ଗଭୀର ଖାଇକୁ ଖସିଲା ବୋଲେରୋ : ଦିଅଁ ଦର୍ଶନ ପୂର୍ବରୁ ଚାଲିଗଲା ୯ ଜଣଙ୍କ ଜୀବନ

ଦିଅଁ ଦର୍ଶନ ପୂର୍ବରୁ ଜୀବନ ନେଇଗଲା ଯମ । ରାସ୍ତାରେ ଛକି ବସିଥିଲା ମୃତ୍ୟୁ । ଉତ୍ତରାଖଣ୍ଡର ପିଥୋରାଗଡ଼ର ମୁନସ୍ୟାରିରେ ଭୟଙ୍କର ସଡ଼କ ଦୁର୍ଘଟଣା ଘଟିଛି । ନିୟନ୍ତ୍ରଣ ହରାଇ ଅଙ୍କାବଙ୍କା ରାସ୍ତାରୁ ଗୋଟାଏ ବୋଲେରୋ ଗାଡ଼ି ଗଭୀର ଖାଇକୁ ଖସି ପଡ଼ିବାରୁ ୯ଜଣଙ୍କର ମୃତ୍ୟୁ ଘଟିଛି । ହୋକରା ମନ୍ଦିର ଠାରୁ କିଛି ଦୂରରେ ଏହି ଦୁର୍ଘଟଣା ଘଟିଛି । ସ୍ଥାନୀୟ ଲୋକଙ୍କଠାରୁ ଖବର ପାଇବା ପରେ ଘଟଣାସ୍ଥଳରେ ପହଞ୍ଚିଛି ପୋଲିସ୍‌ । ରେସ୍କ୍ୟୁ ଅପରେସନ୍‌ ପାଇଁ ଏକ ଟିମ୍‌ ସେଠାରେ ପହଞ୍ଚିଛି ।

ଏକ ବୋଲେରୋ ଗାଡ଼ିରେ ଶ୍ରଦ୍ଧାଳୁମାନେ ବାଗେଶ୍ୱର ଶାମାରୁ ବାହାରି ହୋକ୍‌ରା ମନ୍ଦିର ଦର୍ଶନ ପାଇଁ ଯାଉଥିଲେ । ହେଲେ ଦିଅଁ ଦର୍ଶନ ପୂର୍ବରୁ ନିୟନ୍ତ୍ରଣ ହରାଇ ଗାଡ଼ିଟି ଯାଇ ଖାଇରେ ଖସି ପଡ଼ିଥିଲା । ଗାଡ଼ିଟି ୬୦୦ ମିଟର ଗଭୀର ଖାଇକୁ ଖସିପଡ଼ିଥିବା ସୂଚନା ମିଳିଛି । ଏଥିରେ ସମୁଦାୟ ୧୦ଜଣ ଯାତ୍ରୀ ଥିଲେ ବୋଲି ପ୍ରାଥମିକ ରିପୋର୍ଟରୁ ଜଣାପଡ଼ିଛି । ଅନ୍ୟ ଦୁଇ ଜଣ ଗୁରୁତର ଆହତ ହୋଇଛନ୍ତି ।

ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକ ରୁଣ୍ଡ ହୋଇଯାଇଥିଲେ । ଆଉ ତା’ପରେ ତୁରନ୍ତ ପୋଲିସ୍‌କୁ ଏସମ୍ପର୍କରେ ସୂଚନା ଦିଆଯାଇଥିଲା । ତେବେ ଦୁର୍ଘଟଣା ଏତେ ଭୟଙ୍କର ହୋଇଛି ଯେ ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି । ଦୁର୍ଘଟଣାରେ ଶିକାର ହୋଇଥିବା ଲୋକେ ବାଗେଶ୍ୱର ତହସିଲ୍‌ର କପକୋଟ୍‌, ଶାମା ଓ ଭନାର୍‌ର ବୋଲି କୁହାଯାଉଛି ।

ଦୁର୍ଘଟଣା ସମ୍ପର୍କରେ ବିଧାୟକ ହରିଶ ଧାମୀ ଓ ଜିଲ୍ଲା ମାଜିଷ୍ଟ୍ରେଟ୍‌ଙ୍କ ସମେତ ପଦସ୍ଥ ସରକାରୀ ଅଧିକାରୀମାନଙ୍କ ଆଲୋଚନା କରିଛନ୍ତି । ମୃତକଙ୍କ ପରିବାରକୁ ସମବେଦନା ଜଣାଇବା ସହ ତୁରନ୍ତ ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରିବା ପାଇଁ ନିର୍ଦ୍ଦେଶ ଦେଇଛନ୍ତି।