Police Station Turns: ଥାନାରେ କୁନି କୁନି ପିଲା, ଚାଲିଛି ଛିନଛତ୍ର ଖେଳ

ଖେଳକୁଦରେ ମଜିଛନ୍ତି ପିଲାଏ । ପାଠପଢା ସହ ଭରପୂର ମନୋରଞ୍ଜନ । ଭଳିକି ଭଳି ଖେଳନା ଥୁଆ ହୋଇଛି, ଟିଭିରେ କାର୍ଟୁନ ଚାଲିଛି । ଆପଣଙ୍କୁ ଲାଗୁଥିବ ଏଇ କୌଣସି ପ୍ଲେ ସ୍କୁଲ । ହେଲେ ନାଇଁ ଆଜ୍ଞା ! ଇଏ କୋଉ ସ୍କୁଲ ନୁହେଁ ବରଂ ଥାନା । ଥାନା ଭିତରେ ହୋଇଛି ପ୍ଲେ ସ୍କୁଲ ଭଳି ବ୍ୟବସ୍ଥା ।  କନ୍ଧମାଳ ଜିଲ୍ଲା ବାଲିଗୁଡା ଥାନା । ଏହି ଥାନା ପରିସରରେ କୁନି କୁନି ପିଲାଙ୍କ ପାଇଁ ଉଦଘାଟିତ ହୋଇଛି ଚିଲଡ୍ରେନ ଫ୍ରେଣ୍ଡଲି କୋଠା ।

ଥାନାରେ ଆଉ ଅବହେଳିତ ହେବେନି ଛୋଟ ଛୁଆ । ସାଙ୍ଗରେ ଛୁଆଙ୍କୁ ନେଇ ଥାନାକୁ ଆସୁଥିବା ଅଭିଯୋଗକାରୀମାନଙ୍କୁ ଆଉ ହଇରାଣ ହେବାକୁ ପଡ଼ିବ ନାହିଁ । ଅଭିଯୋଗକାରୀ ନିଜ କାମରେ ବ୍ୟସ୍ତ ରହିଲେ ପିଲାଙ୍କୁ ଥାନା ପରିସରରେ ଅନୁକୂଳ ପରିବେଶରେ ରହିବାର ସୁଯୋଗ ମିଳିବ । ଥାନାକୁ ନେଇ ପିଲାଙ୍କ ମନରେ ଥିବା ଭୟ ବି ରହିବ ନାହିଁ । ସେଥିପାଇଁ ଏମିତି ଏକ ଚିଲ୍ଡେନ ଫ୍ରେଣ୍ଡଲି ଥାନାର ଲୋକାର୍ପଣ କରିଛନ୍ତି କନ୍ଧମାଳ ଏସପି ହରିଶ ବିଶି । ଏଠି ପିଲାମାନେ ପାଠ ପଢିବା ସହ ଖେଳକୁଦ କରିବାର ସବୁପ୍ରକାର ବ୍ୟବସ୍ଥା ରହିଛି ।

କେବଳ ଅଭିଯୋଗକାରୀ ନୁହେଁ, ପୋଲିସ କର୍ମଚାରୀ ଓ ସର୍ବସାଧାରଣଙ୍କ ପାଇଁ ଏହି ଚିଲ୍ଡେନ ଫ୍ରେଣ୍ଡଲି ଥାନା ବ୍ୟବହାର ହେବ । ଅନ୍ୟ ପିଲାମାନେ ଏଠାକୁ ଆସି ପାଠପଢା, ଖେଳକୁଦ କରିପାରିବେ ବୋଲି କହିଛନ୍ତି ଏସପି । କନ୍ଧମାଳ ପୋଲିସର ଏଭଳି ଉଦ୍ୟମକୁ ଅଭିଭାବକ ମହଲରେ ପ୍ରଶଂସା କରାଯାଇଛି ।