ସହି ପାରିଲେନି ସ୍ୱାମୀଙ୍କ ବିୟୋଗ, ଆତ୍ମହତ୍ୟା କରିଦେଲେ

ସ୍ବାମୀଙ୍କ ଅକାଳ ବିୟୋଗକୁ ସହ୍ୟ ନକରିପାରି ସ୍ତ୍ରୀର ଆତ୍ମହତ୍ୟା । ଖବର ଆସିଛି ଜଟଣୀ ଥାନା ଅଞ୍ଚଳରୁ । ସ୍ଥାନୀୟ ବଅଙ୍ଗ ଗାଁର ଦିଲ୍ଲୀପ ସାମନ୍ତରାୟଙ୍କର ଗତ ଶୁକ୍ରବାର ଭୁବନେଶ୍ୱର ସ୍ଥିତ ହାଇଟେକ୍ ହସ୍ପିଟାଲ ଗ୍ୟାସ୍ ବିସ୍ଫୋରଣରେ ମୃତ୍ୟୁ ଘଟିଥିଲା । ଏହି ଘଟଣାରେ ମର୍ମାହତ ଦିଲ୍ଲୀପଙ୍କ ପତ୍ନୀ ସୁନା ସାମନ୍ତରାୟ ଆଜି ଆତ୍ମହତ୍ୟା କରିଥିବା ସୂଚନା ମିଳିଛି ।

ମୃତ ସୁନାଙ୍କର ମାତ୍ର ଦୁଇ ବର୍ଷ ତଳେ ବିବାହ ହୋଇଥିଲା । ସ୍ବାମୀ ଦିଲୀପଙ୍କ ବିୟୋଗ ପରେ ସୁନାଙ୍କୁ ତାଙ୍କ ବାପ ଘର ଲୋକେ ନୂଆଗାଁକୁ ନେଇ ଯାଇଥିଲେ । ହେଲେ ସେଠି ଘର ଭିତରୁ ବନ୍ଦ କରି ସୁନା ଆତ୍ମହତ୍ୟା କରିଛନ୍ତି । ଜଟଣୀ ପୋଲିସ ମୃତଦେହ ଉଦ୍ଧାର କରି ତଦନ୍ତ କରୁଛି ।

ଅନ୍ୟପଟେ ଗତ ଶୁକ୍ରବାରରେ ଭୁବନେଶ୍ୱର ପାଣ୍ଡରା ସ୍ଥିତ ହାଇଟେକ୍‌ ହସ୍ପିଟାଲରେ ବିସ୍ଫୋରଣ ଘଟିଥିଲା । ହସ୍ପିଟାଲ ପରିସରରେ ନିର୍ମାଣ କାର୍ଯ୍ୟ ଚାଲିଥିବାବେଳେ ବିସ୍ଫୋରଣ ହୋଇଥିଲା । ଏସିରେ ଗ୍ୟାସ୍‌ ଫିଲିଂ ବେଳେ ବିସ୍ଫୋରଣ ଘଟିଥିଲା । ବିସ୍ଫୋରଣରେ ୩ରୁ ୪ ଜଣ ଆହତ ହୋଇଥିଲେ । କୌଣସି ଅକ୍ସିଜେନ୍‌ ସିଲିଣ୍ଡରରେ ବିସ୍ଫୋରଣ ଘଟି ନଥିଲା ।