Vegetable Vendor: ପରିବା ବ୍ୟବସାୟୀଙ୍କୁ ଆସିଲା ୨୯ ଲକ୍ଷର ଜିଏସ୍‌ଟି ନୋଟିସ୍‌, ବନ୍ଦ କଲେ UPI କାରବାର

ପରିବା ବ୍ୟବସାୟୀଙ୍କୁ ଜିଏସ୍‌ଟି ଛାଟ । ୪ ବର୍ଷର ବେପାର, ଦେଢ କୋଟିର କାରବାର, ଆସିଲା ୨୯ ଲକ୍ଷ ଟଙ୍କାର ଜିଏସ୍‌ଟି ନୋଟିସ୍‌ । କର୍ଣ୍ଣାଟକର ଜଣେ ପରିବା ଦୋକାନୀଙ୍କୁ ଜିଏସ୍‌ଟି ବିଭାଗର ନୋଟିସ୍‌କୁ ନେଇ ଏବେ ଚାରିଆଡେ ଚର୍ଚ୍ଚା ।

ଦର୍ଶକବନ୍ଧୁ, ଆପଣ ଡିଜିଟାଲ୍ ପେମେଣ୍ଟରେ କାରବାର କରୁଛନ୍ତି କି ? ତେବେ ହୋଇଯାଆନ୍ତୁ ସାବଧାନ, କାରଣ ଆପଣଙ୍କୁ ବି ଆସିପାରେ ଜିଏସଟି ବିଭାଗର ନୋଟିସ୍‌ । ଶହେ… ଦୁଇ ଶହ କି ପାଞ୍ଚ ଦଶ ହଜାର ନୁହେଁ ବରଂ ଲକ୍ଷାଧିକ ଟଙ୍କାର ଜିଏସ୍‌ଜି ନୋଟିସ୍‌ । ଆମେ ଏ କଥା ଏଥିପାଇଁ କହୁଛୁ, କାରଣ ନିକଟରେ କର୍ଣ୍ଣାଟକରେ ସାମ୍ନାକୁ ଆସିଛି ଠିକ୍‌ ଏଭଳି ଏକ ଖବର । ଜଣେ ପରିବା ବ୍ୟବସାସୀଙ୍କୁ ଆସିଛି ୨୯ ଲକ୍ଷ ଟଙ୍କାର ଜିଏସ୍‌ଟି ନୋଟିସ୍‌ । ଏହାକୁ ପାଇବା ପରେ ବ୍ୟବସାୟୀ ଜଣଙ୍କ ଚକିତ ହୋଇଯାଇଛନ୍ତି । କର୍ଣ୍ଣାଟକର ହାଭେରୀ ଜିଲ୍ଲାର ଜଣେ ଛୋଟ ପରିବା ବିକ୍ରେତାଙ୍କୁ ଜିଏସ୍‌ଟି ବିଭାଗ ପକ୍ଷରୁ ଏତେ ଟଙ୍କାର ନୋଟିସ୍ ମିଳିବା ପରେ ସମ୍ପୃକ୍ତ ଅଞ୍ଚଳରେ ଏହା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।

କର୍ଣ୍ଣାଟକ ହାଭେରୀ ଜିଲ୍ଲାରେ ନିଜର ଏକ ଛୋଟ ପରିବା ଦୋକାନ ଚଲାଉଛନ୍ତି ଶଙ୍କରଗୌଡ଼ା ହାଦିମଣି । ତେବେ ଗତ ଚାରି ବର୍ଷ ମଧ୍ୟରେ ନିଜ ଦୋକାନରେ ମୋଟ ୧.୬୩ କୋଟି ଟଙ୍କାର ଡିଜିଟାଲ୍ କାରବାର କରିଛନ୍ତି ସେ । ଯେଉଁଥିରେ ଅଧିକାଂଶ ପେମେଣ୍ଟ UPI ଓ ଡିଜିଟାଲ୍ ୱାଲେଟ୍ ମାଧ୍ୟମରେ କରାଯାଇଛି । ଏଥିପାଇଁ ଜିଏସଟି ଅଧିକାରୀ ତାଙ୍କର ଡିଜିଟାଲ୍ କାରବାର ଯାଞ୍ଚ କରିବା ପରେ ସମ୍ପୃକ୍ତ ଦୋକାନୀ ମାଲିକଙ୍କୁ ୨୯ ଲକ୍ଷ ଟଙ୍କାର ଜିଏସ୍‌ଟି ନୋଟିସ୍ କରିଥିବା ଜଣାପଡ଼ିଛି ।

ସେପଟେ ପରିବା ଦୋକାନୀ ମାଲିକ ଶଙ୍କରଗୌଡ଼ା ଏହାର ପ୍ରତିକ୍ରିୟା ରଖି କହିଛନ୍ତି, ମୁଁ କେବଳ ପନିପରିବା ବିକ୍ରି କରେ, ଯାହା GST ପରିସରଭୁକ୍ତ ନୁହେଁ । ମୁଁ ଚାଷୀଙ୍କ ଠାରୁ ପନିପରିବା କିଣି ସିଧାସଳଖ ମୋ ଦୋକାନରେ ବିକ୍ରି କରେ । ଗ୍ରାହକ ମାନେ ଆଜିକାଲି UPI ମାଧ୍ୟମରେ ପେମେଣ୍ଟ କରିବାକୁ ପସନ୍ଦ କରୁଛନ୍ତି । ମୁଁ ପ୍ରତିବର୍ଷ ଆୟକର ରିଟର୍ଣ୍ଣ ଫାଇଲ କରେ । ମୋ ପାଖରେ ଆୟକର ରିଟର୍ଣ୍ଣ, କାରବାର ରେକର୍ଡ ଏବଂ ବ୍ୟାଙ୍କ ଷ୍ଟେଟମେଣ୍ଟ ମଧ୍ୟ ଅଛି ଯାହା ମୋ ବ୍ୟବସାୟ GST ମୁକ୍ତ ବୋଲି ପ୍ରମାଣ କରିପାରିବ ।

ଦର୍ଶକବନ୍ଧୁ ଭାରତରେ ତାଜା ଓ ଅଣପ୍ରକ୍ରିୟାକୃତ ପନିପରିବା ଉପରେ କୌଣସି GST ନାହିଁ, ଅର୍ଥାତ୍ ଏହା ଉପରେ ଶୂନ୍ୟ ପ୍ରତିଶତ ଟିକସ ଅଛି । ଏହା ଚାଷୀ ଓ ଖୁଚୁରା ବ୍ୟବସାୟୀ ଉଭୟଙ୍କ ପାଇଁ ପ୍ରଯୁଜ୍ୟ । ତଥାପି, ଯଦି ପନିପରିବାକୁ ପ୍ୟାକେଜିଂ, ଲେବଲିଂ କିମ୍ବା ପ୍ରକ୍ରିୟାକରଣ କରାଯାଏ, ତେବେ ଏହା ଉପରେ ୫ ପ୍ରତିଶତରୁ ୧୨ ପ୍ରତିଶତ GST ଲାଗିପାରେ ।

ତେବେ ଶଙ୍କରଗୌଡା କେବଳ ତାଜା ପନିପରିବା ବିକ୍ରୟ କରନ୍ତି, ଯାହାକୁ ସେ ସିଧାସଳଖ ଚାଷୀଙ୍କଠାରୁ କିଣନ୍ତି । ଏପରି ପରିସ୍ଥିତିରେ, ଶଙ୍କରଗୌଡାଙ୍କ ଉପରେ GST ଲାଗୁ ହେବା ଉଚିତ୍ ନୁହେଁ ବୋଲି ଟିକସ ବିଶେଷଜ୍ଞମାନେ ମତପ୍ରକାଶ କରିଛନ୍ତି । ସେପଟେ ଶଙ୍କରଗୌଡା ବର୍ତ୍ତମାନ ସ୍ଥିତିରେ ଡିଜିଟାଲ ମାଧ୍ୟମରେ ପେମେଣ୍ଟ ଗ୍ରହଣ କରିବା ବନ୍ଦ କରିଦେଇଥିବା ବେଳେ ଗ୍ରାହକମାନଙ୍କଠାରୁ କେବଳ ନଗଦ କ୍ୟାସ ଗ୍ରହଣ କରୁଥିବା ଜଣାପଡିଛି । ଏହାସହ ସେ ନ୍ୟାୟ ପାଇଁ ଜିଏସ୍‌ଟି ବିଭାଗକୁ ଆବେଦନ କରିଛନ୍ତି ।

(ବ୍ୟୁରୋ ରିପୋର୍ଟ, ଓଟିଭି)