Gold, Silver Prices Crash: ବଜାରରେ ଭାଙ୍ଗିଲା ରୁପା ଫୁଟାଣି, ତଳ ମୁହାଁ ବି ସୁନା ଗ୍ରାଫ୍

ବଜାରରେ ଭାଙ୍ଗୁଛି ରୁପା ଫୁଟାଣି । ୩ ଲକ୍ଷ ତଳକୁ ଖସିଲା ସିଲଭର୍ । ତଳ ମୁହାଁ ସୁନା ଗ୍ରାଫ୍ । ଗରିବ ଗ୍ରାହକ ଚାହୁଁଛନ୍ତି ଆହୁରି ଖସୁ ଦର । ବଜାରରେ ସୁନା-ରୁପା ଦରକୁ ନେଇ ସମସ୍ତେ କନଫ୍ୟୁଜନ୍ । ବିବାହ ଋତୁ ଚାଲୁଥିବାରୁ ଗରିବ ବାପାଟିଏ ମୁଣ୍ଡରେ ଯେମିତି ଚଡ଼କ ପଡ଼ିଛି ।

ଏମିତିକି ଦେଢ଼ ଲକ୍ଷ ପାଖାପାଖି ଥିବା ସୁନା ଧନୀ ଲୋକଙ୍କୁ ବି ବିଚଳିତ କରୁଛି । ହେଲେ ସୁନା-ରୁପା ଦର ଉପର ତଳ ଭିତରେ ଆଜି ପୁଣି ରୁପା ଦର ୨୦ ହଜାର ଖସିଛି । ଲଗାତର ସିଲଭର ୨୦ ହଜାର ବଢ଼ିବା କମିବା ଲୁଚକାଳି ଭିତରେ ଆଜି ରୁପା କେଜି ପ୍ରତି ୨ଲକ୍ଷ ୮୦ ହଜାର ଟଙ୍କା ରହିଛି । 

ବଜାରରେ ରୁପା ଠାରୁ ସୁନାର ଝାମେଲା ଆହୁରି ବଳି । କେବେ ୬ ହଜାର ବଢ଼ୁଛି ତ ପୁଣି କେତେବେଳେ ୪ ହଜାର ଖସୁଛି । ସୁନାର ଖସିବା ବଢ଼ିବା ଭିତରେ ଆଜି ୨୪ କ୍ୟାରେକ୍ଟ ସୁନା ୨ ହଜାର ୭୦ ଟଙ୍କା ଖସିଛି । ଫଳରେ ୧୦ ଗ୍ରାମ୍ ପ୍ରତି ୨୪ କ୍ୟାରେକ୍ଟ ସୁନା ଦର ୧ଲକ୍ଷ ୫୨ ହଜାର ୩୫୦ ଟଙ୍କା ହୋଇଛି ।

ସେହିପରି ୨୨ କ୍ୟାରେକ୍ଟ ସୁନା ଉପରୁ ମଧ୍ୟ କମିଛି ୧୯ଶହ ଟଙ୍କା । ଫଳରେ ୨୨ କ୍ୟାରେକ୍ଟ ସୁନା ଦାମ୍ ୧୦ ଗ୍ରାମ ପ୍ରତି ୧ ଲକ୍ଷ ୪୦ ହଜାର ତଳକୁ ଖସିଛି । ବର୍ତ୍ତମାନ ୨୨ କ୍ୟାରେକ୍ଟ ସୁନା ଭରି ୧ ଲକ୍ଷ ୩୯ ହଜାର ୬୫୦ ଟଙ୍କା ରହିଛି । ସୁନା ଓ ରୁପା ଦରକୁ ନେଇ ଏବେ ଗ୍ରହକ ଖୁବ୍ ଚିନ୍ତାରେ ।

ବିବାହ ଋତୁ ଚାଲୁଥିବାରୁ ଏ ହ୍ରାସ ଗ୍ରାହକଙ୍କ ପାଇଁ କୌଣସି ଆଶ୍ବସ୍ତିକର ଖବର ନୁହେଁ । କାରଣ ଏହି ସ୍ବଳ୍ପ ହ୍ରାସ ଗରିବ ଝିଅର ବାପା ମୁଣ୍ଡରୁ କିଛି ବୋଝ ହଟାଇପାରିବ ନାହିଁ । ତେଣୁ ସୁନା ଓ ରୁପା ଦର ଆହୁରି କମିବାର ଆବଶ୍ୟକତା ରହିଥିବା ଗ୍ରାହକ କହିଛନ୍ତି ।

ପ୍ରତିଦିନ ବଢ଼ୁଛି କମୁଛି ସୁନା ଦର । ଗ୍ରାହକଙ୍କ ପାଇଁ ସୁନା ଯେମିତି ଏକ ସ୍ବପ୍ନ ପାଲିଟିବାକୁ ବସିଲାଣି । ଆଜି ୧ଲକ୍ଷ ୪୦ ହଜାର ତଳକୁ ସୁନା ଖସିଥିଲେ ବି ବଜାରେ ସେମିତି ଗ୍ରାହକ ଉତ୍ସାହ ନଥିବା ଦେଖିବାକୁ ମିଳିଛି ।