ବିଲ୍‌ଡିଂରେ ଭୟଙ୍କର ଅଗ୍ନିକାଣ୍ଡ: ଚାହୁଁ ଚାହୁଁ ଜଳଗିଲେ ୧୬ ଜଣ, ମୃତକଙ୍କ ମଧ୍ୟରେ ଅଛନ୍ତି ଭାରତୀୟ

ୟୁଏଇର ଦୁବାଇ ସ୍ଥିତ ଏକ ଆବାସିକ ବିଲ୍‌ଡିଂରେ ନିଆଁ ଲାଗି ୧୬ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏଥିରେ ୯ ଜଣ ଗୁରୁତର ହୋଇ ହସ୍ପିଟାଲ୍‌ରେ ଭର୍ତ୍ତି ହୋଇଛନ୍ତି। ମୃତକଙ୍କ ମଧ୍ୟରେ ୪ ଭାରତୀୟ ଅଛନ୍ତି। ସେମାନେ କେରଳ ମାଲପ୍ପୁରମ୍‌ର ୩୮ ବର୍ଷୀୟ ରିଜେଶ ଓ ତାଙ୍କ ପତ୍ନୀ ଜିଶି, ତାମିଲନାଡୁର ଅବଦୁଲ୍‌ କାଦର ଓ ସାଲିୟାକୁଣ୍ଡ ବୋଲି ଜଣାପଡ଼ିଛି। 

ମିଳିଥିବା ସୂଚନା ଅନୁସାରେ,  ଶନିବାର ଦିନ ଦୁବାଇର ଅଲ୍‌ ରାସ ଅଞ୍ଚଳରେ ଏକ  ଆବାସିକ ବିଲ୍‌ଡିଂରେ ନିଆଁ ଲାଗି ଯାଇଥିଲା। ଏଠାରେ ମସଲା ବଜାର ପଡ଼ୁଥିବାରୁ ଲୋକଙ୍କ ଭିଡ଼ ଜମିଥାଏ। ତେବେ ଅଗ୍ନିକାଣ୍ଡର ପ୍ରକୃତ କାରଣ ଜଣାପଡ଼ିନି। ୫ ମହଲା ବିଶିଷ୍ଟ ଆପାର୍ଟମେଣ୍ଟରେ କୌଣସି ସମସ୍ୟା ଯୋଗୁ ନିଆଁ ଲାଗି ଯାଇଥିବା ଜଣାପଡ଼ିଛି। ସୁରକ୍ଷା ଦୃଷ୍ଟିରେ ମୃତାହତଙ୍କୁ ଉଦ୍ଧାର ପରେ ବିଲ୍‌ଡିଂକୁ ସିଲ୍‌ କରି ଦିଆଯାଇଛି। 

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ସର୍ବପ୍ରଥମେ ଏସିରୁ ନିଆଁ ବାହାରୁଥିବା ଦେଖିବାକୁ ମିଳିଥିଲା। ଏହାର ମାତ୍ର କିଛି ମିନିଟ୍‌ ପରେ ଜୋରଦାର ବିସ୍ଫୋରଣର ଶବ୍ଦ ଶୁଣିବାକୁ ମିଳିଥିଲା। ଏହାପରେ ଚାହୁଁ ଚାହୁଁ ଚାରିଆଡ଼େ ନିଆଁ ବ୍ୟାପି ଯାଇଥିଲା।