Boeing Jet: ବୋଇଂ ବିମାନରେ ଲାଗିଲା ନିଆଁ, ଟେକ୍ ଅଫ୍ ବେଳେ ଅଗ୍ନିକାଣ୍ଡ

ଆମେରିକାର ଡେନଭର ଆନ୍ତର୍ଜାତିକ ବିମାନବନ୍ଦରରେ ଶନିବାର ଦିନ ଆମେରିକାନ ଏୟାରଲାଇନ୍ସର ବୋଇଙ୍ଗ 737 ମାକ୍ସ 8 ବିମାନରେ ନିଆଁ ଲାଗି ଯାଇଛି। ଟେକ ଅଫ ବେଳେ ରନ ୱେରେ ଲ୍ୟାଣ୍ଡିଂ ଗିୟର ଫେଲ ହେବାରୁ ବିମାନରେ ନିଆଁ ଲାଗି ଯାଇଥିଲା। ଏହା ପରେ ବିମାନ ଟେକ ଅଫ ବାତିଲ କରିଥିଲା। ଯାତ୍ରୀମାନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା। ଜଣେ ଆହତ ହୋଇଛନ୍ତି। ନିଆଁ ଲାଗି ବିମାନରୁ ଧୂଆଁ ବାହାରୁଥିବା ଦେଖା ଯାଇଥିଲା। ବାମ ପାର୍ଶ୍ବ ଚକା ପାଖରେ ନିଆଁ ଲାଗି ଯାଇଥିଲା। ମିଆମିକୁ ଯାଉଥିବା ଫ୍ଲାଇଟ 3023 ନାମକ ଏହି ବିମାନରେ ୧୭୩ ଜଣ ଯାତ୍ରୀ ଓ ୬ ଜଣ କ୍ରୁ ସଦସ୍ୟ ଥିଲେ। ଶନିବାର ଅପରାହ୍ନରେ ଏହି ଯାନ୍ତ୍ରିକ ସମସ୍ୟା ଦେଖାଦେଇଥିଲା।

ଫେଡେରାଲ ଏଭିଏସନ ଆଡମିନିଷ୍ଟ୍ରେସନ (FAA) ଅନୁଯାୟୀ, ବିମାନଟି ଟେକଅଫ ସମୟରେ ଲ୍ୟାଣ୍ଡିଂ ଗିୟରରେ ସମ୍ଭାବ୍ୟ ତ୍ରୁଟି ରିପୋର୍ଟ କରିଥିଲା ଏବଂ ଟେକଅଫ ବାତିଲ କରିବାକୁ ବାଧ୍ୟ ହୋଇଥିଲା। ଯାତ୍ରୀମାନଙ୍କୁ ରନୱେ ଉପରେ ଇନଫ୍ଲାଟେବଲ ଇମରଜେନ୍ସି ସ୍ଲାଇଡ ବ୍ୟବହାର କରି ଉଦ୍ଧାର କରାଯାଇଥିଲା। FAA ଏହି ଘଟଣାର ତଦନ୍ତ କରୁଛି ବୋଲି ନିଶ୍ଚିତ କରିଛି।

ଘଟଣାସ୍ଥଳରୁ ପ୍ରାପ୍ତ ଭିଡିଓ ଫୁଟେଜରେ ଯାତ୍ରୀମାନେ ଇମରଜେନ୍ସି ସ୍ଲାଇଡ ଦେଇ ତଳକୁ ଖସୁଥିବା ଦେଖାଯାଇଥିଲା। ଯାତ୍ରୀଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା। ଡେନଭର ଫାୟାର ଡିପାର୍ଟମେଣ୍ଟ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଏୟାରଲାଇନ ସ୍ପଷ୍ଟ କରିଛି ଯେ ଯାତ୍ରୀମାନେ ଦିନରେ ପରେ ଏକ ବିକଳ୍ପ ବିମାନରେ ମିଆମି ଅଭିମୁଖେ ଯାତ୍ରା ଜାରି ରଖିବେ।

ଅଧିକ ପଢ଼ନ୍ତୁ: ସ୍କୁଲ ଉପରେ ଖସିଲା ବିମାନ, ଦୁର୍ଘଟଣା ପରେ ହୁତୁହୁତୁ ହୋଇ ଜଳିଲା, କ୍ୟାମ୍ପସରେ ଥିଲେ ଅନେକ ପିଲା