୭ ମାସ ଭିତରେ ୪ ଥର ଭ୍ୟାକ୍ସିନେଟେଡ୍, ହେଲେ ବି ପଜିଟିଭ୍

ଚାରି ଚାରି ଥର ଭ୍ୟାକ୍ସିନେଟେଡ୍ ହେବା ପରେ ବି କରୋନା ପଜିଟିଭ୍ ଚିହ୍ନଟ ହେଲେ ଜଣେ ମହିଳା । ଏଭଳି କିଛି ଦୃଶ୍ୟ ମଧ୍ୟପ୍ରଦେଶର ଇନ୍ଦୋର ଏୟାରପୋର୍ଟରେ ଦେଖିବାକୁ ମିଳିଛି । କୋଭିଡ ପଜିଟିଭ୍ ବାହାରିବାରୁ ତାଙ୍କର ଦୁବାଇ ଯାତ୍ରାକୁ ବାରଣ କରାଯାଇଥିବା କଥା ଏୟାରପୋର୍ଟ ଅଧିକାରୀ କହିଛନ୍ତି । ମହିଳା ଜଣକ ଚାରି ଥର ଭ୍ୟାକ୍ସିନ ନେବା କଥା କହୁଥିବାର ଶୁଣିବାକୁ ମିଳୁଛି ।

ଜଣେ ୩୦ ବର୍ଷିୟ ମହିଳା ଯିଏକି ଚାରିଥର ବିଭିନ୍ନ ଦେଶରୁ ଭ୍ୟାକ୍ସିନେଟେଡ ହେବା ପରେ ମଧ୍ୟ କୋଭିଡ ପଜିଟିଭ୍ ଚିହ୍ନଟ ହୋଇଛନ୍ତି । ତାଙ୍କୁ ଏୟାରପୋର୍ଟରୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି । ଇନ୍ଦୋରର ମୁଖ୍ୟ ସ୍ୱାସ୍ଥ୍ୟ ଅଧିକାରୀ(CHMO)ଙ୍କ କହିବାନୁଯାୟୀ ମହିଳା ଜଣକ ଗୋଟିଏ ଦିନ ପୂର୍ବରୁ କୋଭିଡ୍ ନେଗେଟିଭ ଚିହ୍ନଟ ହୋଇଥିଲେ ।

ମହିଳା ଜଣକ ୧୨ଦିନ ପୂର୍ବରୁ ଇନ୍ଦୋରରେ ପହଞ୍ଚିଥିଲେ ଏବଂ ଦୁବାଇକୁ ଫେରୁଥିବାବେଳେ ବିମାନବନ୍ଦରରେ ତାଙ୍କୁ କୋଭିଡ୍-୧୯ ସଂକ୍ରମିତ ହୋଇଥିବା କଥା ଜଣାପଡିଥିଲା । ମହିଳାଙ୍କୁ ନିୟମ ଅନୁଯାୟୀ RTPCR ଟେଷ୍ଟ କରାଯାଇଥିଲା । ସେ କୋଭିଡ ପଜିତିଭ ବାହାରିବାରୁ ତାଙ୍କୁ ବିମାନରେ ଯିବା ପରିବର୍ତ୍ତେ ଚିକିତ୍ସା ପାଇଁ ହସ୍ପିଟାଲ ପଠାଯାଇଥିଲା । ସେଠାରେ ତାଙ୍କ ପାଖରୁ ଜଣା ପଡିଥିଲା ଯେ ସେ ଜାନୁଆରୀ ରୁ ଅଗଷ୍ଟ ମଧ୍ୟରେ ୪ ଥର ଭ୍ୟାକ୍ସିନ୍ ନେଇସାରିଛନ୍ତି ।