Obsessed Stalker Shoots: ରାସ୍ତାରେ ଜଗିଥିଲା ପାଗଳ ପ୍ରେମିକ, ନାବାଳିକା ଆସୁ ଆସୁ ଗୁଳି କଲା

ରାସ୍ତାରେ ଜଗିଥିଲା ପାଗଳ ପ୍ରେମିକ । ନାବାଳିକା ଆସୁ ଆସୁ ଗୁଳି କଲା । ଏହା ପରେ ବାଇକ୍‌ରେ ବସି ମାରିଲା ଛୁ । ହରିୟାଣାର ଫରିଦାବାଦରେ ଏଭଳି ଏକ ଚାଞ୍ଚଲ୍ୟକର ଘଟଣା ଘଟିଛି। ଏକ ଲାଇବ୍ରେରୀରୁ ଫେରୁଥିବା ବେଳେ ଜଣେ ନାବାଳିକା ଛାତ୍ରୀଙ୍କୁ ଜଣେ ଯୁବକ ଗୁଳି କରିଛି। ବଲ୍ଲଭଗଡ଼ର ଶ୍ୟାମ କଲୋନୀରେ ଛାତ୍ରୀଙ୍କୁ ଗୁଳି କରିବାର ଏକ ଭୟଙ୍କର ଭିଡିଓ ସାମ୍ନାକୁ ଆସିଛି।

ରିପୋର୍ଟ ଅନୁସାରେ ଝିଅଟି କୋଚିଂ କ୍ଲାସରୁ ଘରକୁ ଫେରୁଥିବା ବେଳେ ଏହି ଘଟଣା ଘଟିଛି। ଯୁବକ ଜଣଙ୍କ ପୂର୍ବରୁ ରାସ୍ତାରେ ଅପେକ୍ଷା କରିଥିଲା। ଛାତ୍ରୀ ଜଣଙ୍କ ପାଖକୁ ଆସିବା ମାତ୍ରେ ଗୁଳି ଚଳାଇଥିଲା ଆଉ ବାଇକରେ ବସି ପଳାଇଥିଲା।

ଭିଡିଓରେ ସ୍ପଷ୍ଟ ଦେଖାଯାଉଛି ଯେ ସେ ଦୁଇ ରାଉଣ୍ଡ ଗୁଳି ଚଳାଉଛି ଆଉ ଛାତ୍ରୀ ଜଣଙ୍କ ଡରିଯାଇ ନିଜକୁ ରକ୍ଷା କରୁଛି। ଭିଡିଓରେ ଦେଖାଯାଉଛି, ଝିଅଟିର ସହ ତା ସାଙ୍ଗମାନେ ଥିଲେ ମଧ୍ୟ ଯୁବକ ଜଣଙ୍କ କେବଳ ତାଙ୍କୁ ହିଁ ଆକ୍ରମଣ କରୁଛି। ଗୁଳିଚାଳନା ସମୟରେ ଛାତ୍ରୀ ଜଣକ ତାଙ୍କ ଛାତି ଆଡକୁ ଯାଉଥିବା ଗୁଳିକୁ ଏଡାଇବା ପାଇଁ ତାଙ୍କ ହାତକୁ ଉଠାଇଥିଲେ, ଯାହା ଫଳରେ ଗୋଟିଏ ଗୁଳି ତାଙ୍କ ହାତ ଏବଂ କାନ୍ଧରେ ବାଜିଥିଲା, ଅନ୍ୟ ଏକ ଗୁଳି ତାଙ୍କ ପେଟରେ ବାଜିଥିଲା। ତାଙ୍କୁ ତୁରନ୍ତ ଏକ ହସ୍ପିଟାଲରେ ଭର୍ତ୍ତି କରାଯାଇଛି ଆଉ ଚିକିତ୍ସା ଚାଲିଛି।

ଝିଅଟିର ବୟସ ପ୍ରାୟ ୧୭ ବର୍ଷ ହେବ ଏବଂ ସେ ଏକ ଘରୋଇ ସ୍କୁଲରେ ଦ୍ୱାଦଶ ଶ୍ରେଣୀରେ ପଢ଼େ। ଫରିଦାବାଦ ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ଗତ କିଛି ଦିନ ଧରି ଛାତ୍ରୀଙ୍କୁ ପିଛା କରୁଥିଲା। ପୀଡିତା ପୂର୍ବରୁ ତାଙ୍କ ପରିବାର ନିକଟରେ ଯୁବକଙ୍କ ଖରାପ ବ୍ୟବହାର ବିଷୟରେ ମଧ୍ୟ କହିଥିଲା, କିନ୍ତୁ ଅଭିଯୁକ୍ତଙ୍କ ପରିବାର କ୍ଷମା ମାଗିଥିଲେ।
ପୋଲିସ ଅଭିଯୁକ୍ତକୁ ଜତିନ ମଙ୍ଗଲ ଭାବେ ଚିହ୍ନଟ କରିଛି। ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତ ପୂର୍ବରୁ ଝିଅଟିକୁ ଜାଣିଥିଲା ଏବଂ ଏକତରଫା ପ୍ରେମ ଯୋଗୁଁ ସେ ଏହି ଭୟଙ୍କର କାଣ୍ଡ ଘଟାଇଥାଇ ପାରେ। ପୋଲିସ ଏକ ମାମଲା ରୁଜୁ କରିଛି ଆଉ ଅଧିକ ତଦନ୍ତ ଜାରି ରଖିଛି।