SC Says No More Relief: ଜଷ୍ଟିସ ଯଶୋବନ୍ତ ବର୍ମାଙ୍କ ଆବେଦନ ସୁପ୍ରିମକୋର୍ଟରେ ଖାରଜ, ଆଉ ତ୍ରାହି ନାହିଁ !

ନଗଦ କ୍ୟାସ୍ ଦୁର୍ନୀତି ମାମଲାରେ ଜଷ୍ଟିସ୍ ଯଶୋବନ୍ତ ବର୍ମାଙ୍କୁ ଏକ ବଡ଼ ଝଟକା ଲାଗିଛି। ଲୋକସଭା ବାଚସ୍ପତିଙ୍କ ଦ୍ୱାରା ଗଠିତ କମିଟିକୁ ଚ୍ୟାଲେଞ୍ଜ କରି ସେ କରିଥିବା ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି। ଏହି ନିଷ୍ପତ୍ତି ପରେ ଜଷ୍ଟିସ୍ ବର୍ମାଙ୍କୁ ହଟାଇବା ପାଇଁ ପ୍ରକ୍ରିୟା ଏବେ ଆଗକୁ ବଢ଼ିବ। ଜଷ୍ଟିସ୍ ବର୍ମା ଲୋକସଭା ବାଚସ୍ପତିଙ୍କ ଦ୍ୱାରା ଗଠିତ ତିନି ସଦସ୍ୟ ବିଶିଷ୍ଟ କମିଟିର ବୈଧତାକୁ ଚ୍ୟାଲେଞ୍ଜ କରିଥିଲେ। 

ଗତ ଶୁଣାଣିରେ ସୁପ୍ରିମକୋର୍ଟ ଜାନୁଆରୀ ୧୨ ତାରିଖରେ ଲୋକସଭା ବାଚସ୍ପତିଙ୍କ ଦ୍ୱାରା ଗଠିତ କମିଟି ସମ୍ମୁଖରେ ହାଜର ହେବାକୁ ଜଷ୍ଟିସ୍ ବର୍ମାଙ୍କୁ ନିର୍ଦ୍ଦେଶ ଦେଇଥିଲେ। ସୁପ୍ରିମକୋର୍ଟ କମିଟି ଗଠନରେ ପ୍ରକ୍ରିୟାଗତ ତ୍ରୁଟିକୁ ସ୍ୱୀକାର କରିଥିଲେ, କିନ୍ତୁ ଏହା ମଧ୍ୟ ପ୍ରଶ୍ନ କରିଥିଲେ ଯେ ଏହି ତ୍ରୁଟିଗୁଡ଼ିକ ଏତେ ଗମ୍ଭୀର କି ଯାହା ତାଙ୍କ ହସ୍ତକ୍ଷେପ ପାଇଁ ଜରୁରୀ ? 

ସୁପ୍ରିମକୋର୍ଟ ଜଷ୍ଟିସ୍ ବର୍ମାଙ୍କ ଆବେଦନକୁ ଖାରଜ କରି କହିଛନ୍ତି ଯେ ଜଷ୍ଟିସ୍ ବର୍ମା ରାଜ୍ୟସଭା ଉପାଧ୍ୟକ୍ଷଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିବା ବିରୋଧରେ ଚ୍ୟାଲେଞ୍ଜ କରିନାହାଁନ୍ତି। ଲୋକସଭା ବାଚସ୍ପତି ଏବଂ ରାଜ୍ୟସଭା ଅଧ୍ୟକ୍ଷ ଉଭୟ ପ୍ରସ୍ତାବକୁ ପାସ୍ କରିନାହାଁନ୍ତି, ତେଣୁ ଏକ ମିଳିତ କମିଟି ଗଠନ ସମ୍ଭବ ନୁହେଁ।

ଜଷ୍ଟିସ୍ ବର୍ମାଙ୍କ ଆପତ୍ତି କ’ଣ ଥିଲା?

ଜଷ୍ଟିସ୍ ବର୍ମା ଲୋକସଭା ବାଚସ୍ପତିଙ୍କ ଦ୍ୱାରା ଗଠିତ ତିନି ସଦସ୍ୟ ବିଶିଷ୍ଟ କମିଟିକୁ ଚ୍ୟାଲେଞ୍ଜ କରିଥିଲେ। ସେ ଯୁକ୍ତି ଦେଇଥିଲେ ଯେ ବିଚାରପତି (ତଦନ୍ତ) ଆଇନ, 1968 ରେ ଲିଖିତ ଥିବା ପ୍ରକ୍ରିୟା ଅନୁସରଣ କରାଯାଇ ନାହିଁ। ଲୋକସଭା ଏବଂ ରାଜ୍ୟସଭା ଉଭୟ ଗୃହରେ ମହାଭିଯୋଗ ନୋଟିସ୍ ପ୍ରଦାନ କରାଯିବା ସତ୍ତ୍ୱେ, ବାଚସ୍ପତି ରାଜ୍ୟସଭାର ଅଧ୍ୟକ୍ଷଙ୍କ ସହ ପରାମର୍ଶ ନକରି କମିଟି ଗଠନ କରିଥିଲେ।  

ଦିଲ୍ଲୀ ହାଇକୋର୍ଟ ବିଚାରପତି ଥିବା ସମୟରେ ଜଷ୍ଟିସ ବର୍ମାଙ୍କ ସରକାରୀ ବାସଭବନରେ ଅଚାନକ ନିଆଁ ଲାଗିଯାଥିଲା । ଅଗ୍ନିଶମ ବାହିନୀ ନିଆଁ ଲିଭାଇବା ସମୟରେ ଗୋଟିଏ ରୁମରୁ ବିପୁଳ ପରିମାଣର ନଗଦ ଟଙ୍କା ମିଳିଥିଲା । ଏହା ପରେ ତାଙ୍କୁ ବଦଳି କରି ଦିଆଯାଇଥିଲା ।