LIVE TV
ନୂଆଦିଲ୍ଲୀ: କରୋନା ପାଇଁ ସଜାଗ ଦିଲ୍ଲୀ ସରକାର । ଦେଶରେ ହୁ ହୁ ହୋଇ କରୋନା ସଂକ୍ରମଣ ବଢ଼ୁଥିବା ବେଳେ ରାଜଧାନୀରେ ଲକଡାଉନ୍ ହେବନି ବୋଲି କହିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ମାସ୍କ ପିନ୍ଧିଲେ ତାଲାବନ୍ଦ କରିବାର ଆବଶ୍ୟକତା ପଡ଼ିବନି । ବର୍ତ୍ତମାନ ଲକଡାଉନ୍ ଲଗାଇବା ପାଇଁ କୌଣସି ନିଷ୍ପତ୍ତି ହୋଇନି । ଦିଲ୍ଲୀ କରୋନା ସ୍ଥିତି ସଙ୍ଗୀନ ଥିବାବେଳେ ଚିନ୍ତା ନକରିବା ପାଇଁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ ।
କେନ୍ଦ୍ର ସରକାରଙ୍କ ସହ ଲଗାତାର ସଂକ୍ରମଣ ସମ୍ପର୍କରେ ଆଲୋଚନା କରାଯାଉଛି । କେନ୍ଦ୍ରର ମଧ୍ୟ ସମ୍ପୂର୍ଣ୍ଣ ସହଯୋଗ କରୁଥିବା କହିଛନ୍ତି ଅରବିନ୍ଦ କେଜ୍ରିୱାଲ । ଏହାପୂର୍ବରୁ ଦିଲ୍ଲୀର ଲୋକମାନେ ସାହସର ସହ କରୋନାର ଦ୍ୱିତୀୟ ଲହରର ମୁକାବିଲା କରି ତାକୁ ହରାଇଥିଲେ । ତୃତୀୟ ଲହରକୁ ମଧ୍ୟ ଦିଲ୍ଲୀବାସୀ ମାତ୍ ଦେବେ । ଅନ୍ୟପଟେ ଟିକା ନେଇନଥିବା ଲୋକେ ଟିକା ନିଅନ୍ତୁ ବୋଲି ପରାମର୍ଶ ଦେଇଛନ୍ତି । ଟିକାକରଣର ଅର୍ଥ ନୁହେଁ ସଂକ୍ରମିଣ ଶିକାର ହେବ ନାହିଁ । ଟିକାକରଣ ଦ୍ୱାରା ଜୀବନ ପ୍ରତି ଥିବା ବିପଦ ହ୍ରାସ ପାଇଥାଏ ବୋଲି ସେ କହିଛନ୍ତି।
ନିକଟରେ କରୋନାରେ ସଂକ୍ରମିତ ହୋଇଥିଲେ ଅରବିନ୍ଦ କେଜ୍ରିୱାଲ୍ । ପ୍ରାୟ ୭ରୁ ୮ ଦିନ ସେ ହୋମ୍ ଆଇସୋଲେସନ୍ରେ ଥିଲେ । ସଂକ୍ରମିତ ହେବା ପରେ ତାଙ୍କୁ୨ ଦିନ ଜ୍ୱର ହୋଇଥିଲା । ଏହାପରେ ଠିକ୍ ହୋଇଯାଇଥିବା କଥା ସେ କହିଛନ୍ତି । କରୋନା ନିୟମାନୁସାରେ ୭ରୁ ୮ ଦିନ ଯାଏଁ ସେ ହୋମ୍ ଆଇସୋଲେସନରେ ରହିଥିଲେ, କିନ୍ତୁ ଫୋନ୍ ମାଧ୍ୟମରେ ଦିଲ୍ଲୀର ସ୍ଥିତି ସମ୍ପର୍କରେ ପଚାରି ବୁଝିବା ସହ କରୋନା ଉପରେ ଦୃଷ୍ଟି ରଖୁଥିବା କଥା କହିଛନ୍ତି ।’
ରାଜଧାନୀରେ ଦ୍ରୁତ ଗତିରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି । ହେଲେ ଏପରି ସମୟରେ ଭୟଭୀତ ହେବା ଆବଶ୍ୟକ ନୁହେଁ । ଦ୍ୱିତୀୟ ଲହର ଆସିଥିବା ସମୟରେ ପ୍ରତିଦିନ ଏତିକି ହିଁ ସଂକ୍ରମିତ ହେଉଥିଲେ ବୋଲି କହିଛନ୍ତି ଲୋକଙ୍କୁ ଅଶ୍ୱାସନା ଦେଇଛନ୍ତି କେଜ୍ରିୱାଲ।
