ନିଆଁ ଆଁରେ ଚନ୍ଦକା, ପ୍ରଥମେ ଗୋଡ଼ିବାରୀ ଜଳୁଥିଲା, ତାପରେ ଝୁମ୍‌କା

ନିଆଁ ଆଁରେ ଚନ୍ଦକା ଅଭୟାରଣ୍ୟ । କାଲି ଗୋଡ଼ିବାରୀ ଜଳୁଥିଲା, ଆଉ ଆଜି ଝୁମ୍‌କା । ଯୁଆଡ଼େ ଅନେଇଲେ, ନିଆଁ ଆଉ ଧୂଆଁ । ଜୀବଜନ୍ତୁ ଅସ୍ତବ୍ୟସ୍ତ, ମଣିଷ ନୟାନ୍ତ । ହୁତ୍ ହୁତ୍ ହୋଇ ଜଳୁଛି ବାଉଁଶ ବଣ। ଚାରିଆଡ଼େ ଧଳା ପାଉଁଶର ଆସ୍ତରଣ । ପାହାଡ଼ ଓ ଜଙ୍ଗଲ ଉପର ଆକାଶରେ ଧୂଆଁର ଚାଦର । କେବଳ ମଝିରେ ମଝିରେ ଶୁଭୁଛି ନିଆଁ ଝାସରେ କଲବଲ ହେଉଥିବା ପକ୍ଷୀର କିଚିରି ମିଚିରି ଓ ଜୀବଜନ୍ତୁଙ୍କ ଆର୍ତ୍ତ ଚିତ୍କାର । ସ୍ଥାନୀୟ ଲୋକଙ୍କ କହିବା କଥା, ଜଙ୍ଗଲରେ ନିଆଁର ପ୍ରକୋପ ଏତେ ଅଧିକ ଯେ କେବଳ ଜୀବଜନ୍ତୁ ନୁହନ୍ତି, ଜଙ୍ଗଲ ପାଖ ଗାଁରେ ରହିବା ବି ସମ୍ଭବ ହେଉନି । ଦେହ ହାତ ସିଝି ଯାଉଛି । ଏପଟେ ବନ ବିଭାଗ କର୍ମଚାରୀଙ୍କ କହିବା କଥା, ବନାଗ୍ନି ଖବର ପାଇବା ପରଠୁ ସେମାନେ ନିଆଁ ଲିଭା କାମରେ ଲାଗିଛନ୍ତି । ହେଲେ ବୋଲ ମାନୁନି ନିଆଁ ।

Published By: Satyendu Shekher Mishra

Last updated: 23 April 2024, 10:48 PM IST