ବିଚ୍ ରାସ୍ତାରେ ଗରା, ବାଲଟିର ଲାଗିଛି ଧାଡି

ବିଚ୍ ରାସ୍ତାରେ ଗରା, ବାଲଟିର ଲାଗିଛି ଧାଡି । ଡହ ଡହ ଖରାରେ ପାଣି ପାଇଁ ଡହଳବିକଳ ଗ୍ରାମବାସୀ ସିଧା ଓହ୍ଲାଇ ଆସିଛନ୍ତି ରାଜରାସ୍ତାକୁ। ଏକମାତ୍ର ଜିଦ୍, ପାଣି ଦିଅ, ନହେଲେ ରାସ୍ତାରୁ ହଟିବୁନି। ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମ ରତ୍ନପୁରରେ ଦେଖିବାକୁ ମିଳିଛି ଏମିତି ଦୃଶ୍ୟ । ବ୍ରହ୍ମପୁର ସହରରୁ ପ୍ରାୟ ୬ କିମି ଦୂର । ଏଠି, ପିଇବା ପାଣି ଟୋପେ ପାଇଁ ବର୍ଷସାରା ହନ୍ତସନ୍ତ ହେଉଛନ୍ତି ୩ ଶହରୁ ଅଧିକ ପରିବାର । ଗାଁରେ ଓଭରହେଡ ଟ୍ୟାଙ୍କ ରହିଛି, ହେଲେ ତାହା ଅଚଳ । ବସୁଧା ଯୋଜନାରେ ଘର ଆଗରେ ପାଇପ୍ କନେକ୍ସନ, ହେଲେ ସେଥିରେ ପାଣିର ନାଁ ଗନ୍ଧ ନାହଁ । ଗୋଟିଏ ଶୁଖିଲା ନଳକୂଅ ରହିଛି, ସେଥିରେ ବାଡେଇ ବାଡେଇ ହାତ ବିନ୍ଧୁଛି ସିନା ପାଣି ବାହାରୁନି। ୧୫ ଦିନ ହେଲା ଶୋଷରେ ଛଟପଟ ହେବା ପରେ ଆଜି ରାଜରାସ୍ତାରେ ଦେଖିବାକୁ ମିଳିଥିଲା ଅସନ୍ତୋଷ।

Published By: Satyendu Shekher Mishra

Last updated: 22 May 2024, 10:43 PM IST