ଦେଶରେ ଦ୍ରୁତ ଗତିରେ ବଢ଼ୁଛି ସଂକ୍ରମଣ, ହେଲେ ଓଡ଼ିଶାରେ ସ୍ଥିତି ନିୟନ୍ତ୍ରଣ

ଡରାଇଲାଣି କୋଭିଡ୍‌ର ଚତୁର୍ଥ ଲହର । ସଜାଗ ହେଲେଣି ସରକାର । ରାଜଧାନୀ ଦିଲ୍ଲୀ ସମେତ ଦେଶର ବିଭିନ୍ନ ଭାଗରେ କରୋନା ସଂକ୍ରମଣ ପୁଣି ବଢ଼ିବା ପରେ ଏବେ ଓଡ଼ିଶାରେ ଛନକା । କେବଳ ଦିଲ୍ଲୀ ତଥ୍ୟ ହିସାବକୁ ନେଲେ ଗଲା ଏପ୍ରିଲ ୮ରେ ମାତ୍ର ୧୪୬ ନୂଆ ସଂକ୍ରମିତ ଚିହ୍ନଟ ହୋଇଥିଲେ ହେଲେ ତାର ସପ୍ତାହକ ପରେ ଅର୍ଥାତ୍ ୧୫ ଏପ୍ରିଲ୍‌ରେ ସଂଖ୍ୟା ଡବଲ ପାର୍ କରି ୩୬୬ ଛୁଇଁଥିଲା । କିନ୍ତୁ ଏହାର ଦିନକ ପରେ ଅର୍ଥାତ୍ ୧୭ରେ ସଂଖ୍ୟା ୫ଶହ ଡେଇଁ ୫୧୭ ଛୁଇଁଥିବାବେଳେ ୧୮ରେ ସଂଖ୍ୟା ସାମାନ୍ୟ କମି ୫୦୧ ହୋଇଛି।

ସେମିତି ଗତକାଲିର ସଂଖ୍ୟା ୨ହଜାର ୧୮୩ ତୁଳନାରେ ମଧ୍ୟ ଦେଶରେ ଆଜି ଦୈନିକ ସଂକ୍ରମଣ ହ୍ରାସ ପାଇଛି । ୨୪ ଘଣ୍ଟାରେ ୧୨୪୭ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଯାହାକି ଗତକାଲି ତୁଳନାରେ ୪୩ ପ୍ରତିଶତ କମ୍ ବୋଲି ସ୍ୱାସ୍ଥ୍ୟ ମନ୍ତ୍ରାଳୟ ସୂଚନା ଦେଇଛି । ତେବେ ଚିନ୍ତା ଏଥିପାଇଁ ବଢ଼ିଛି, ଗଲା ରବିବାର ଦେଶରେ ୧୧୫୦ ନୂଆ ଆକ୍ରାନ୍ତ ଚିହ୍ନଟ ହୋଇଥିଲାବେଳେ ସୋମବାର ହଠାତ୍ ସଂଖ୍ୟାରେ ୯୦ ପ୍ରତିଶତ ବୃଦ୍ଧି ପାଥିଲା । ସେପଟେ ସଂକ୍ରମଣର ଏଭଳି ଉଠାପକା ଗ୍ରାଫ୍ ସମୟରେ ସବୁ ରାଜ୍ୟମାନଙ୍କୁ ନିଜ ନିଜର ଦୈନିକ ସଂକ୍ରମଣ ରିପୋର୍ଟ ଦାଖଲ ଲାଗି ଚିଠି ଲେଖି ଜଣାଇଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ।

ଦେଶରେ କରୋନା ଗ୍ରାଫ୍ର ଟେନସନ୍ ଭିତରେ ରାଜ୍ୟରେ କିନ୍ତୁ ସଂକ୍ରମଣ ନିୟନ୍ତ୍ରଣରେ ଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ । ତାସହ ମାସ୍କ ପିନ୍ଧିବାକୁ ସମସ୍ତଙ୍କୁ ଅପିଲ୍ କରିଛନ୍ତି । ଯେହେତୁ ଡବ୍ଲୁଏଚ୍‌ଓ କହିଛି ଯେ, ଏବେ କରୋନାର ସିଭିଅରିଟି ନାହିଁ ଓ ଏହାକୁ ଚତୁର୍ଥ ଲହର କହିହେବ ନାହିଁ । ତଥାପି ସ୍ୱାସ୍ଥ୍ୟ ବିଭାଗ ସ୍ଥିତି ଉପରେ ସମ୍ପୂର୍ଣ୍ଣ ନଜର ରଖିଥିବା କହିଛନ୍ତି ରାଜ୍ୟ ସ୍ୱାସ୍ଥ୍ୟ ନିର୍ଦ୍ଦେଶକ । ଓଡ଼ିଶାରେ ଏବେ ଦୈନିକ ସଂକ୍ରମଣ ସଂଖ୍ୟା ୨୦ ଭିତରେ ରହିଛି ।

ଚୀନ୍ ଓ କେତେକ ୟୁରୋପୀୟ ରାଷ୍ଟ୍ରରେ କରୋନାର ପୁଣି ହୁ ହୁ ସଂକ୍ରମଣ ସହ ଦେଶରେ ଦୈନିକ ନୂଆ ପଜିଟିଭ ସଂଖ୍ୟାର ତଳଉପର ଗ୍ରାଫ୍ ପରେ ଏବେ ଉଙ୍କି ମାରିଛି କୋଭିଡ୍‌ର ଫୋର୍ଥ ୱେଭ୍ ଶଙ୍କା । ତେବେ କରୋନା ଲଢ଼େଇରେ ବଡ଼ ଅସ୍ତ୍ର ସାଜିଥିବା ଡବଲ୍ ଡୋଜ୍ ଟିକାକରଣର ସଫଳତା ସତ୍ତ୍ୱେ ବୁଷ୍ଟର ଡୋଜ୍ ଟିକାକରଣକୁ ନେଇ କିନ୍ତୁ ଚିନ୍ତା ବଢ଼ିଛି ।

ଓଡ଼ିଶା ତଥ୍ୟ ହିସାବକୁ ନେଲେ ପ୍ରଥମ ଓ ଦ୍ୱିତୀୟ ଡୋଜ୍ ମିଶାଇ ମୋଟ୍ ୬କୋଟି ୪୮ ଲକ୍ଷ ୭୫ ହଜାରରୁ ଅଧିକ ଟିକାକକରଣ ହୋଇଥିବାବେଳେ ବୁଷ୍ଟର ଡୋଜ୍ ନେଇଛନ୍ତି ମାତ୍ର ୧୦ଲକ୍ଷ ୧୯ ହଜାର ୮୮୧ ଜଣ । ଯାହାକି ମୋଟ୍ ଟିକାକରଣର ମାତ୍ର ୧୭ ପ୍ରତିଶତ । ଯଦିଓ ସ୍ୱାସ୍ଥ୍ୟକର୍ମୀ, ସମ୍ମୁଖ ଯୋଦ୍ଧା, ୧୨ରୁ ୧୬ ବର୍ଷର ପିଲା ଓ ୬୦ବର୍ଷରୁ ଉର୍ଦ୍ଧ୍ୱ ଲୋକଙ୍କୁ ମାଗଣାରେ ପ୍ରିକସନ ଡୋଜ୍ ଦିଆଯାଉଛି । କିନ୍ତୁ ୧୮ବର୍ଷରୁ ୫୯ ବର୍ଷ ମଧ୍ୟରେ ଲୋକଙ୍କୁ ଟିକା ପ୍ରାଇଭେଟ୍‌ରେ ନେବାକୁ ପଡୁଛି । ଏଥିପାଇଁ ପାଖାପାଖି ୪ଶହ ଟଙ୍କା ପଡୁଛି । ତେବେ କରୋନା କୋପ କମିଯିବାରୁ ବୁଷ୍ଟର ଡୋଜ୍ ପ୍ରତି ଅନାଗ୍ରହ ଏହି ଟିକାକରଣ ବାଟରେ ବଡ଼ ପ୍ରତିବନ୍ଧକ ସାଜିଛି ବୋଲି କହିଛନ୍ତି ପରିବାର କଲ୍ୟାଣ ନିର୍ଦ୍ଦେଶକ ।