Ambulance Blast: ମଝି ରାସ୍ତାରେ ଫାଟିଲା ଆମ୍ୱୁଲାନ୍ସ ଅକ୍ସିଜେନ୍ ସିଲିଣ୍ଡର; ବର୍ତ୍ତିଗଲେ ଗର୍ଭବତୀ

ଗର୍ଭବତୀଙ୍କୁ ନେଇ ଯାଉଥିଲା ଆମ୍ୱୁଲାନ୍ସ। ହଠାତ୍ ଫାଟିଲା ଅକ୍ସିଜେନ୍ ସିଲିଣ୍ଡର। ରାସ୍ତା ମଝିରେ ହେଲା ଭୟଙ୍କର ବିସ୍ଫୋରଣ। ହେଲେ ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଯୋଗୁଁ ବଞ୍ଚିଗଲେ ମହିଳା ଓ ତାଙ୍କ ପରିବାର ଲୋକ। ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି।

ଗତକାଲି ମହାରାଷ୍ଟ୍ରର ଜାଲଗାଓଁ ଜିଲ୍ଲା ଦାଦାୱାଡି ଅଞ୍ଚଳ ନିକଟରେ ଥିବା ଏକ ଫ୍ଲାଏ ଓଭରରେ ବିସ୍ଫୋରଣ ଘଟିଛି। ଜଣେ ଗର୍ଭବତୀ ମହିଳା ଏବଂ ତାଙ୍କ ପରିବାର ଲୋକଙ୍କୁ ନେଇ ଆମ୍ୱୁଲାନ୍ସଟି ଏରାଣ୍ଡୋଲ ସରକାରୀ ଡାକ୍ତରଖାନାରୁ ଜାଲଗାଓଁ ଜିଲ୍ଲା ଡାକ୍ତରଖାନାକୁ ଯାଉଥିଲା। ହେଲେ ଅଧାବାଟରେ ଗାଡି ଇଞ୍ଜିନରୁ ଧୂଆଁ ବାହାରୁଥିବା ଦେଖିଥିଲେ ଡ୍ରାଇଭର। ଏହାପରେ ସେ ରୋଗୀ ଓ ସଂପର୍କୀୟଙ୍କୁ ତୁରନ୍ତ ଗାଡ଼ିରୁ ଓହ୍ଲାଇବାକୁ କହିଥିଲେ।

ଏହାର କିଛି ମିନିଟ୍‌ ପରେ ଆମ୍ୱୁଲାନ୍ସରେ ନିଆଁ ଲାଗିଯାଇଥିଲା। ଦେଖୁଦେଖୁ ଗାଡ଼ିଟି ଜଳିବା ଆରମ୍ଭ କଲା। ଏହାପରେ ଆମ୍ବୁଲାନ୍ସରେ ଥିବା ଅମ୍ଳଜାନ ଟ୍ୟାଙ୍କରେ ନିଆଁ ଲାଗି ଏକ ବଡ଼ ବିସ୍ଫୋରଣ ହୋଇଥିଲା। ବିସ୍ଫୋରଣ ଏତେ ଭୟଙ୍କର ଥିଲା ଯେ ଏହା ପାଖରେ ଥିବା ଘରର କାଚ କବାଟ ଓ ଝରକା ବି ଭାଙ୍ଗି ଦେଇଥିଲା। ଏହାପରେ ଗାଡିଟି ଖଣ୍ଡ ଖଣ୍ଡ ହୋଇଯାଇଥିଲା।

#ଜଳିଗଲା_ଆମ୍ୱୁଲାନ୍ସ
ଗର୍ଭବତୀଙ୍କୁ ନେଇ ଯାଉଥିଲା ଆମ୍ୱୁଲାନ୍ସ। ହଠାତ୍ ଫାଟିଲା ଅକ୍ସିଜେନ୍ ସିଲିଣ୍ଡର। ମହାରାଷ୍ଟ୍ରର ଜାଲଗାଓଁ ଜିଲ୍ଲା ଦାଦାୱାଡି ଅଞ୍ଚଳ ନିକଟରେ ଥିବା ଏକ ଫ୍ଲାଏ ଓଭରରେ ବିସ୍ଫୋରଣ ଘଟିଛି। ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଯୋଗୁଁ ବଞ୍ଚିଗଲେ ମହିଳା ଓ ସଂପର୍କୀୟ।#Ambulance#Blast#OxygenCylinder#Maharastra… pic.twitter.com/FrxY2w9EYZ

— ଓଟିଭି (@otvkhabar) November 14, 2024

ତେବେ ସେତେବେଳକୁ ଏକ ସଂକୀର୍ଣ୍ଣ ବାଟ ଦେଇ ଗର୍ଭବତୀ ମହିଳା, ତାଙ୍କ ସଂପର୍କୀୟ ଓ ଡ୍ରାଇଭର ପଳାଇ ଆସିଥିଲେ। ସୌଭାଗ୍ୟ ବଶତଃ ଏହି ଘଟଣାରେ କେହି ଆହତ କିମ୍ବା ଆହତ ହୋଇନାହାଁନ୍ତି। ବିସ୍ଫୋରଣର ଭିଡିଓ ଅନଲାଇନରେ ଭାଇରାଲ ହେବାରେ ଲାଗିଛି। ପୋଲିସ ଘଟଣାର ତଦନ୍ତ କରୁଛି।

ଗତ ମାସରେ ଉତ୍ତରପ୍ରଦେଶର ପ୍ରତାପ ଜିଲ୍ଲାରେ ମଧ୍ୟ ଏଭଳି ଘଟଣା ଘଟିଥିଲା। ପେଟ୍ରୋଲ ପମ୍ପ ନିକଟରେ ପାର୍କିଂ ହୋଇଥିବା ଏକ ଆମ୍ବୁଲାନ୍ସରେ ନିଆଁ ଲାଗିଯାଇଥିଲା। ଏହାର ମିନିଟ୍ ପରେ ହଠାତ୍ ବିସ୍ଫୋରଣ ଘଟାଇଥିଲା।ଡ୍ରାଇଭର ବିବେକ ଗୁପ୍ତା ଗାଡିରୁ ହଠାତ୍ ଧୂଆଁ ବାହାରୁଥିବା ଦେଖି ଗାଡ଼ିରୁ ଓହ୍ଲାଇ ଯାଇଥିଲେ। ପେଟ୍ରୋଲ ପମ୍ପ କର୍ମଚାରୀଙ୍କ ସାହାଯ୍ୟରେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ।

ତେବେ କିଛି ସମୟ ପରେ ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ପୋଲିସର ସୂଚନା ଅନୁସାରେ, ଏଥିରେ ଜଣେ ରୋଗୀ ଅମର ଜୈସୱାଲ ଆହତ ହୋଇ ନିକଟସ୍ଥ ଡାକ୍ତରଖାନାରେ ଭର୍ତ୍ତି ହୋଇଥିଲେ। ପୋଲିସ କହିଛି ଯେ ଘରୋଇ ଆମ୍ବୁଲାନ୍ସରେ ଏହି ଅଘଟଣ ଘଟିଛି। ଯାହା ରୋଗୀନେଇ ଦିଲ୍ଲୀରୁ ଆସୁଥିଲା।