Saif al-Islam Gaddafi killed in Zintan: ପୂର୍ବତନ ଏକଛତ୍ରବାଦୀ କର୍ଣ୍ଣେଲ ମୁଅମ୍ମର ଗଦ୍ଦାଫିଙ୍କ ପୁଅଙ୍କୁ ଗୁଳି କରି ହତ୍ୟା

ଲିବିୟାର ପୂର୍ବତନ ଏକଛତ୍ରବାଦୀ କର୍ଣ୍ଣେଲ ମୁଅମ୍ମର ଗଦ୍ଦାଫିଙ୍କ ପୁଅ ଏବଂ ଏକଦା ତାଙ୍କ ସ୍ୱର୍ଗତ ପିତାଙ୍କ ଉତ୍ତରାଧିକାରୀ ଭାବରେ ଜଣାଶୁଣା ସୈଫ ଅଲ-ଇସଲାମ ଗଦ୍ଦାଫିଙ୍କୁ ହତ୍ୟା କରାଯାଇଛି। 

ଅନ୍ତର୍ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ପଶ୍ଚିମ ଲିବିୟାର ଜିନ୍ତାନ ସହରସ୍ଥିତ ତାଙ୍କ ବାସଭବନରେ ଏକ ଚାରି ଜଣିଆ କମାଣ୍ଡୋ ୟୁନିଟ୍ ତାଙ୍କୁ ଗୁଳି କରି ହତ୍ୟା କରିଥିଲା। ଜିନ୍ତାନ ରାଜଧାନୀ ତ୍ରିପୋଲିରୁ ପ୍ରାୟ ୧୩୬ କିଲୋମିଟର ଦକ୍ଷିଣ-ପଶ୍ଚିମରେ ଅବସ୍ଥିତ।

ସୈଫ୍ ଅଲ୍-ଇସ୍ଲାମ୍ ଗଦ୍ଦାଫି ପୂର୍ବତନ ଲିବିଆନ୍ ଏକଛତ୍ରବାଦୀ କର୍ଣ୍ଣେଲ ମୁଅମ୍ମର ଗଦ୍ଦାଫିଙ୍କ ପ୍ରମୁଖ ପୁଅ ଥିଲେ। ୫୩ ବର୍ଷୀୟ ସୈଫ୍ ଅଲ୍-ଇସ୍ଲାମ୍ ଗଦ୍ଦାଫିଙ୍କୁ ତାଙ୍କ ପିତା ମୁଅମ୍ମର ଗଦ୍ଦାଫିଙ୍କ ହତ୍ୟା ପରଠାରୁ ତାଙ୍କର ସମ୍ଭାବ୍ୟ ଉତ୍ତରାଧିକାରୀ ଭାବରେ ବିବେଚନା କରାଯାଉଥିଲା। ୧୯୬୯ ରୁ ୨୦୧୧ ପର୍ଯ୍ୟନ୍ତ ଲିବିଆରେ ଶାସନ କରୁଥିବା କର୍ଣ୍ଣେଲ ଗଦ୍ଦାଫିଙ୍କ ସାତ ପୁଅଙ୍କ ମଧ୍ୟରୁ ସୈଫ୍ ଅଲ୍-ଇସ୍ଲାମ୍ ଗଦ୍ଦାଫିଙ୍କୁ ସବୁଠାରୁ ପ୍ରଭାବଶାଳୀ ଏବଂ ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ଭାବରେ ଦେଖାଯାଉଥିଲା।

୨୦୧୧ ଲିବିଆନ୍ ବିପ୍ଳବ ସମୟରେ ସେ ତାଙ୍କ ପିତାଙ୍କ ସରକାରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ, ଯେଉଁଠାରେ ସେ ପ୍ରତିବାଦକୁ ଦମନ କରିବାରେ ଅଂଶଗ୍ରହଣ କରିଥିଲେ। ବିପ୍ଳବ ପରେ ତାଙ୍କୁ ୨୦୧୧ରେ ବନ୍ଦୀ କରାଯାଇଥିଲା, କିନ୍ତୁ ପରେ ତାଙ୍କୁ ମୁକ୍ତ କରାଯାଇଥିଲା।

୨୦୧୫ ମସିହାରେ ଏକ କୋର୍ଟ ସୈଫ ଅଲ-ଇସଲାମଙ୍କୁ ତାଙ୍କ ଅନୁପସ୍ଥିତିରେ ମୃତ୍ୟୁଦଣ୍ଡ ଦେଇଥିଲେ। ତଥାପି, ପରେ ତାଙ୍କୁ ନିର୍ଦ୍ଦୋଷରେ ଖଲାସ କରାଯାଇଥିଲା। ୨୦୨୧ ମସିହାରେ ସୈଫ ଅଲ-ଇସଲାମ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚେଷ୍ଟା କରିଥିଲେ, କିନ୍ତୁ ସୁରକ୍ଷା ଏବଂ ଆଇନଗତ ସମସ୍ୟା ଯୋଗୁଁ ସେ ବିଫଳ ହୋଇଥିଲେ।

ସୈଫ୍ ଅଲ୍-ଇସଲାମଙ୍କ ଭଉଣୀ ଲିବ୍ୟାର ରାଷ୍ଟ୍ରୀୟ ଗଣମାଧ୍ୟମକୁ କହିଛନ୍ତି ଯେ, ଲିବିୟା ଓ ଆଲଜେରିଆର ସୀମା ନିକଟରେ ତାଙ୍କର ମୃତ୍ୟୁ ହୋଇଛି। 
ମିଳିଥିବା ସୂଚନା ମୁତାବକ, ଚାରି ଜଣ ମୁଖା ପିନ୍ଧା ବନ୍ଧୁକଧାରୀ ପ୍ରଥମେ ତାଙ୍କ ଘର ଉପରେ ଆକ୍ରମଣ କରିଥିଲେ। ଏହା ପରେ ଘରର ବିଭିନ୍ନ ଜାଗାରେ ଲାଗିଥିବା ସିସିଟିଭି କ୍ୟାମେରାକୁ ନଷ୍ଟ କରି ଦେଇଥିଲେ। ଏହା ପରେ ତାଙ୍କୁ ଗୁଳି କରି ହତ୍ୟା କରିଥିଲେ।