LIVE TV
ପାଦ ତଳୁ ମାଟି ଧସିଯାଇଛି...ମୁଣ୍ଡ ଉପରକୁ ଛିଡ଼ିପଡ଼ିଛି ଆକାଶ... ଜୀବିକା ପାଇଁ ବିଦେଶ ଯାଇ ଭେଣ୍ଡିଆ ପୁଅ ଯେତେବେଳେ ଜୀବନ ହରାଇଛି, ଆଉ ବା ଏହି ପରିବାର ପାଖରେ କ’ଣ ଅଛି । ଲୁହ ଆଉ ଶୋକ ଭିତରେ ଜଡ଼ସଡ଼ ପତ୍ନୀ ସହ ବୃଦ୍ଧ ବାପା-ମା’ । କୋହ ଆଉ ଲୁହରେ ବତୁରି ଯାଇଛି ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ବ୍ଲକ ରଣଝାଲି ଗାଁ ।
ସର୍ବଗ୍ରାସୀ ନିଆଁ କେଉଁଠି ଥିଲା କେଜାଣି, କୁଏତରେ ରୋଜଗାରିଆ ଭେଣ୍ଡିଆ ପୁଅ ସନ୍ତୋଷ ଗୌଡ଼ଙ୍କ ଜୀବନ ନେଇଗଲା ଅଦିନରେ । ବୟସ କହିଲେ ମାତ୍ର ୩୮ ବର୍ଷ । ଆଜିକୁ ୨ ବର୍ଷ ହେଲା, କୁଏତର ମଙ୍ଗାଫ ସହରର ଏକ ସପିଂ ମଲରେ କାମ କରୁଥିଲେ । ଆଉ ସେହି ରୋଜଗାର ଟଙ୍କାରେ ଗତ ମାର୍ଚ୍ଚରେ ବାପାଙ୍କ ହାର୍ଟ ଅପରେସନ୍ କରିବା ସହ ପୁଣି ବାହୁଡ଼ି ଯାଇଥିଲେ କୁଏତକୁ ।
କିନ୍ତୁ ବୁଧବାରର କାଳରାତିରେ ଘଟିଥିବା ଅଗ୍ନିକାଣ୍ଡରେ ଜଳିପୋଡ଼ି ପ୍ରାଣ ହରାଇଲେ ସନ୍ତୋଷ । ଅନ୍ୟ ଏକ ଘଟଣାକ୍ରମରେ ପତି-ପତ୍ନୀଙ୍କର ସୁଖର ସଂସାର ଚାଲିଥିଲା । କେତେ ଫଟୋ ଉଠାଉଥିଲେ, ଖୁସି ମନଉଥିଲେ । ଜୀବନରେ ଆଉ କେବେ ଫଟୋ ଉଠାଇ ପାରିବେନି ଏହି ଦମ୍ପତ୍ତି । କାରଣ ଜୀବିକା ପାଇଁ ଦରିଆପାରିକୁ ଯାଇ ଆରପାରିକୁ ଚାଲିଯାଇଛନ୍ତି ସ୍ୱାମୀ ।
Also Read
୭ ମାସର ଗର୍ଭବତୀ ଥିବା ପତ୍ନୀକୁ ନିସଙ୍ଗ କରି ବାହୁଡ଼ି ଯାଇଛନ୍ତି ଅଫେରା ବାଟ ଦେଇ । ଏ ହେଲେ କଟକ ତିଗିରିଆ ଥାନା କରଡ଼ାପଲ୍ଲୀର ୩୩ ବର୍ଷିୟ ମହମ୍ମଦ ଜହୁର । କୁଏତ ମଙ୍ଗଫ୍ ସହରର ଏକ ଘରୋଇ କମ୍ପାନୀରେ କାମ କରୁଥିଲେ ସିବିଲ୍ ଲାବୋରାଟୋରୀ ଟେକ୍ନିସିଆନ ଭାବେ ।
ବୁଧବାର ଭୋର ସମୟର କଥା । ମସଜିଦରେ ନମାଜ ପାଠପରେ ସେହି ଅଭିଶପ୍ତ କୋଠାର ୫ ମହଲାରେ ଥିବା ନିଜ ରୁମକୁ ଫେରୁଥିଲେ । ଠିକ୍ ସେହି ସମୟରେ ଲାଗି ଯାଇଥିଲା ନିଆଁ । ଏହାଦେଖି ରୁମରେ ଶୋଇଥିବା ଅନ୍ୟ ସାଥୀଙ୍କୁ ଜହୁର ନିଦରୁ ଉଠାଇବାକୁ ଚେଷ୍ଟା କରିଥିଲେ ।
ତେବେ କେଇ ଜଣ ୬ ମହଲା ଉପରକୁ ଦୌଡ଼ିଯାଇ ଜୀବନ ବଞ୍ଚାଇଥିଲେ ସତ, କିନ୍ତୁ ପ୍ରବଳ ଧୂଆଁରେ ରୁନ୍ଧି ହୋଇ ଜହୁର ଜୀବନ ହରାଇଥିବା ପରିବାର ଲୋକେ କହିଛନ୍ତି । ଭୟାବହ ନିଆଁରେ ଜଳିପୋଡ଼ି ଯାଇଛି ସେଇ ୬ ମହଲା ଅଭିଶପ୍ତ କୋଠା । କାନ୍ଥରେ ଥିବା ଧୂଆଁ ଓ ନିଆଁର କଳାଦାଗ ବଖାଣୁଛି ସେଦିନର ବିଭୀଷିକା ।
କୋଠାରେ ଖୁନ୍ଦାଖୁନ୍ଦି ହୋଇ ରହୁଥିଲେ ପ୍ରାୟ ୨ ଶହ ଶ୍ରମିକ । ଯେଉଁଠି ନିଆଁ ଲିଭାଉ ଲିଭାଉ କେଇ ଘଣ୍ଟା ଭିତରେ ଚାଲିଗଲା ୪୫ ଭାରତୀୟଙ୍କ ସହ ୪୯ ଅମୂଲ୍ୟ ଜୀବନ । ମୃତ ଭାରତୀୟଙ୍କ ମଧ୍ୟରୁ ଅଧିକାଂଶ କେରଳର । ତେଣୁ ସମସ୍ତ ଭାରତୀୟଙ୍କ ମୃତଦେହକୁ ଧରି କୋଚିନ୍ ବିମାନବନ୍ଦରରେ ପହଞ୍ଚିଥିଲା ବାୟୁସେନାର ସ୍ୱତନ୍ତ୍ର ବିମାନ C-130J ।
ସେଠାରେ ମୃତକଙ୍କୁ କେରଳ ମୁଖ୍ୟମନ୍ତ୍ରୀ ଶ୍ରଦ୍ଧାଞ୍ଜଳି ଜଣାଇବା ପରେ ଅନ୍ୟ ମୃତଦେହ ଗୁଡ଼ିକୁ ସେମାନଙ୍କ ରାଜ୍ୟକୁ ପଠାଯାଇଛି । ଚିହ୍ନଟ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ନଚେତ ଡିଏନଏ ଟେଷ୍ଟ କରିବାକୁ ପଡ଼ିବ । ଏହି ଅଘଟଣକୁ ନେଇ ଶୋକବ୍ୟକ୍ତ କରି ବୁଧବାର ବୈଦେଶିକ ମନ୍ତ୍ରାଳୟ ସହ ଉଚ୍ଚସ୍ତରୀୟ ସମୀକ୍ଷା କରିଥିଲେ ପ୍ରଧାନମନ୍ତ୍ରୀ ।
ତା’ସହ ମୃତକଙ୍କ ପରିବାରକୁ ପିଏମ୍ ରିଲିଫ ଫଣ୍ଡରୁ ୨ ଲକ୍ଷ ଲେଖାଏଁ ଅନୁକମ୍ପା ରାଶି ଦେବାକୁ ମୋଦି ଘୋଷଣା କରିଥିଲେ । ଏପଟେ ୨ ଓଡ଼ିଆଙ୍କ ମୃତ୍ୟୁରେ ଶୋକ ପ୍ରକାଶ କରିବା ସହ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
- Reported by:
- NILAKANTHA DORA , Pitabasa Das
