LIVE TV
ନେପାଳରେ ମେକ୍ସିକୋର ପାଞ୍ଚ ଜଣ ନାଗରିକଙ୍କ ସମେତ ଛଅ ଜଣ ଲୋକଙ୍କୁ ନେଇ ଯାଉଥିବା ଏକ ଘରୋଇ ବ୍ୟବସାୟିକ ହେଲିକପ୍ଟର ମଙ୍ଗଳବାର ଦିନ ଦେଶର ପୂର୍ବ ପାର୍ବତ୍ୟ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଛି । ଏହି ଦୁର୍ଘଟଣାରେ ହେଲିକପ୍ଟରରେ ସବାର ଥିବା ସମସ୍ତ ଛଅ ଜଣଙ୍କର ମୃତ୍ୟୁ ହୋଇଛି । ଦୁର୍ଘଟଣାସ୍ଥଳରୁ ଏବେ ସୁଦ୍ଧା ପାଞ୍ଚ ଜଣଙ୍କର ମୃତଦେହ ଉଦ୍ଧାର କରାଯାଇଛି ।
ସକାଳ ପ୍ରାୟ ୧୦ଟା ୧୫ମିନିଟରେ ହେଲିକପ୍ଟର ସହ ଯୋଗାଯୋଗ ବିଚ୍ଛିନ୍ନ ହୋଇ ଯାଇଥିଲା ଓ ତାହା ନିଖୋଜ ହୋଇ ଯାଇଥିଲା । ହେଲିକପ୍ଟରଟି କାଠମାଣ୍ଡୁରୁ ସୋଲୁଖୁମ୍ବୁକୁ ଯାଉଥିବା ବେଳେ ନିଖୋଜ ହୋଇଯାଇଥିଲା । ଖୋଜାଖୋଜି ପରେ ହେଲିକପ୍ଟର ଧ୍ୱଂସାବଶେଷ ମିଳିଛି । ହେଲେ ପରିତାପର ବିଷୟ ସମସ୍ତ ୬ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ହେଲିକପ୍ଟରଟି କାଠମାଣ୍ଡୁର ମ୍ୟାନେଜ ଏୟାରଲାଇନ୍ସର ହେଲିକପ୍ଟର ବୋଲି ଜଣାଯାଇଛି । ଏହି ଏୟାରଲାଇନ୍ସ ସଂସ୍ଥା ଦେଶରେ ଭଡ଼ାରେ ହେଲିକପ୍ଟର ଯୋଗାଇଥାଏ ।
Also Read
ନେପାଳ ଏୟାରପୋର୍ଟର ଜଣେ ବରିଷ୍ଠ ଅଧିକାରୀ କହିଛନ୍ତି, ସୁଦୂର ପାର୍ବତ୍ୟ ସୋଲୁଖମ୍ବୁ ଜିଲ୍ଲାର ଲିକେପିଖେ ଗ୍ରାମୀଣ ନଗରପାଳିକାର ଲାମଜୁରା ଅଞ୍ଚଳରେ ଏହି ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଛି । ଏପର୍ଯ୍ୟନ୍ତ ବିସ୍ତୃତ ରିପୋର୍ଟ ମିଳି ପାରିନାହିଁ । ହେଲିକପ୍ଟର ପ୍ରଚଣ୍ଡ ବିସ୍ଫୋରଣ ପରେ ଦୁର୍ଘଟଣାଗ୍ରସ୍ତ ହୋଇଥିବା ସ୍ଥାନୀୟ ଲୋକ ସୂଚନା ଦେଇଛନ୍ତି ।
