Tragic Hospital Death: ଡାକ୍ତରଖାନାରେ ମହିଳାଙ୍କ ମୃତ୍ୟୁ, ପରିବାର ଲୋକ କହିଲେ ଦିଦିଙ୍କ ଭୁଲ୍ ଅସ୍ତ୍ରୋପଚାର ପାଇଁ…

କୁଆଁ କୁଆଁ କାନ୍ଦୁଛି ପୁଅ... ହେଲେ ମାଆ ଆଉ ଉଠୁନି କି ଆଖି ଖୋଲୁନି । ପୁଅକୁ  କୋଳେଇ ନେଇ ଗେଲ ବି କରୁନି । ମେଡିକାଲ ବେଡ୍‌ରେ ପୁଅକୁ ଜନ୍ମଦେଇ ସବୁଦିନ ପାଇଁ ଆଖି ବୁଜିଦେଇଛି ସେ । ଘର ଲୋକ କହୁଛନ୍ତି, କୁଆଡେ ଦିଦିଙ୍କ ଭୁଲ୍ ଅପରେସନ୍ ପାଇଁ ତା' ମାଆ ଆଉ ଏ ଦୁନିଆରେ ନାହିଁ । 

କାନ୍ଦ ବୋବାଳିରେ ଫାଟିପଡୁଛି ମେଡିକାଲ ।  ଛାତି ଫଟାଇ ଭୋ ଭୋ ହୋଇ କାନ୍ଦୁଛନ୍ତି ପରିବାର ଲୋକେ । ଏ ହୃଦୟ ବିଦାରକ ଘଟଣା ହେଉଛି ଯାଜପୁର ଟାଉନ ଥାନା ଅନ୍ତର୍ଗତ ମେଡିକାଲ ଛକ ନିକଟରେ ଥିବା ଏକ ଘରୋଇ ମେଡିକାଲ ପରିସରର । ଏଠି ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ଯୋଗୁଁ ଜଣେ ପ୍ରସୂତିଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ରାଗରେ ମେଡିକାଲ ଭିତରେ ଭଙ୍ଗାରୁଜା, ହୋହଲ୍ଲା କରିଛନ୍ତି ମୃତ ମହିଳାଙ୍କ ପରିବାର ଲୋକେ । ଆଉ ଏପଟେ ମାଆର ମମତା କଣ ଜାଣିବା ଆଗରୁ ମାଆ ଛେଉଣ୍ଡ ହୋଇଯାଇଛି ଏ ନିଷ୍ପାପ ନବଜାତ ଶିଶୁଟି ।

ଶିଶୁପୁତ୍ର ଜନ୍ମ ହେବା ପରେ... 

ଅଭିଯୋଗ ଅନୁସାରେ, ବରୀ ରତ୍ନଗିରି ଅଞ୍ଚଳର ଜଣେ ମହିଳା ଯାଜପୁରର ଜଣେ ମହିଳା ଡାକ୍ତରଙ୍କ ନିକଟରେ ଚିକିତ୍ସିତ ହେଉଥିଲେ ।  ସନ୍ତାନ ପ୍ରସବ ଲାଗି ତାଙ୍କୁ ଡାକ୍ତର ଏହି ଘରୋଇ ମେଡିକାଲକୁ ଆସିବାକୁ କହିଥିଲେ । ଗତକାଲି ସନ୍ଧ୍ୟାରେ ସସ୍ମିତାଙ୍କ ସିଜରିଆନ ହୋଇ ଏକ ଶିଶୁପୁତ୍ର ଜନ୍ମ ହୋଇଥିଲା । ଏହାପରେ ଡାକ୍ତର ପରିବାର ନିୟୋଜନ ଅସ୍ତ୍ରୋପଚାର କରିଥିଲେ । ଏହି ଅସ୍ତ୍ରୋପଚାର ପରେ ତାଙ୍କର ସ୍ବାସ୍ଥ୍ୟାବସ୍ଥା ବିଗିଡି ଯାଇଥିଲା ଓ ପରେ ମୃତ୍ୟୁ ହୋଇଥିଲା । ଡାକ୍ତରଙ୍କ ଭୁଲ୍ ଅସ୍ତ୍ରୋପଚାର ଯୋଗୁଁ  ମହିଳାଙ୍କ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକ । ଏହାକୁ ନେଇ ମେଡିକାଲ ପରିସରରେ ପ୍ରବଳ ଉତ୍ତେଜନା ସୃଷ୍ଟି ହୋଇଛି । 

ସେପଟେ ଅସ୍ତ୍ରୋପଚାରରେ କୌଣସି ତ୍ରୁଟି ନଥିବା କଥା କହିଛନ୍ତି ଚିକିତ୍ସା କରିଥିବା ଡାକ୍ତର । ମେଡିକାଲର ମାଲିକ ମଧ୍ୟ ତ୍ରୁଟିପୂର୍ଣ୍ଣ ଚିକିତ୍ସା ଜନିତ ମୃତ୍ୟୁ ଅଭିଯୋଗକୁ ଖଣ୍ଡନ କରିଛନ୍ତି । ହେଲେ ମୃତକଙ୍କ ପରିବାର ପକ୍ଷରୁ ମେଡିକାଲ ବିରୋଧରେ ଥାନାରେ ଏତଲା ଦିଆଯିବା ସହ ନ୍ୟାୟ ଦାବି କରାଯାଇଛି ।