ୍ର ଏବଂ ଜିଲ୍ଲା ପରିଷଦ ପ୍ରାର୍ଥୀ ନିରଞ୍ଜନ ରେଡ୍ଡୀଙ୍କ ଫଟୋକୁ ବି ଚିରି ଫୋପାଡ଼ି ଦିଆଯାଇଛି ଏଭଳି ଭାବେ । ହେଲେ କିଏ ଏଭଳି କରିଛନ୍ତି, ତାହା ତ ଅସ୍ପଷ୍ଟ । କିନ୍ତୁ ଗୁଣିବିଦ୍ୟା ପଛର କ’ଣ ହୋଇଥାଇପାରେ ସମ୍ଭାବ୍ୟ କାରଣ ? ସେ ସମ୍ପର୍କରେ ଶୁଣନ୍ତୁ ତନ୍ତ୍ରବିଦ୍ୟାକୁ ବିଶ୍ବାସ କରୁଥିବା ଜଣେ ସାଧକଙ୍କ ବ୍ୟକ୍ତିଗତ ମତ ।
Also Read
ଗଞ୍ଜାମରେ ଗୁଣିଗାରେଡି, ଖଟବିଦ୍ୟା କିମ୍ବା ତନ୍ତ୍ରବିଦ୍ୟା ନୂଆ କଥା ନୁହେଁ । ଏହାକୁ ଅନ୍ଧବିଶ୍ୱାସ କିମ୍ବା କୁସଂସ୍କାର କହି ସଚେତନ କରାଯାଉଥିଲେ ବି ବସାବାନ୍ଧି ରହିଛି ଲୋକଙ୍କ ମନରେ । ବର୍ତ୍ତମାନ ମା’ଙ୍କ ନବଦିନାତ୍ମକ ପୂଜା ପାଠ ଜାରି ରହିଛି । ଗତ ଦୁଇଦିନ ତଳେ ଅମାବାସ୍ୟା ବି ଯାଇଛି । ତେଣୁ ଏହା ହିଁ ଉଚିତ ସମୟ ଭାବି ହୁଏତ କିଏ ଗୁଣିବିଦ୍ୟାର ଆଶ୍ରୟ ନେଇଥାଇପାରେ । ତେବେ ଏମିତି କି ଆବଶ୍ୟକ ପଡ଼ିଲା ଯେ, ସୂର୍ଯ୍ୟ ପାତ୍ରଙ୍କ ପୁଅ ବିପ୍ଲବ ଓ ୨ ସହଯୋଗୀଙ୍କ ଫଟୋ ଗୁଡ଼ିକୁ ଚିରି ଏଭଳି ପୂଜାପାଠ ସହ ମାଛବଳି ଦିଆଯାଇଛି ?
ଦିଗପହଣ୍ଡି ବିଜେଡିରେ ଲାଗିରହିଥିବା ରାଜନୈତିକ ବିବାଦର ପୃଷ୍ଠଭୂମି ଉପରେ କାହା ପ୍ରରୋଚନାରେ ପ୍ରୟୋଗ କରାଯାଇଛି ଗୁଣିବିଦ୍ୟା ? ଗତ କିଛିଦିନ ହେବ ରାଜନୈତିକ ଛକାପଞ୍ଝା ଭିତରେ ଦିଗପହଣ୍ଡି ବ୍ଲକ ଅଧ୍ୟକ୍ଷା ଉପନିର୍ବାଚନରେ ବାଜି ମାରିଛନ୍ତି ବିପ୍ଲବ ବିରୋଧୀ ବିପିନ ପ୍ରଧାନଙ୍କ ଗୋଷ୍ଠୀ । ଲାଗିରହିଥିବା ଗୋଷ୍ଠୀ ବିବାଦ ଯୋଗୁଁ ଉପ ନିର୍ବାଚନ ପୂର୍ବରୁ ବିପିନଙ୍କୁ ବିଜେଡିରୁ ବହିଷ୍କାର ବି କରାଯାଇଛି । ଆଉ ଏବେ ଏଭଳି ବିବାଦୀୟ ସ୍ଥିତିରେ ସାମ୍ନାକୁ ଆସିଥିବା ଗୁଣିବିଦ୍ୟାକୁ ନେଇ ପରସ୍ପରକୁ କାଦୁଅ ଫୋପାଡ଼ିଛନ୍ତି ।
ଘଟଣା ପଛର ରହସ୍ୟ ଯାହା ବି ଥାଉନା କାହିଁକି, କ୍ଷମତା ଓ ପତିଆରା ପାଇଁ ଦିଗପହଣ୍ଡି ବିଜେଡିରେ ଲାଗିରହିଥିବା ରାଜନୈତିକ ବିବାଦର ପୃଷ୍ଠଭୂମି ଉପରେ ଏଭଳି ଗୁଣିବିଦ୍ୟା ତଥା କୁସଂସ୍କାରକୁ ନେଇ ଏବେ ଗଞ୍ଜାମ ଜିଲ୍ଲାରେ ଲାଗିରହିଛି ନାନା ଚର୍ଚ୍ଚା ।
- Reported by:
- Jagannath Sahu
