ଭାରତ ଛାଡ଼ିବା ପୂବର୍ରୁ ଜୋସ ବଟଲର ହେଲେ ଭାବପ୍ରବଣ, ଲେଖିଲେ ଏଭଳି ସନ୍ଦେଶ..

ନୂଆଦିଲ୍ଲୀ: ସାରା ଭାରତରେ ଏବେ କରୋନା କାୟା ବିସ୍ତାର କରି ରଖିଛି । କରୋନା ଜାଲରେ ଭାରତବାସୀ ଛନ୍ଦି ହୋଇ ରହିଛନ୍ତି । ବହାରି ପାରୁନାହାନ୍ତି କି ବର୍ତ୍ତିପାରୁ ନାହାନ୍ତି । ତେବେ ଏହି କରୋନା ସମୟରେ ଅନେକ ବ୍ୟବସ୍ଥିତ ଢ଼ଙ୍ଗରେ ବାୟୋ ବବୁଲ ମଧ୍ୟରେ ଆଇପିଏଲ ୨୦୨୧ ଆରମ୍ଭ ହୋଇଥିଲା । ହେଲେ କରୋନାକୁ ଏହି ବାୟୋ ବବୁଲ ରୋକି ପାରି ନଥିଲା । ଆଇପିଏଲ ଖେଳାଳିମାନଙ୍କୁ କରୋନା ନିଜ ଜାଲରେ ଛନ୍ଦି ଦେଇଥିଲା । ଫଳରେ ୨୦୨୧ ଆଇପିଏଲ ଅଧାରୁ ବନ୍ଦ ହୋଇଗଲା ।

ଲିଗ୍ ମ୍ୟାଚ୍ ସବୁ ବାତିଲ ହେବା ପରେ ବିଦେଶୀ ଖେଳାଳିମାନେ ଏବେ ନିଜ ନିଜ ଦେଶକୁ ଫେରୁଛନ୍ତି । ଇଂଲଣ୍ଡର ୱିକେଟ୍ କିପର-ବ୍ୟାଟ୍ସମ୍ୟାନ୍ ଜୋସ୍ ବଟଲର୍ ମଧ୍ୟ ତାଙ୍କ ପରିବାର ସହିତ ଭାରତ ଛାଡ଼ି ନିଜ ଦେଶକୁ ଫେରିଛନ୍ତି । ତେବେ ଭାରତ ଛାଡିବା ପୂର୍ବରୁ ରାଜସ୍ଥାନ ରୟାଲ୍ସର ଏହି ଚାମ୍ପିଅନ୍ ଖେଳାଳି ଭାରତ ପାଇଁ ଏକ ଭାବପ୍ରବଣ ବାର୍ତ୍ତା ଲେଖିଛନ୍ତି । ଜୋସ୍ ବଟଲର ପ୍ରତ୍ୟେକ ଭାରତୀୟଙ୍କୁ କରୋନା ଗୂତାଣୁଠାରୁ ସୁରକ୍ଷିତ ରହିବା ପାଇଁ ଏବଂ ନିଜର ଯତ୍ନ ନେବା ପାଇଁ ମଧ୍ୟ କହିଛନ୍ତି ।

ଜୋସ୍ ବଟଲର୍ ସୋସିଆଲ ମିଡିଆରେ ରାଜସ୍ଥାନ ରୟାଲ୍ସର ପୁରା ଟିମ୍‌, ପତ୍ନୀ ଏବଂ ଝିଅଙ୍କ ସହ ଏକ ଫଟୋ ସେୟାର କରି ଭାରତ ପାଇଁ ଏକ ଇମୋସ୍ନାଲ ସନ୍ଦେଶ ଲେଖିଛନ୍ତି । ସେ ଲେଖିଛନ୍ତି, ‘ଭାରତ ଏକ ସ୍ୱତନ୍ତ୍ର ଦେଶ,ଯିଏ ଏବେ ଅତ୍ୟନ୍ତ କଷ୍ଟଦାୟକ ପରିସ୍ଥିତିରେ ଗତି କରୁଛି। ସବୁଥର ପରି, ଏଥରମଧ୍ୟ ମୋତେ ଏବଂ ମୋ ପରିବାରକୁ ସ୍ୱାଗତ କରିଥିବାରୁ ଧନ୍ୟବାଦ । ଦୟାକରି ସୁରକ୍ଷିତ ରୁହନ୍ତୁ ଏବଂ ନିଜର ଯତ୍ନ ନିଅନ୍ତୁ ।’

ଜୋସ୍ ବଟଲରଙ୍କ ଭଲ ପ୍ରଦର୍ଶନ

ଜୋସ୍ ବଟଲର୍ ଆଇପିଏଲ୍ ୨୦୨୧ରେ ଯେତେବେଳେ ଜବରଦସ୍ତ ଫମର୍କୁ ଫରିଥିଲେ ସେତେବେଳେ ହିଁ ଟୁର୍ଣ୍ଣାମେଣ୍ଟ ସ୍ଥଗିତ ହୋଇଗଲା । ଏହି ଡାହାଣହାତୀ ବିସ୍ଫୋରକ ବ୍ୟାଟ୍ସମ୍ୟାନ୍ ଚଳିତ ସିଜିନରେ ୭ଟି ମ୍ୟାଚ୍ ଖେଳିଥିବା ବେଳେ ୩୬.୨୮ ହାରରେ ୨୫୪ ରନ ସଂଗ୍ରହ କରିସାରିଥିଲେ । ବଟଲରଙ୍କ ବ୍ୟାଟରୁ ମୋଟ ୨୭ ଚୌକା ଓ ୧୩ ଛକା ଏହି ଟୁର୍ଣ୍ଣାମେଣ୍ଟ ଦେଖିବାକୁ ମିଳିଛି । ବଟଲରଙ୍କର ଷ୍ଟ୍ରାଇକ୍ ରେଟ୍ ମଧ୍ୟ ୧୫୩ ରହିଛି । ସବୁଠାରୁ ବଡ଼ କଥା ହେଉଛି ଜୋସ୍ ବଟଲର ମଇ’ ୨ରେ ସନରାଇଜର୍ସ ହାଇଦ୍ରାବାଦ ବିରୋଧରେ ୧୨୪ ରନର ବିସ୍ଫୋରକ ଇନିଂସ ଖେଳିଥିଲେ ଏବଂ ରାଜସ୍ଥାନ ରୟାଲ୍ସକୁ ବିଜୟ ଭେଟି ଦେଇଥିଲେ । ଏହି ସିଜିନରେ ସବୁଠାରୁ ବଡ଼ ଇନିଂସ ଖେଳିଥିବା ଏକ ମାତ୍ର ଖେଳାଳି ହେଉଛନ୍ତି ବଟଲର । ଏହାସହ ଆଇପିଏଲରେ ଏହା ତାଙ୍କର ପ୍ରଥମ ଶତକ ମଧ୍ୟ ଥିଲା ।

ଜୋସ୍ ବଟଲର ଭାରତ ଛାଡ଼ିବା ପୂର୍ବରୁ ଯୁବ ଓପନର୍ ଯଶସ୍ୱୀ ଜୈସ୍ୱାଲଙ୍କୁ ତାଙ୍କ ବ୍ୟାଟ୍ ଉପହାର ଦେଇଥିଲେ । ଯେଉଁଥିରେ ବଟଲରଙ୍କ ଅଟୋଗ୍ରାଫ୍ ମଧ୍ୟ ଥିଲା । ଏହା ସହିତ ୱିକେଟ୍ କିପର ଅନୁଜ ରାୱତଙ୍କୁ ବଟଲର ତାଙ୍କ ଗ୍ଲୋଭସ୍ ଉପହାର ଭାବେ ଦେଇଥିଲେ । ଆଶା କରାଯାଉଛି ଯେ ଆଇପିଏଲ୍ ୨୦୨୧ର ଅବଶିଷ୍ଟ ମ୍ୟାଚ୍ ଶୀଘ୍ର ଆରମ୍ଭ ହେବ ଏବଂ ପୁଣି ଥରେ ବଟଲରଙ୍କ ଫ୍ୟାନମାନେ  ତାଙ୍କ ବ୍ୟାଟିଂର ଯାଦୁ ଦେଖିପାରିବେ ।