Three Sisters Die: ଭାରତରେ ଘର, କୋରିଆନ୍ ହେବାକୁ ପାଗଳ: ଶେଷରେ ସୁଇସାଇଡ୍

ଭାରତରେ ଘର, କୋରିଆନ୍ ହେବାକୁ ପାଗଳ । ୩ ନାବାଳିକା ଭଉଣୀଙ୍କୁ ଘାରିଥିଲା କୋରିଆନ୍ ହେବା ନିଶା । ପୂରଣ ହେଲାନି ଇଚ୍ଛା, ଶେଷରେ ସୁଇସାଇଡ୍ । ଉତ୍ତରପ୍ରଦେଶ ଗାଜିଆବାଦରେ ଘଟିଥିବା ଏପରି ଏକ ଘଟଣା ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି ।

କୁହାଯାଉଛି, କୋରିଆର କେ.ପୋପ୍ ଧର୍ମ ଆପଣାଇବାକୁ ଏକା ସଙ୍ଗେ ତିନି ଜଣ ଭଉଣୀ ଆତ୍ମହତ୍ୟା କରିଛନ୍ତି ।  ଏନେଇ ପୋଲିସ ମଧ୍ୟ ତଦନ୍ତ କରିବା ବେଳେ ସୁଇସାଇଡ୍ ନୋଟ୍ ଜବତ କରିଛି । ଆଉ ସେ ଶେଷ ଚିଠିରେ ଲେଖାଥିବା କିଛି କଥା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

ସୁଇସାଇଡ୍ ନୋଟରେ ଲେଖା ରହିଛି, କୋରିଆନ୍ ପୋପ୍ ସଂସ୍କୃତି ପ୍ରତି ଆମର ଯଥେଷ୍ଟ ଭଲପାଇବା ଅଛି । କୋରିଆନଙ୍କ କାମ, ସେମାନଙ୍କ ସଂସ୍କୃତି ଏବଂ ମନୋରଞ୍ଜନ ଭିତ୍ତିକ କାର୍ଯ୍ୟକ୍ରମ ଆମକୁ ବହୁତ ଭଲ ଲାଗୁଛି । ଖାଲି ଏତିକି ନୁହେଁ, କୋରିଆର ଅଭିନେତା ଓ ଅଭିନେତ୍ରୀଙ୍କୁ ମଧ୍ୟ ସେମାନେ ଭୁରି ଭୁରି ପ୍ରଶଂସା କରିଛନ୍ତି ।

ଏମିତି ସେମାନଙ୍କ ଜୀବନର କେନ୍ଦ୍ର ବିନ୍ଦୁ ଭାବେ କୋରିଆର କଳାକାରଙ୍କୁ ସେମାନେ ବର୍ଣ୍ଣନା କରିଥିବା ସୁଇସାଇଟ୍ ନୋଟରେ ଲେଖିଥିବା ପୋଲିସ କହିଛି । ଏହା ବ୍ୟତୀତ ପୋଲିସ ଆହୁରି କହିଛି, ସେମାନଙ୍କ ନିକଟରୁ ମିଳିଥିବା ସୁଇସାଇଡ୍ ନୋଟ୍ ଅନେକ ପୃଷ୍ଠାର । ସୁଇସାଇଡ୍ ନୋଟରେ କୋରିଆର କେ.ପୋପ୍ ଧର୍ମ ଏବଂ ଚାଲିଚଳନ ସେମାନଙ୍କ ଜୀବନ ପାଇଁ ବେଶ୍ ଗରୁତ୍ବପୂର୍ଣ୍ଣ ଥିବା ସେ ଦର୍ଶାଇଥିବା ପୋଲିସ କହିଛି । 

ପରିବାର ଲୋକଙ୍କ କହିବା କଥା, କରୋନା ସମୟରୁ ୩ ଭଉଣୀ ଅନଲାଇନ ଗେମ୍ ଖେଳୁଥିଲେ । ଗେମରେ ଏତେ ମଜିଯାଉଥିଲେ ଯେ ନିୟମିତ ସ୍କୁଲ ବି ଯାଉନଥିଲେ । ତେଣୁ ଘରଲୋକ ଗେମ୍ ଖେଳକୁ ବିରୋଧ କରୁଥିଲେ । ମଙ୍ଗଳବାର ରାତି ପାଖାପାଖି ସାଢେ ୨ଟା ସମୟରେ ୩ ଭଉଣୀ ଏକାସାଙ୍ଗେ ୯ ମହଲାରୁ ଡେଇଁ ଆତ୍ମହତ୍ୟା କରିଛନ୍ତି ।

ଏ ସମ୍ପର୍କରେ ପୋଲିସର କହିବା କଥା, କୋରିଆନ ଗେମ୍ ଏକ ଟାସ୍କ ବେସଡ୍ ଗେମ୍, ସେଥିରେ ମୋଟ ୫୦ଟି ଟାସ୍କ ଥାଏ । ଫେବ୍ରୁଆରୀ ୩ ଅର୍ଥାତ୍ ଗତାକଲି ଗେମ୍‌ର ଶେଷ ଟାସ୍କ ଥିଲା । ୧୪ ବର୍ଷର ମଝିଆ ଝିଅ ଗେମ୍ ଲିଡର ଥିଲା ଓ ସେ ହିଁ କମାଣ୍ଡ ଦେଉଥିଲା । ସମସ୍ତ ତିନି ଭଉଣୀ ସବୁ ଟାସ୍କ ଏକାଠି କରୁଥିଲେ । ତେଣୁ ଟାସ୍କ ପୂରା କରିବାକୁ ଯାଇ ତିନି ଜଣ ଯାକ ଆତ୍ମହତ୍ୟା କରିଥିବାର ବି ସନ୍ଦେହ କରାଯାଉଛି । ହେଲେ ଏ ଯାଏଁ ଏହାର ପ୍ରକୃତ କାରଣ ଜଣାପଡିନି ।

ଅନଲାଇନ ଗେମ୍‌ ଯୋଗୁଁ ଜୀବନ ଯିବାର ଏହା ପ୍ରଥମ ଘଟଣା ନୁହେଁ । ସରକାର ଦେଶରେ ସମସ୍ତ ଟଙ୍କା ଲଗାଣକାରୀ ଅନଲାଇନ ଗେମ୍ ବ୍ୟାନ୍ କରିଛନ୍ତି । ଏପରି ଗେମିଂ ଆପ୍‌ର ବିଜ୍ଞାପନ କଲେ ୨ ବର୍ଷ ଯାଏ ଜେଲ ଓ ୫୦ ଲକ୍ଷ ଟଙ୍କା ଯାଏ ଜୋରିମାନା ନିୟମ ବି ରହିଛି । ତଥାପି ଏହି ଗେମିଂ ନିଶାରୁ ବର୍ତ୍ତି ପାରୁନାହାନ୍ତି ଯୁବପିଢି ।