GST Council Meeting: ଶସ୍ତା ହେବ କାର୍, ବାଇକ୍, ଟିଭି, ଫ୍ରିଜ୍ ! ହୋଇପାରେ ବଡ଼ ନିଷ୍ପତ୍ତି

ସରକାର ଦେବେ କି ଖୁସି ଖବର ? ଶସ୍ତା ହେବ କାର୍, ବାଇକ୍, ଟିଭି, ଫ୍ରିଜ୍ ! କମ୍ ଖର୍ଚ୍ଚରେ ପୂରଣ ହେବ କାର୍ ଚଢିବା ସ୍ବପ୍ନ । ଔଷଧ, ଶାମ୍ପୂ, ସାବୁନ, ଟୁଥପେଷ୍ଟ ଦାମ୍ ବି କମିବ ! ବଦଳିବ ଟିକସ ସ୍ଲାବ୍ ? ଉଠିଯିବ କି ୧୨% ଓ ୧୮% ଟିକସ ?

ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଆଜିଠୁ ନୂଆଦିଲ୍ଲୀରେ ଆରମ୍ଭ ହୋଇଥିବା ୨ ଦିନିଆ GST କାଉନସିଲ୍ ବୈଠକରେ ଏନେଇ ଆସିପାରେ ନିଷ୍ପତ୍ତି । ପୂର୍ବରୁ ଜିଏସଟି କାଉନସିଲ ବୈଠକରେ ୧୨ ପ୍ରତିଶତ ଓ ୧୮ ପ୍ରତିଶତ ଟିକସ ଉଚ୍ଛେଦ ପାଇଁ ପ୍ରସ୍ତାବ ଦିଆଯାଇଥିଲା । ଏବେ ଏ ସଂକ୍ରାନ୍ତରେ ଆଲୋଚନା କରାଯାଇ ଦୁଇଟି ଟିକସ ସ୍ଲାବ ଉଠାଇବା ଉପରେ ନିଷ୍ପତ୍ତି ହୋଇପାରେ ।

ବର୍ତ୍ତମାନ ଦେଶରେ ୪ଟି ଜିଏସଟି ସ୍ଲାବ ଯଥା ୫%, ୧୨%, ୧୮% ଓ ୨୮% ପ୍ରଚଳିତ ଅଛି । ଆଗକୁ କେବଳ ୫% ଓ ୧୮% ସ୍ଲାବ ରହିବ । ୨୮% ସ୍ଲାବରେ ଆସୁଥିବା ପ୍ରାୟ ୯୦% ସାମଗ୍ରୀ ୧୮% ସ୍ଲାବକୁ ଆସିପାରେ । ୧୨% ଜିଏସଟି ଆଦାୟ ହେଉଥିବା ସାମଗ୍ରୀ ୫% ସ୍ଲାବରେ ରହିପାରେ । ଯାହାଫଳରେ ପ୍ରାୟ ୧୭୫ଟି ଜିନିଷ ଉପରେ ଟିକସ ୧୦ ପ୍ରତିଶତ କମ୍ ହୋଇପାରେ ।

ସେହି ଜିନିଷଗୁଡିକ ମଧ୍ୟରେ ହାଇବ୍ରିଡ କାର, ବାଇକ, ଟିଭି, ଫ୍ରିଜ, ୱାସିଙ୍ଗମେସିନ ଆଦି କଞ୍ଜୁମର ଇଲେକ୍ଟ୍ରୋନିକ୍ସ ସାମଗ୍ରୀ ରହିଛି । ଔଷଧ, ଡେରି ପ୍ରଡକ୍ଟ, ପ୍ରୋସେସଡ ଫୁଡ୍, ପାଉଡର, ଟୁଥପେଷ୍ଟ, ଶାମ୍ପୂ ସହ ଅନେକ କସମେଟିକ୍ସ ସାମଗ୍ରୀଗୁଡିକର ଦାମ୍ ବି କମିପାରେ । ଏହାବ୍ୟତୀତ ସିମେଣ୍ଟ, ସାର, ଟ୍ରାକ୍ଟର, କୃଷି ଉପକରଣଗୁଡିକ ବି ଶସ୍ତା ହେବାର ସମ୍ଭାବନା ରହିଛି ।

କିନ୍ତୁ ଗୁଟଖା, ମାଦକ ଦ୍ରବ୍ୟ ମହଙ୍ଗା ହୋଇପାରେ । ଏହା ଉପରେ ୪୦ ପ୍ରତିଶତ ଜିଏସିଟି ଲାଗିପାରେ ।