Pakistan Bombs Own Citizens: ଛଟପଟ ହୋଇ ମରିଗଲେ ୩୦ରୁ ଅଧିକ ପାକିସ୍ତାନୀ, ଆକାଶମାର୍ଗରୁ ଘନ ଘନ ମିସାଇଲ୍ ମାଡ଼

ନିଜ ନାଗରିକଙ୍କ ଜୀବନ ନେଲା ପାକିସ୍ତାନ। ଖାଇବର ପଖତୁନଖ୍ୱା ପ୍ରଦେଶରେ ପାକିସ୍ତାନୀ ଏୟାର ଫୋର୍ସର ଯୁଦ୍ଧବିମାନ ଦ୍ୱାରା ପ୍ରବଳ ବୋମା ମାଡ଼ କରାଯାଇଛି। ଏହି ଆକ୍ରମଣରେ ମହିଳା ଏବଂ ଶିଶୁ ସମେତ 30 ଜଣଙ୍କ ମୃତ୍ୟୁ ହୋଇଛି ଏବଂ ହଜାର ହଜାର ଲୋକ ଆହତ ହୋଇଛନ୍ତି। ସୋମବାର ରାତିରେ ପାକିସ୍ତାନୀ ଏୟାରଫୋର୍ସ JF-17 ବିମାନ ଯୋଗେ ପାସ୍ତୁନ ଅଧ୍ୟୁଷିତ ମତ୍ରେ ଦାରା ଗ୍ରାମ ଉପରେ ଆଠଟି LS-6 ବୋମା ପକାଇଛି। ଚୀନ୍ ଦ୍ୱାରା ଏହି  ବୋମା ପାକିସ୍ତାନକୁ ପ୍ରଦାନ କରାଯାଇଥିଲା। ତେବେ ଏଠି ବଡ଼ ପ୍ରଶ୍ନ ଉଠୁଛି ପାକିସ୍ତାନ ନିଜ ନାଗରିକଙ୍କ ଉପରେ କାହିଁକି ବିମାନ ଆକ୍ରମଣ କଲା?

ନିଜ ନାଗରିକଙ୍କ ଉପରେ ପାକିସ୍ତାନର ବୋମାମାଡ଼ 

ପାକିସ୍ତାନ ଏହି ଅଞ୍ଚଳରେ ତେହେରିକ-ଏ-ତାଲିବାନ୍ ବା TTP ଆଡ୍ଡାଗୁଡ଼ିକୁ ଟାର୍ଗେଟ କରିଥିବା ଦାବି କରିଛି। ସ୍ଥାନୀୟ ଲୋକମାନେ କହିଛନ୍ତି ଯେ ପୀଡିତମାନଙ୍କର TTP ସହିତ କୌଣସି ସମ୍ପର୍କ ନଥିଲା। ଏହା ସତ୍ତ୍ୱେ, ପାକିସ୍ତାନ ମିଥ୍ୟା ସୂଚନା ଆଧାରରେ ନିଜ ଲୋକଙ୍କ ଉପରେ ବୋମା ମାଡ଼ କରିଥିଲା। ଏମିତି ବି ପାକିସ୍ତାନ ବିଶ୍ୱର ସବୁଠାରୁ କୁଖ୍ୟାତ ଦେଶମାନଙ୍କ ମଧ୍ୟରୁ ଗୋଟିଏ ଯାହାର ସେନା ନିୟମିତ ଭାବରେ ନିଜ ନାଗରିକଙ୍କୁ ହତ୍ୟା କରେ। ତେଣୁ ପାକିସ୍ତାନୀ ବାୟୁସେନା ଆଫଗାନିସ୍ତାନ ସୀମାବର୍ତ୍ତୀ ଖାଇବର ପଖତୁନ ପ୍ରଦେଶରେ ସାଧାରଣ ଲୋକଙ୍କ ଉପରେ ବୋମାମାଡ଼ କରିଥିବା ନେଇ ଚର୍ଚ୍ଚା ହେଉଛି।

ଏହି ବିମାନ  ଆକ୍ରମଣ ପରେ ସୋସିଆଲ ମିଡିଆରେ ଅନେକ ଫଟୋ ଏବଂ ଭିଡିଓ ସେୟାର କରାଯାଇଛି, ଯେଉଁଥିରେ ନଷ୍ଟ ହୋଇଥିବା ଘର ଏବଂ ମୃତଦେହ ପଡ଼ିଥିବା ଦେଖାଯାଉଛି। ସ୍ଥାନୀୟ ଲୋକମାନେ ମଧ୍ୟ ଭଗ୍ନାବଶେଷରେ ଫସି ରହିଥିବା ଲୋକଙ୍କୁ ଉଦ୍ଧାର କରିବାକୁ ଚେଷ୍ଟା କରୁଥିବା ଦେଖାଯାଉଛି। ଏହି ଅଞ୍ଚଳରେ ହସ୍ପିଟାଲର ଅଭାବ ହେତୁ, ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା କରାଯାଉଛି।