Building Collapses: ବିଳମ୍ବିତ ରାତିରେ ଭୁଶୁଡିଲା ବିଲ୍ଡିଂ; ୧୫ ମୃତ, ଭଗ୍ନାବଶେଷ ତଳେ ଖୋଜା ଚାଲିଛି ଜୀବନ

ବୁଧବାର ବିଳମ୍ବିତ ରାତିରେ ମହାରାଷ୍ଟ୍ର ବୀରାରର ଏକ ଅନଧିକୃତ ଚାରି ମହଲା କୋଠା ଭୁଶୁଡ଼ି ପଡ଼ିବା ଫଳରେ ଅତି କମରେ ୧୫ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଲୋକ ଫସି ରହିଥିବା ଆଶଙ୍କା କରାଯାଉଛି, ଅଧିକାରୀମାନେ କହିଛନ୍ତି। ଏହି ଘଟଣାରେ ମୃତକଙ୍କ ମଧ୍ୟରେ ଜଣେ ମହିଳା ଏବଂ ତାଙ୍କ ଏକ ବର୍ଷର ଝିଅ ଅଛନ୍ତି। ଏଥିରେ ଛଅ ଜଣ ଗୁରୁତର ଆହତ ହୋଇଛନ୍ତି।

ଭାସାଇ ବୀରାର ମ୍ୟୁନିସିପାଲ କର୍ପୋରେସନ (VVMC) ଦ୍ୱାରା 'ଅବୈଧ' ଘୋଷିତ ଏହି କୋଠାଟି ରାତି ୧୨.୦୫ ସମୟରେ ଭୁଶୁଡ଼ି ପଡ଼ିଥିଲା। ଉଦ୍ଧାର କାର୍ଯ୍ୟ ଜାରି ରହିଛି। ଜାତୀୟ ବିପର୍ଯ୍ୟୟ ପ୍ରତିକ୍ରିୟା ବାହିନୀ ୟୁନିଟ୍ ଏବଂ ଅନ୍ୟାନ୍ୟ ଉଦ୍ଧାରକାରୀ ଟିମ୍ ସହ ଉଦ୍ଧାର କାର୍ଯ୍ୟ ଜାରି ରହିଛି। ଭାରୀ ଯନ୍ତ୍ରପାତି ସାହାଯ୍ୟରେ ଭଗ୍ନାବଶେଷ ସଫା କରାଯାଇଛି।

ଜିଲ୍ଲା କଲେକ୍ଟର ଇନ୍ଦୁ ରାଣୀ ଜାଖର ନିଶ୍ଚିତ କରିଛନ୍ତି ଯେ କିଛି ଲୋକ ଏବେ ବି ଭଗ୍ନାବଶେଷ ତଳେ ଫସି ରହିପାରନ୍ତି। ବିଲ୍ଡିଂ ଭୁଶୁଡ଼ି ପଡ଼ିବା ଫଳରେ ଅନେକ ପରିବାର ବାସହୀନ ହୋଇପଡ଼ିଛନ୍ତି, ସମସ୍ତଙ୍କୁ ଚନ୍ଦନସାର ସମାଜମନ୍ଦିରକୁ ସ୍ଥାନାନ୍ତରିତ କରାଯାଇଛି। ସେମାନଙ୍କୁ ଖାଦ୍ୟ, ପାଣି ଏବଂ ଚିକିତ୍ସା ସହାୟତା ଯୋଗାଇ ଦିଆଯାଇଛି।

କର୍ତ୍ତୃପକ୍ଷ ଏପର୍ଯ୍ୟନ୍ତ ସାତ ଜଣଙ୍କୁ ଚିହ୍ନଟ କରିଛନ୍ତି, ଯେଉଁଥିରେ ଆରୋହୀ ଓମକାର ଜୋଭିଲ (୨୪), ତାଙ୍କ ଝିଅ ଉତ୍କର୍ଷ (୧), ଲକ୍ଷ୍ମଣ କିସ୍କୁ ସିଂହ (୨୬), ଦିନେଶ ପ୍ରକାଶ ସପକାଲ (୪୩), ସୁପ୍ରିୟା ନିଭାଲକର (୩୮), ଅର୍ଣ୍ଣବ ନିଭାଲକର (୧୧) ଏବଂ ପାର୍ବତୀ ସପକାଲ ରହିଛନ୍ତି। କିଛି ମୃତଦେହକୁ ଭଗ୍ନାବଶେଷରୁ ବାହାର କରାଯାଇଥିଲା। ଏବଂ ଅନ୍ୟମାନେ ସ୍ଥାନୀୟ ଡାକ୍ତରଖାନାରେ ଚିକିତ୍ସା ସମୟରେ ମୃତ୍ୟୁବରଣ କରିଥିଲେ

କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, ଦୁର୍ଘଟଣାସ୍ଥଳରେ ମୋଟ ୫୦ଟି ଫ୍ଲାଟ୍ ଏବଂ ୧୨ଟି ଆପାର୍ଟମେଣ୍ଟ ରହିଛି। ଯଦିଓ ଅନ୍ୟ ବିଲ୍ଡିଂ ଗୁଡିକର କିଛି କ୍ଷୟକ୍ଷତି ହୋଇ ନଥିଲା, ତଥାପି ସତର୍କତାମୂଳକ ପଦକ୍ଷେପ ସ୍ୱରୂପ ଭୁଶୁଡି ପଡିଥିବା ବିଲ୍ଡିଂର ନିକଟରେ ଥିବା ଅନ୍ୟ ବିଲ୍ଡିଂର ବାସିନ୍ଦାମାନଙ୍କୁ ଖାଲି କରାଯାଇଥିଲା।

ତେବେ ଏହି ବିଲ୍ଡିଂର ବିଲଡର ନିତାଲ ଗୋପୀନାଥ ସାନେଙ୍କ ବିରୁଦ୍ଧରେ ଅଭିଯୋଗ କରିବା ପରେ ପୋଲିସ ତାଙ୍କୁ ଗିରଫ କରିଛି। ଜମି ମାଲିକଙ୍କ ବିରୁଦ୍ଧରେ ମଧ୍ୟ ଏକ ମାମଲା ରୁଜୁ କରାଯାଇଛି। ଅଧିକାରୀଙ୍କ ଅନୁଯାୟୀ, ଏହି କୋଠାଟି ୨୦୦୮ ରୁ ୨୦୦୯ ମଧ୍ୟରେ ନିର୍ମାଣ ହୋଇଥିଲା। ଏଥିରେ ୫୪ଟି ଫ୍ଲାଟ ଏବଂ ଚାରୋଟି ଦୋକାନ ଘର ଥିଲା।

ଅଧିକ ପଢ଼ନ୍ତୁ: ବୈଷ୍ଣୋ ଦେବୀ ମାର୍ଗରେ ବଡ଼ ଭୂସ୍ଖଳନରେ ୫ ଜଣଙ୍କ ମୃତ୍ୟୁ, ୧୪ ଆହତ