ଡେଲିଭରି କହିଲେ ଯେମିତି ଖାଲି ସିଜରିଆନ୍

ରାଜ୍ୟରେ ଘରୋଇ ହସପିଟାଲରେ ଡେଲିଭରି କହିଲେ ଯେମିତି ଖାଲି ସିଜରିଆନ୍। କାଁ ଭାଁ ନର୍ମାଲ ହେଉଛି। ଆଜି ବିଧାନସଭାରେ ଏକ ପ୍ରଶ୍ନର ଉତ୍ତରରେ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଦର୍ଶାଇଛନ୍ତି ଯେ, ଘରୋଇ ହସପିଟାଲରେ ୨୦୨୩-୨୪ରେ ଅପରେସନଜନିତ ପ୍ରସବ ହାର ୮୧.୦୬ ପ୍ରତିଶତ ରହିଛି। ଗତବର୍ଷ ଘରୋଇ ହସ୍ପିଟାଲରେ ୧ ଲକ୍ଷ ୪୦ ହଜାର ୧୨୬ ପ୍ରସବ ହୋଇଥିବା ବେଳେ ସେଥିରୁ ୧ଲକ୍ଷ ୧୩ ହଜାର ୫୯୮ ସିଜରିଆନ୍ ଡେଲିଭରି। ସେପଟେ ସରକାରୀ ହସ୍ପିଟାଲ କଥା ଦେଖିଲେ ୨୦୨୩-୨୪ରେ ୫ ଲକ୍ଷ ୯୧ହଜାର ୧୮୫ ପ୍ରସବ ହୋଇଥିଲା। ସେଥିରୁ ୧ଲକ୍ଷ ୯୫ ହଜାର ୫୭୮ ଅସ୍ତ୍ରୋପଚାରଜନିତ ପ୍ରସବ। ଯାହାର ହାର ୩୩.୦୮%। ଅର୍ଥାତ୍ ରାଜ୍ୟରେ ସରକାରୀ ହସପିଟାଲ ତୁଳନାରେ ଘରୋଇ ହସପିଟାଲରେ ଢେର୍ ଅଧିକ ସିଜରିଆନ୍ ଡେଲିଭରି ହେଉଛି।