ଜଳୁଥିବା ବସ୍‌ରୁ ସ୍ୱାମୀ ଓ ପୁଅକୁ ଉଦ୍ଧାର କଲେ...ଶେଷରେ ନିଜେ ଜୀଅନ୍ତା ଜଳିଗଲେ

ଅନ୍ୟଙ୍କୁ ବଞ୍ଚାଉ ବଞ୍ଚାଉ ନିଜ ଜୀବନ ଚାଲିଗଲା । ଜଣେ ଜଣେ କରି ଅନ୍ୟଙ୍କୁ ବଞ୍ଚାଇଥିଲେ । ସ୍ୱାମୀ, ପୁଅକୁ ଜଳୁଥିବା ବସ୍‌ରୁ ବାହାରକୁ ପଠାଇଥିଲେ । ଆଉ ଶେଷରେ ନିଜ ନବାହାରି ପାରି ଜଳିଗଲେ ପୁଷ୍ପାଞ୍ଜଳି । ପଶ୍ଚିମବଙ୍ଗ ଖଡ଼ଗପୁରରେ ବସ୍‌ ଅଗ୍ନିକାଣ୍ଡ ଘଟଣାରେ ଏହି ଅଭାବନୀୟ ଘଟଣା ଘଟିଛି । 

ଗତକାଲି ସ୍ୱାମୀ ଓ ପୁଅଙ୍କ ସହ କୋଲକାତାରୁ ବସ୍‌ରେ ଚଢ଼ିଥିଲେ ପୁଷ୍ପାଞ୍ଜଳି । କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ସ୍ଥିତ ନିଜ ଘରକୁ ସେ ଯାଇଥାନ୍ତେ । ହେଲେ ପୁଷ୍ପାଞ୍ଜଳି ଜାଣିନଥିଲେ ଅଧା ବାଟରେ ତାଙ୍କ ସହ ଏତେ ବଡ଼ ଅଘଟଣ ଘଟିବ । 

ବସ୍‌ରେ ନିଆଁ ଲାଗିବା ପରେ ସମସ୍ତେ ବାହାରକୁ ବାହାରିବାକୁ ଚେଷ୍ଟା କରିଥିଲେ । ହେଲେ ବସ୍‌ ଡୋର୍‌ ନଖୋଲିବାରୁ ଆଉ ବାହାରକୁ ବାହାରି ପାରିନଥିଲେ । ଏସବୁ ଦେଖି ପୁଷ୍ପାଞ୍ଜଳିଙ୍କ ମୁଣ୍ଡରେ କିଛି ପଶି ନଥିଲା । କିଛି ଉପାୟ ନପାଇ ଶେଷରେ ପୁଅ ଓ ସ୍ୱାମୀଙ୍କୁ ଯେନତେନ ପ୍ରକାରରେ ସେ ବାହାରକୁ ବାହାର କରିଥିଲେ । ହେଲେ ନିଜେ ଆଉ ବାହାରି ନପାରିବାରୁ ତାଙ୍କର ମୃତ୍ୟୁ ହୋଇଛି ।

କାହିଁକି ହେଲା ଏତେ ବଡ଼ ଦୁର୍ଘଟଣା ? 

କେମିତି ବସ୍‌ରେ ଲାଗିଲା ନିଆଁ ? ବସ୍‌ରେ ପ୍ରଥମେ ନିଆଁ ଲାଗି ଲିଭି ଯାଇଥିଲା, ଆଉ ଥରେ ନିଆଁ ଲାଗିଥିଲା ?  ବସ୍‌ର ଗେଟ୍ ଖୋଲି ନଥିଲା, ମୁଖ୍ୟ ଗେଟ୍ ଖୋଲିବାରେ ବିଳମ୍ବ ହୋଇଥିଲା କି ? 

ଖାଲି ଏତିକି ନୁହେଁ ମୃତ ପୁଷ୍ପାଞ୍ଜଳିଙ୍କ ସ୍ୱାମୀଙ୍କ କହିବା କଥା, ଏମର୍ଜେନ୍ସି ଗେଟ୍ ପାଖରେ ଜିନିଷ ରଖାଯାଇଥିଲା । ଫଳରେ ଏହା ଖୋଲି ନଥିଲା । ଆଉ ପୁଷ୍ପାଞ୍ଜଳିଙ୍କ ମୃତଦେହ ବି ସେହି ଏମର୍ଜେନ୍ସି ଗେଟ୍ ପାଖରୁ ମିଳିଛି । ବସ୍‌ରେ କିଛି ବିସ୍ଫୋରକ ଥିଲା କି ? ଯାହା ନିଆଁକୁ ଅଳ୍ପ ସମୟ ମଧ୍ୟରେ ଅଧିକ କ୍ଷୀପ୍ର ବେଗରେ ବଢ଼ାଇଥିଲା । 

ସୂଚନାଥାଉ କି, ଗତକାଲି କୋଲକାତାରୁ ପାରାଦୀପକୁ ଆସୁଥିବା ଶିବମ୍ ବସ୍‌ ଖଡ଼ଗପୁର ଏନ୍‌ଏଚ୍‌ରେ ଥିବାବେଳେ ନିଆଁ ଲାଗି ଯାଇଥିଲା । ଚାହୁଁଚାହୁଁ ପୁରା ବସ୍ ଜଳି ଯାଇଥିଲା । ପ୍ରଥମେ ବସ୍‌ରେ ଅଳ୍ପ ନିଆଁ ଲାଗିଥିଲା । ପରେ ପୁଣି ଥରେ ଏଥିରେ ଭୀଷଣ ଅଗ୍ନିକାଣ୍ଡ ଘଟିଥିବା ସୂଚନା ମିଳିଛି । 

ବସ୍‌ରେ ମୋଟ୍ ୩୮ ଜଣ ଯାତ୍ରୀ ଥିବା ବେଳେ ସେଥିରୁ କେବଳ ଓଡ଼ିଶାରୁ ୩୧ ଜଣ ଥିଲେ । ଗତକାଲିର ଅଘଟଣ ପରେ ଆଜି ୨୮ ଜଣଙ୍କୁ ଅନ୍ୟ ଏକ ବସ୍‌ରେ ସେମାନଙ୍କୁ ଓଡ଼ିଶା ଫେରାଇ ଅଣାଯାଇଛି ।