Tragic Car Accident: ହାତରେ ସିଗାରେଟ୍, ୧୨୦ ସ୍ପିଡ୍‌ରେ ଗାଡି: ମୃତ୍ୟୁ ପୂର୍ବର ସେଇ କେଇ ସେକେଣ୍ଡ...

ହାତରେ ସିଗାରେଟ୍, ୧୨୦ ସ୍ପିଡ୍‌ରେ ଗାଡି ଆଉ ଲାଉଡ୍ ମ୍ୟୁଜିକ୍ । କ୍ୟାମେରାରେ ଦୁର୍ଘଟଣା ପୂର୍ବର ସେଇ ଭୟଙ୍କର ଚିତ୍ର ।  ଚା' ପିଇବାକୁ ଯାଉଥିଲେ, ଜୀବନ ଚାଲିଗଲା । ଦେଖନ୍ତୁ କେତେ ବେପରୁଆ ଭାବେ ଗାଡି ଚଲାଉଛନ୍ତି ଯୁବକ । ଯେଉଁଥିପାଇଁ ଏହି ଯୁବକଙ୍କ ସମେତ ତାଙ୍କର ୪ ସାଙ୍ଗଙ୍କ ଦୁର୍ଘଟଣାରେ ଚାଲିଯାଇଛି ଜୀବନ । ମୃତକ ହେଲେ ମହମ୍ମଦ ଅୟାନ, ଆଦିଲ୍ କୁରେସି, ଶେର୍ ମହମ୍ମଦ, ଗୁଲାମ ଖ୍ବାଜା । ରାଜସ୍ଥାନ ଉଦୟପୁରରେ ଘଟିଛି ଏହି ମର୍ମନ୍ତୁଦ ଦୁର୍ଘଟଣା । 

ଜନ୍ମଦିନରେ ଚାଲିଗଲେ ୪ ସାଙ୍ଗ:

ସାଙ୍ଗର ଜନ୍ମଦିନ ଥିଲା । ୬ ଜଣ ସାଙ୍ଗ ମିଶି ସେଲିବ୍ରେସନ କରିବାକୁ ଯାଇଥିଲେ । ସେଲିବ୍ରେସନ ସାରି ରାତି ୩ଟାରେ ବାହାରିଥିଲେ ଚା' ପିଇବାକୁ । ଭିଡିଓରେ ଦେଖାଯାଉଛି, ଶେର୍ ମହମ୍ମଦ ଫୁଲ୍ ସ୍ପିଡରେ ବେପରୁଆ ଭାବେ ଡ୍ରାଇଭିଂ କରୁଥିବା ବେଳେ ପଛ ସିଟ୍‌ରେ ବସିଥିବା ଜଣେ ସାଙ୍ଗ ଭିଡିଓ ରେକର୍ଡିଂ କରୁଥିଲେ । ଗାଡିର ସ୍ପିଡ୍ ୧୦୦ ଉପରେ ଥିଲା । 

କ୍ୟାମେରାରେ ଛାତିଥରା ଦୁର୍ଘଟଣା:

ସ୍ପିଡ୍ ୧୪୦ ପାର୍ କରିବା ପରେ ସାଙ୍ଗମାନେ ସ୍ଲୋ କରିବାକୁ କହିଥିଲେ । ଆଉ ଏହାର କେଇ ସେକେଣ୍ଡ ଭିତରେ ଘଟିଥିଲା ଦୁର୍ଘଟଣା । ତାଙ୍କର କାର୍ ଗୁଜରାଟ ପଟୁ ଆସୁଥିବା ଆଉ ଏକ କାର୍ ସହ ମୁହାଁମୁହିଁ ଧକ୍କା ହୋଇଥିଲା । ଏହା ଏତେ ଭୟଙ୍କର ଥିଲା ଯେ, ପୂରାପୂରି ଚୁରମାର୍ ହୋଇଯାଇଥିଲା ଦୁଇଟି ଯାକ କାର୍ ।  ଭାଇ ବଞ୍ଚାଅ, ବଞ୍ଚାଅ... ବୋଲି ଆକୁଳ ଚିତ୍କାର ଶୁଭିଥିଲା ।  ଦୁର୍ଘଟଣା ବେଳର ଏକ ୯ ମିନିଟ୍‌ ବିଚଳିତ କଲାଭଳି ଭିଡିଓ ଏବେ ଭାଇରାଲ ହେବାରେ ଲାଗିଛି ।

କାର୍ ସହ ମୁହାଁମୁହିଁ ଧକ୍କାରେ ୬ ଜଣଙ୍କ ଭିତରୁ ୪ ଜଣ ସାଙ୍ଗଙ୍କ ମୃତ୍ୟୁ ହୋଇଥିବା ବେଳେ ଆଉ ଦୁଇ ଜଣ ଗୁରୁତର ଅଛନ୍ତି । ଅନ୍ୟ କାର୍‌ ଥିବା ୪ ଜଣ ଯାତ୍ରୀଙ୍କ ଅବସ୍ଥା ମଧ୍ୟ ଗୁରୁତର ରହିଛି । ବେପରୁଆ ଗାଡି ଚାଳନା ଯେ କେତେ ଭୟାନକ ହୋଇପାରେ, ଏଥିରୁ ଠିକ୍ ଅନୁମାନ କରିପାରୁଥିବେ ।

ବ୍ୟୁରୋ ରିପୋର୍ଟ, ଓଟିଭି