LIVE TV
ରାସ୍ତାକଡରେ ବସି ହାତ ଯୋଡି କାନ୍ଦି କାନ୍ଦି ଭଗବାନଙ୍କୁ ଡାକୁଛି ଏକ ବାଳକ, ହେ ବଦ୍ରିନାଥ, ଆପଣ ଏ କଣ କଲେ? ଆମେ କଣ ଭୁଲ କରିଥିଲୁ? ଆମେ ତ ବାସ୍ ଆପଣଙ୍କ ଭକ୍ତ! ଦୁର୍ଘଟଣା ପରେ କରୁଣ ଚିତ୍କାରରେ ୧୦ ବର୍ଷୀୟ ବାଳକ ମୁହଁରୁ ଏପରି ଶୁଣି ସେହି ଅଞ୍ଚଳରେ ଥିବା ସଭିଙ୍କ ଆଖିରେ ଭରି ଯାଇଛି ଲୁହ । ବାପା ମାଆଙ୍କୁ ହରାଇ ମୋ ସହିତ ହିଁ କାହିଁକି ଏମିତି ହେଲା ବୋଲି ଭାବି ଅସହାୟ ହୋଇ ପଡିଛି ସେହି ବାଳକଟି । ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଅଳକାନନ୍ଦ ନଦୀ କଡରେ ।
ଅଧିକ ପଢ଼ନ୍ତୁ: ରିଲ୍ସ ହେଲା କାଳ, ଲାଇକ୍ ମିଳିବା ଆଗରୁ ଚାଲିଗଲା ଜୀବନ
ମଧ୍ୟପ୍ରଦେଶର ରାଜଗଡର ବାସିନ୍ଦା ବିଶାଳ ସୋନି(୪୨) ଓ ଗୌରୀ ସୋନି(୪୧) ତାଙ୍କ ପୁଅ ପାର୍ଥ ସୋନି(୧୦) ଙ୍କୁ ନେଇ ଚାରିଧାମ ଯାତ୍ରାରେ ବାହାରିଥିଲେ । ହେଲେ ଉତ୍ତରାଖଣ୍ଡର ରୁଦ୍ରପ୍ରୟାଗ ଜିଲ୍ଲାର ଘୋଲଟିର ଅଞ୍ଚଳରେ ଗୁରୁବାର ଦିନ ଏକ ଦୁର୍ଘଟଣା ଘଟିବା ଫଳରେ ବିଶାଳ ଓ ସୋନିଙ୍କ ସମେତ ଚାରି ଜଣଙ୍କର ମୃତ୍ୟୁ ହୋଇଥିଲା ଏବଂ ଆଠ ଜଣ ଏବେ ବି ନିଖୋଜ ଅଛନ୍ତି । ଜିଲ୍ଲା ବିପର୍ଯ୍ୟୟ ପରିଚାଳନା ଅଧିକାରୀ ଏନକେ ରାଜୱାର କହିଛନ୍ତି, ‘‘ନଦୀର ପ୍ରଖର ସ୍ରୋତ ଯୋଗୁଁ ନିଖୋଜ ବ୍ୟକ୍ତିମାନଙ୍କର ମଧ୍ୟ ବଞ୍ଚିବା କ୍ଷୀଣ ।’’
Also Read
ଏହି ଦୁର୍ଘଟଣା ପରେ ଖୋଜାଖୋଜି ପରେ ଏସଡିଆରଏଫ ପକ୍ଷରୁ ଉଦୟପୁରର ସଞ୍ଜୟ ସୋନି(୫୫)ଙ୍କ ମୃତଦେହ ଉଦ୍ଧାର କରାଯାଇଛି । ଆନୁଷ୍ଠାନିକ ପ୍ରକ୍ରିୟା ଶେଷ ହେବା ପରେ ତାଙ୍କ ପରିବାର ଲୋକଙ୍କୁ ତାଙ୍କ ମୃତଦେହ ହସ୍ତାନ୍ତର କରାଯିବ । ନଦୀର ସ୍ରୋତ ପ୍ରଖର ହୋଇଥିବାରୁ ନିଖୋଜ ବ୍ୟକ୍ତିଙ୍କ ଉଦ୍ଧାର କାର୍ଯ୍ୟରେ ବିଳମ୍ବ ହେଉଛି ।
ସୂଚନାଯୋଗ୍ୟ, ରାଜସ୍ଥାନ, ଗୁଜରାଟ, ମଧ୍ୟପ୍ରଦେଶ ଏବଂ ମହାରାଷ୍ଟ୍ରରୁ ୧୯ ଜଣ ତୀର୍ଥ ଯାତ୍ରୀ ଏକ ୩୧ ଜଣିଆ ସିଟର ବସ୍ ଯୋଗେ ଚାରଧାମ ଯାତ୍ରା ଅଭିମୁଖେ ବାହାରିଥିଲେ । ବଦ୍ରିନାଥ ରୁଟରେ ଯିବା ବାଟରେ ସେହି ବସକୁ ଧକ୍କା ଦେଇଥିଲା ଦ୍ରୁତ ଗତିରେ ଆସୁଥିବା ଏକ ଟ୍ରକ । ଦୁର୍ଘଟଣା ଘଟିବା ସମୟରେ ଯାତ୍ରୀବାହୀ ବସରେ ପାର୍ଥ ତାଙ୍କ ମାଆଙ୍କ ପାଖରେ ବସିଥିଲେ । ବାପା ମାଆଙ୍କୁ ହରାଇବା ପରେ ବର୍ତ୍ତମାନ ପାର୍ଥ ମାନସିକ ଭାବେ ଭାଙ୍ଗି ପଡିଛନ୍ତି । ପାର୍ଥ ତାଙ୍କ ବାପାମାଆଙ୍କ ସହ ଚାରି ଧାମ ଯାତ୍ରା ଅଭିମୁଖେ ବାହାରିଥିବା ବେଳେ ତାଙ୍କ ଦୁଇ ଭଉଣୀ ତେଜସ୍ୱିନୀ(୧୭) ଓ ମନସ୍ୱିନୀ(୧୫) ରାଜଗଡରେ ହିଁ ଥିଲେ ବୋଲି ପାର୍ଥଙ୍କ ଦାଦା ନିଳେଶ ସୋନି କହିଛନ୍ତି । ବିଶାଳ ଓ ଗୌରୀଙ୍କ ମୃତଦେହ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ବେଳେ ଆଜି ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ ।
ଅଧିକ ପଢ଼ନ୍ତୁ: ମେକ୍ସିକୋ ଯାଉଥିଲା ଜାହାଜ, ଥିଲା ୩ ହଜାର ଗାଡ଼ି...ଲାଗିଗଲା ନିଆଁ
