ବେଲେଶ୍ୱର ଡବଲ ମର୍ଡର, ୫ ବର୍ଷ ପରେ ଧରାପଡ଼ିଲେ ଅଭିଯୁକ୍ତ

ଦୃଶ୍ୟମ୍ ଫିଲ୍ମ ଷ୍ଟାଇଲରେ ମର୍ଡର । ୨୦୧୯ରେ ଡବଲ୍ ମର୍ଡର କଲେ । ହତ୍ୟା ଯୋଜନାର ଗୋଟିଏ ବି ସୁରାକ ଛାଡ଼ିଲେ ନାହିଁ । ପ୍ରମାଣ ଅଭାବରୁ ୫ ବର୍ଷ ଏଣେତେଣେ ବୁଲିଲେ ଅଭିଯୁକ୍ତ ସ୍ୱାମୀ-ସ୍ତ୍ରୀ । ଶେଷରେ ବହୁ କଷ୍ଟରେ ହତ୍ୟାକାଣ୍ଡ ଅଭିଯୁକ୍ତ ଦମ୍ପତିଙ୍କୁ ଗିରଫ କରିବାରେ ସକ୍ଷମ ହୋଇଛି କମିସନରେଟ୍ ପୁଲିସ ।

ଗତ ୨୦୧୯ ଡିସେମ୍ବର ୧୨ ତାରିଖ ସନ୍ଧ୍ୟାରେ ମଧୁପାଟଣା ଥାନା ବେଲେଶ୍ୱର ଅଞ୍ଚଳର ଶ୍ରୀନାଥ ସାମଲ ଓ ବିଦ୍ୟୁଲତା ସାମଲଙ୍କୁ ବୀଭତ୍ସ ଭାବେ ହତ୍ୟା କରାଯାଇଥିଲା । ଘର ଭିତରୁ ରକ୍ତ ଜୁଡୁବୁଡୁ ଅବସ୍ଥାରେ ମୃତଦେହ ଉଦ୍ଧାର କରାଯାଇଥିଲା । ସୁଧ କାରବାର ଓ ପାରିବାରିକ ଶତ୍ରୁତାକୁ ନେଇ ଏହି ଦମ୍ପତିଙ୍କୁ ନିର୍ମମ ଭାବେ ପନିକିରେ ମୁଣ୍ଡକୁ ହାଣି ହତ୍ୟା କରାଯାଇଥିବା ଚର୍ଚ୍ଚା ହୋଇଥିଲା । ସେତେବେଳେ ଏହି ଘଟଣାରେ ବ୍ରହ୍ମପୁରର ଜଣେ ଭଡ଼ାଟିଆ, ତିନିଘରିଆ ଅଞ୍ଚଳର ଜଣେ ଠିକାଦାରଙ୍କ ସମେତ ୪ ଜଣଙ୍କ ସମ୍ପୃକ୍ତ ଥିବା ପୁଲିସ ସନ୍ଦେହ କରିଥିଲା। ହେଲେ ଅଭିଯୁକ୍ତକୁ ଧରିବାରେ ସକ୍ଷମ ହୋଇନଥିଲା।