Blood on the Road: ପାଣିକୋଇଲି ଛକରେ ବ୍ରହ୍ମରାକ୍ଷସ ! କଳା ପିଚୁରେ ନାଲି ରକ୍ତର ଛିଟା

ରକ୍ତରେ ଭିଜୁଛି ପାଣିକୋଇଲି ଛକ । କଳା ପିଚୁରେ ନାଲି ରକ୍ତର ଛିଟା । ପ୍ରଶାସନ ଚୁପ୍, ଜୀବନ ନେଉଛି ଦୁର୍ଘଟଣା ରୂପୀ ବ୍ରହ୍ମରାକ୍ଷସ ! ପାଣିକୋଇଲିର ଚଳଚଞ୍ଚଳ ରାସ୍ତା। ଯେଉଁଠି ବାରମ୍ବାର ଦୁର୍ଘଟଣା ଘଟି ଶହ ଶହ ଲୋକଙ୍କ ଜୀବନ ଯାଇଛି । କାହା ସିନ୍ଦୂର ଲିଭୁଛି । ତ ପୁଣି କେଉଁ ମା’ର କୋଳ ଖାଲି ହେଉଛି । ସରକାରୀ ରିପୋର୍ଟ ଅନୁସାରେ, ଗତ ୧୦ ବର୍ଷରେ ଏଠି ୧୯୬ ଜଣଙ୍କ ଦୁର୍ଘଟଣା ଜନିତ ମୃତ୍ୟୁ ହୋଇଛି ।  ଆଉ ବେସରକାରୀ ଭାବେ ୩୦୦ରୁ ଉର୍ଦ୍ଧ୍ବ ଲୋକଙ୍କ ଜୀବନ ଯାଇଥିବା କୁହାଯାଉଛି । ତେଣୁ ଏଭଳି ପରିସ୍ଥିତିରେ ଯାତ୍ରୀଙ୍କ ସୁରକ୍ଷା ପାଇଁ ତୁରନ୍ତ ଏଠି ଟ୍ରାଫିକ ପୋଷ୍ଟ ନିର୍ମାଣ କରିବାକୁ ସାଧାରଣରେ ଦାବି ହୋଇଛି ।

ଏହି ରାସ୍ତା ଦେଇ ପ୍ରତ୍ୟେକ ଦିନ ହଜାର ହଜାର ଭାରିଯାନ କେନ୍ଦୁଝର, କଳିଙ୍ଗନଗର, ଅନୁଗୁଳ ଓ ତାଳଚେରକୁ ଯାତାୟାତ କରନ୍ତି । ସେହିଭଳି କୋଲକତା, ଝାଡ଼ଖଣ୍ଡ, ଆନ୍ଧ୍ରପ୍ରଦେଶ ଓ ବିହାରକୁ ଲୋକମାନେ ଯାଆଆସ କରନ୍ତି । ତେଣୁ ଗୋଟିଏ ସମୟରେ ଶହ ଶହ ଯାନ ଯାତାୟାତ ଯୋଗୁ ରାସ୍ତା ଜାମ୍ ରହିବା ସହ ଦୁର୍ଘଟଣା ଘଟୁଛି । ତଥ୍ୟ ଅନୁସାରେ ପ୍ରତି ୩ ଦିନରେ ପାଣିକୋଲି ଛକରେ ୨ଟି ଦୁର୍ଘଟଣା ଘଟେ । କିନ୍ତୁ ପୋଲିସ ପ୍ରଶାସନର କୁମ୍ଭକର୍ଣ୍ଣ ନିଦ୍ରା ଭାଙ୍ଗେନି । ସେପଟେ ଏନେଇ ଯାଜପୁର ଏସପି ୟଶପ୍ରତାପ ଶ୍ରୀମଲଙ୍କ ସହ ଆମେ ଯୋଗାଯୋଗ କରିବାକୁ ଟ୍ରାଫିକ ପୋଷ୍ଟ ନିର୍ମାଣ ପାଇଁ ସରକାରଙ୍କୁ ଜଣାଯାଇଛି, ଖୁବଶୀଘ୍ର ଏହି ସମସ୍ୟାର ସମାଧାନ ହେବ ବୋଲି ସେ କହିଛନ୍ତି । 

ପାଣିକୋଲି ଛକରୁ ମାତ୍ର ୫୦୦ ମିଟର ପାଣିକୋଇଲି ଥାନା । ପ୍ରତିଟି ଦୁର୍ଘଟଣା ସମ୍ପର୍କରେ ପୋଲିସ ପାଖରେ ଖବର ରହିଛି । ତଥାପି ଯାତ୍ରୀଙ୍କ ସୁରକ୍ଷା ପ୍ରତି କୌଣସି ପଦକ୍ଷେପ ନିଆଯାଉନଥିବା ସାଧାରଣରେ ଚିନ୍ତାର ବିଷୟ ପାଲଟିଛି ।