ଭାବରେ ଉଛୁଳୁଛି, ଭବ୍ୟତାରେ ଝଲସୁଛି ରାମ ଜନ୍ମଭୂମି; ମୋଦିଙ୍କ ସହ ଭାବ ବିନିମୟ ପାଇଁ ଉତ୍କଣ୍ଠାରେ ଓଡ଼ିଆ ଶ୍ରମିକ

ଦୀର୍ଘ ୫ଶହ ବର୍ଷ ଧରି ଯେଉଁ ମାହେନ୍ଦ୍ର ବେଳାକୁ ଅପେକ୍ଷା କରିଥିଲା ସାରା ଦେଶ, ଆଉମାତ୍ର କେଇ ଘଣ୍ଟା ମଧ୍ୟରେ ପହଞ୍ଚିବ ସେହି ଭବ୍ୟ ଆଉ ଦିବ୍ୟ ମୁହୂର୍ତ୍ତ । ସେଥିପାଇଁ ଆଜି ଭକ୍ତି, ଭାବ ଆଉ ଆବେଗ ଭିତରେ ଉଛୁଳୁଛି ରାମନଗରୀ ଅଯୋଧ୍ୟା, ଉଲ୍ଲସିତ ହୋଇଛି ଭକ୍ତ ପ୍ରାଣ । ସବୁରି ମୁହଁରେ ଶୁଭୁଛି ଜୟ ଶ୍ରୀରାମ ।

ଉତ୍ସାହିତ ଅଯୋଧ୍ୟା, ଉଲ୍ଲସିତ ଅଯୋଧ୍ୟା, ଉତ୍ସବମୁଖର ଅଯୋଧ୍ୟା । ଭକ୍ତିରସରେ ବୁଡ଼ିଛି ଭକ୍ତପ୍ରାଣ, ଗୁଞ୍ଜରିତ ହେଉଛି ମର୍ଯ୍ୟାଦା ପୁରୁଷୋତ୍ତମଙ୍କ ନାମ । ଆଉ ମାତ୍ର କିଛି ଘଣ୍ଟାର ଅପେକ୍ଷା, ଇତିହାସ ରଚିବ ଐତିହାସିକ ଅଯୋଧ୍ୟା ନଗରୀ । ଭବ୍ୟ ମନ୍ଦିରରେ ଆସ୍ଥାନକୁ ବିଜେ ହେବେ ପ୍ରଭୁ ଶ୍ରୀରାମ । ସେଥିପାଇଁ ତ ଏକ ମନ, ଏକ ପ୍ରାଣ, ଏକ ଲୟରେ କାହିଁ କେତେଦୂରରୁ ଅଯୋଧ୍ୟାକୁ ଛୁଟି ଆସିଛନ୍ତି ସାଧୁସନ୍ଥଙ୍କ ସହ ଲକ୍ଷ ଲକ୍ଷ ରାମପ୍ରେମୀ । ସମସ୍ତେ ଜାଣିଛନ୍ତି ପ୍ରାଣ ପ୍ରତିଷ୍ଠା ବେଳାରେ ମନ୍ଦିର ଭିତରକୁ ପ୍ରବେଶ ନିଷେଧ । କିନ୍ତୁ ଭବ୍ୟ ଆଉ ଦିବ୍ୟ ମୁହୂର୍ତ୍ତର ସାନ୍ନିଧ୍ୟ ଟିକକ ପାଇବା ପାଇଁ ବ୍ୟାକୁଳ ହୋଇ ଅଯୋଧ୍ୟାରେ ପହଞ୍ଚିବାରେ ଲାଗିଛନ୍ତି ସମସ୍ତେ ।

ସାଧୁସନ୍ଥ ଓ ସାଧାରଣ ଶ୍ରଦ୍ଧାଳୁଙ୍କ ବ୍ୟତୀତ ପ୍ରଭୁ ଶ୍ରୀରାମଙ୍କ ଅଯୋଧ୍ୟା ନଗରୀକୁ ଛୁଟୁଛି ସେଲିବ୍ରିଟିଙ୍କ ସୁଅ । ବଲିଉଡ ଅଭିନେତ୍ରୀ କଙ୍ଗନା ରାଣାୱତ, ତାମିଲ ସୁପରଷ୍ଟାର ରଜନୀକାନ୍ତ, ଅଭିନେତା ଅନୁପମ୍ ଖେର, ସଂଗୀତ ନିର୍ଦ୍ଦେଶକ ଅନୁ ମଲ୍ଲିକ ପ୍ରମୁଖ ପହଞ୍ଚିଛନ୍ତି ଅଯୋଧ୍ୟାରେ । ପ୍ରାଣ ପ୍ରତିଷ୍ଠା ସମାରୋହରେ ଦେଶ ବିଦେଶର ଏଭଳି ୮ ହଜାର ଅତିଥି ସାମିଲ ହେବାକୁ ଯାଉଛନ୍ତି । ସନ୍ଥ, ରାଜନେତା, କଳାକାର, ଉଦ୍ୟୋଗୀ ଓ ସେଲିବ୍ରିଟିମାନଙ୍କ ସହ ବିଦେଶରୁ ପ୍ରାୟ ୧୦୦ ଜଣ ପ୍ରତିନିଧି ଆସିବେ ଅଯୋଧ୍ୟା । ଆଉ ସମସ୍ତେ ଅତିଥି ଅଭ୍ୟାଗତଙ୍କୁ ସ୍ୱାଗତ ପାଇଁ ମହର୍ଷି ବାଲ୍ମୀକି ଅନ୍ତର୍ଜାତୀୟ ବିମାନ ବନ୍ଦରରେ ତୟାର ଅଛନ୍ତି ବିଭିନ୍ନ ସାଂସ୍କୃତିକ ଦଳ ।

ଏଠି ସଜେଇ ହୋଇଛି ସରଜୁ ଘାଟ । କାରଣ ଯେଉଁ ଶ୍ରଦ୍ଧାଳୁ ଅଯୋଧ୍ୟା ଆସି ରାମଲାଲାଙ୍କ ଦର୍ଶନ କରିବେ ଏଠାରେ ବୁଡ଼ ପକାଇବେ ।

ଯେଉଁମାନେ ବାନର ସେନା ଭଳି ଆସ୍ଥା ଆଉ ବିଶ୍ୱାସର ରାମ ମନ୍ଦିର ଛିଡ଼ା କରାଇଦେଲେ ଆଜି ସେହି ବିନ୍ଧାଣୀଙ୍କୁ ଭେଟି କୃତ୍ୟ କୃତ୍ୟ ଦକ୍ଷିଣ ଭାରତରୁ ଆସିଥିବା ଭକ୍ତଟିଏ ।

ଆସନ୍ତାକାଲି ମନ୍ଦିରର ପ୍ରାଣ ପ୍ରତିଷ୍ଠା ପରେ ପ୍ରଧାନମନ୍ତ୍ରୀ ମୋଦି ଏହି ଶ୍ରମିକ, ଯନ୍ତ୍ରୀ ଓ ସ୍ଥପତିମାନଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ଯେଉଁଥିରେ ଓଡ଼ିଆ କାରିଗର ଏବଂ ଯନ୍ତ୍ରୀ ବି ଅଛନ୍ତି ।

ଉଛୁଳୁଛି ଅଯୋଧା, ପୁରି ଉଠୁଛି ରାମନଗରୀ । ତା’ଉପରେ ଘୁରି ବୁଲୁଛି ପୋଲିସର ଛଞ୍ଚାଣ ଆଖି । ଦିନ ହୋ ୟା ରାତ୍, ୧୧୨ ହେ ଆପକେ ସାଥ୍। ଅର୍ଥାତ କୌଣସି ଅଘଟଣ ହେଲେ ୧୧୨କୁ ଡାଏଲ୍ କରିବାକୁ କହିଛି ୟୁପି ପୋଲିସ । ସାରା ଅଯୋଧ୍ୟାକୁ ପୋଲିସ ଘୋଡ଼ାଇ ଦେଇଛି ସୁରକ୍ଷାର ଚାଦର । ଏଥିପାଇଁ ମୁତୟନ ହୋଇଛନ୍ତି NDRF, RPF, ଆଣ୍ଟି ବମ୍ ସ୍କ୍ୱାଡ୍, ଡଗ୍ ସ୍କ୍ୱାଡ୍ ସହ ୧୩ ହଜାର ଫୋର୍ସ ।

ରାମଲାଲାଙ୍କ ପ୍ରତିଷ୍ଠା ଉତ୍ସବର ଅବ୍ୟବହିତ ପୂର୍ବରୁ ଭକ୍ତିମୟ ପରିବେଶ । ଏବଠୁ ଶୁଭୁଛି ରାମ ନାମ, ଭାବ ଆଉ ଆବେଗର ସଂଗୀତରେ ପୁରି ଉଠିଛି ଅଯୋଧ୍ୟା ନଗରୀ । ଅଯୋଧ୍ୟାର ଲତା ମଂଗେସକର ଛକର ଦୃଶ୍ୟ । ଯେଉଁଠି ପ୍ରୟାଗରାଜ PAC ପୋଲିସ ବ୍ୟାଣ୍ଡ ପ୍ରଦର୍ଶିତ କରିଛି । ଅଯୋଧ୍ୟାରୁ କ୍ୟାମେରାପର୍ସନ ପ୍ରଭାତ ସିହ୍ନା ଏବଂ ଗୋପାଳ ବର୍ମାଙ୍କ ସହ ସୁନନ୍ଦନ ମିଶ୍ର ଓ ଶିବାନନ୍ଦ ରାଉତଙ୍କ ରିପୋର୍ଟ ଓଟିଭି ।