ବାହାନଗା ଟ୍ରେନ୍ ଦୁର୍ଘଟଣାରେ ଭୁବନେଶ୍ବରକୁ ଅଣାଯାଇଥିବା ମୋଟ ୧୯୩ ଶବ ମଧ୍ୟରୁ ୧୧୧ଟି ପରିବାର ଲୋକଙ୍କୁ ହସ୍ତାନ୍ତର କରାଯାଇସାରିଲାଣି। ଆହୁରି ୮୨ଟି ମୃତଦେହ ଏବେ ବି ଭୁବନେଶ୍ବର ଏମସରେ ରହିଛି । ରହିଥିବା ମୃତଦେହ ଗୁଡିକ ଟିହ୍ନଟ ହୋଇପାରିନି ।
Also Read
ଶବ ଗୁଡ଼ିକ ଭୁବନେଶ୍ବର ଏମସରେ ସ୍ବତନ୍ତ୍ର କଣ୍ଟେନରରେ ରଖାଯାଇଛି । କାହାର ଶବ ଚିହ୍ନଟ ହୋଇଛି, କାହାର ଚିହ୍ନଟରେ ସମସ୍ୟା ଥିବାରୁ ଡିଏନଏ ପରୀକ୍ଷା କରାଯାଉଛି । ଏମସ ପରିସରରେ ଏବେ ଶବ ଖୋଜିବାକୁ ବନ୍ଧୁ ପରିଜନଙ୍କ ଭିଡ଼ ଲାଗୁଛି । ମୃତଦେହ ଚିହ୍ନଟ ଲାଗି ଗତକାଲି ୩୫ଟି ସାମ୍ପୁଲ ଡିଏନଏ ଟେଷ୍ଟ ପାଇଁ ପଠାଯାଇଛି।
ଅଧିକ ପଢ଼ନ୍ତୁ: ସବୁ ମୃତଦେହ ଭୁବନେଶ୍ୱର AIIMSରେ ଥିବା କଣ୍ଟେନରରେ ରହିଛି
ସେପଟେ ବାହାନଗାରେ ଭୟଙ୍କର ରେଳ ଦୁର୍ଘଟଣା ପଛରେ ଅଛି କେଉଁ କାରଣ ? ତାକୁ ନେଇ ଖୋଳତାଡ଼ କରୁଛି ସିବିଆଇ । ଆଜି ସିବିଆଇ ତଦନ୍ତର ତୃତୀୟ ଦିନ । ଆଜି ସିବିଆଇର ଏକ ଟିମ ଭୁବନେଶ୍ବର ଆସି ଦୁର୍ଘଟଣାଗ୍ରସ୍ତ ଟ୍ରେନ୍ ଲୋକୋ ପାଇଲଟ ସହ କିଛି ଅଧିକାରୀଙ୍କୁ ମଧ୍ୟ ପଚରାଉଚରା କରିପାରେ । ସିବିଆଇର ଆଉ ଏକ ଟିମ ଘଟଣାସ୍ଥଳ ଓ ଷ୍ଟେସନରେ କରିବ ତନାଘନା ।
ଗତକାଲି ସେଣ୍ଟ୍ରାଲ ଫରେନ୍ସିକ୍ ଟିମ୍ ଓ ଟେକନିକାଲ ଟିମ ସଦସ୍ୟଙ୍କୁ ଧରି ଦୁର୍ଘଟଣାସ୍ଥଳ ଷ୍ଟେସନ୍ ବଜାରରେ ଛାନଭିନ୍ କରିଥିଲା ସିବିଆଇ ଟିମ୍। ରେଲୱେ ଟ୍ରାକ୍, ରିଲେ ରୁମ ଓ ଷ୍ଟେସନ ମାଷ୍ଟରଙ୍କ ପ୍ୟାନେଲ୍ ବୋର୍ଡ ତନଖି କରିବା ସହ କିଛି କର୍ମଚାରୀଙ୍କୁ ପଚରାଉଚରା କରାଯାଇଥିଲା ।
ବାହାନଗା ଷ୍ଟେସନ୍ ମାଷ୍ଟର, ଷ୍ଟେସନ୍ ମ୍ୟାନେଜର, ରିଲେ ରୁମର ସିଗନାଲ ମେଣ୍ଟରଙ୍କ ସମେତଙ୍କୁ ମଧ୍ୟ ଗୁଡ଼େଇ ତୁଡ଼େଇ ପଚରା ଉଚରା କରିଥିଲା ସିବିଆଇ । ଏଥିସହ ଦୁର୍ଘଟଣା ଦିନ ଯେଉଁ ଯେଉଁ କର୍ମଚାରୀ ମାନେ ଦାୟିତ୍ବରେ ଥିଲେ ସେମାନଙ୍କର ଫୋନ୍ ସିଜ୍ କରାଯିବା ସହ କଲ ରେକର୍ଡ ଓ ହ୍ବାଟସଆପ୍ ଚାଟିଂ ମଧ୍ୟ ଯାଞ୍ଚ କରାଯାଉଥିବା ସୂଚନା ମିଳିଛି।