ନରମିଲା ସେସୁ, ହେବନି ବିଦ୍ୟୁତ କାଟ୍‌

ଭୁବନେଶ୍ୱର : ବିରୋଧୀଦଳ ଗୁଡ଼ିକର ଜୋରଦାର ବିରୋଧ ପରେ ବିଦ୍ୟୁତ ବଣ୍ଟନକାରୀ ସଂସ୍ଥା ସେସୁ ଆଜି ନରମ ଆଭିମୁଖ୍ୟ ପୋଷଣା କରିଛି। ବିଦ୍ୟୁତ ବିଲ୍ ବକେୟା ରଖିଥିବା ଗ୍ରାହକଙ୍କର ବିଦ୍ୟୁତ ସଂଯୋଗକୁ ଆସନ୍ତା ୧୬ତାରିଖରୁ କାଟିବା ନିମନ୍ତେ ସେସୁ କରିଥିବା ଘୋଷଣାରୁ ଆଜି ଓହରି ଯାଇଛି। ପର୍ଯ୍ୟାୟକ୍ରମେ ଏହି ବିଦ୍ୟୁତ ସଂଯୋଗ କାଟ୍ କରାଯିବ ବୋଲି ସେସୁ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ପ୍ରଥମେ ବିଦ୍ୟୁତ୍ ବିଲ୍ ବକେୟା ରଖିଥିବା ଶିଳ୍ପ ସଂସ୍ଥା ଓ ବ୍ୟବସାୟିକ ପ୍ରତିଷ୍ଠାନର ବିଦ୍ୟୁତ ସଂଯୋଗ କାଟିବା ପରେ ସର୍ବଶେଷରେ ସାଧାରଣ ଗ୍ରାହକଙ୍କ ବିଦ୍ୟୁତ କଟାଯିବ ବୋଲି ସଫେଇ ଦେଇଛି।

ଏକ ପ୍ରେସ୍ ରିଲିଜ୍ ଜାରି କରି ସେସୁ କହିଛି ଯେ, ଜାନୁୟାରୀ ୧୬ତାରିଖରୁ ବିଲ୍ ଖିଲାପକାରୀ ଗ୍ରାହକଙ୍କ ବିଦ୍ୟୁତ ସଂଯୋଗ କାଟିବା ଅଭିଯାନ ଆରମ୍ଭ ନିମନ୍ତେ ସେସୁ ପକ୍ଷରୁ ଡିସେମ୍ବର ୧୦ତାରିଖରେ ଘୋଷଣା କରାଯାଇଥିଲା। ୨୦୧୯ ନଭେମ୍ବର ଶେଷ ସୁଦ୍ଧା ପ୍ରାୟ ୭ଲକ୍ଷ ଗ୍ରାହକଙ୍କ ଉପରେ ୧୯୭୧କୋଟି ଟଙ୍କା ବାକି ରହିଛି। ବିଦ୍ୟୁତ ସଂଯୋଗ କାଟିବା ପାଇଁ ଚେତାବନୀ ଦିଆଯିବା ପରେ ପ୍ରାୟ ୧ଲକ୍ଷ ଗ୍ରାହକ ସେମାନଙ୍କର ବିଦ୍ୟୁତ ବକେୟା ପୈଠ କରିଛନ୍ତି।

ବହୁସଂଖ୍ୟକ ଗ୍ରାହକ ମଧ୍ୟ ସେମାନଙ୍କର ବକେୟା ପୈଠ ପାଇଁ ଅଧିକ କିଛି ସମୟ ଦେବାକୁ ଅନୁରୋଧ କରିଥିଲେ। ବହୁ ଗ୍ରାହକ ବିଦ୍ୟୁତ ବିଲରେ ତ୍ରୁଟି ଥିବାରୁ ତାକୁ ସଂଶୋଧନ କଲେ ବିଲ୍ ପୈଠ କରିବେ ବୋଲି କହିଥିଲେ। ତେଣୁ ଏହାକୁ ଦୃଷ୍ଟିରେ ରଖି ସେସୁ ପ୍ରଥମ ପର୍ଯ୍ୟାୟରେ ଖିଲାପୀ ବ୍ୟବସାୟିକ ପ୍ରତିଷ୍ଠାନଗୁଡ଼ିକର ବିଦ୍ୟୁତ ସଂଯୋଗ କରିବ ବୋଲି ସୂଚନା ଦେଇଛି।

ଦ୍ୱିତୀୟ ପର୍ଯ୍ୟାୟରେ ଅଧିକ ପରିମାଣର ବିଦ୍ୟୁତ ବିଲ୍ ବକେୟା ରଖିଥିବା ଘରୋଇ ଗ୍ରାହକଙ୍କ ବିଦ୍ୟୁତ ସଂଯୋଗ କରାଯିବ। ଯେଉଁମାନଙ୍କର ଅଧିକ ବିଦ୍ୟୁତ ବିଲ୍ ଆସୁଥିବ ଓ ଏସି, ଚାରିଚକିଆ ଯାନ ସହ ବହୁତଳ ପ୍ରାସାଦରେ ରହୁଥିବେ। ଶେଷରେ ସାଧାରଣ ଗ୍ରାହକଙ୍କ ବିଦ୍ୟୁତ କାଟ ଅଭିଯାନ ଆରମ୍ଭ ହେବ। ଏଥିରେ ବିଶେଷକରି ଯେଉଁ ଗ୍ରାହକମାନେ ବର୍ଷବର୍ଷ ଧରି ବିଲ୍ ବକେୟା ରଖିଥିବେ ସେମାନଙ୍କର ସଂଯୋଗ ଛିନ୍ନ କରାଯିବ।

ସୂଚନାଯୋଗ୍ୟ, ବିଦ୍ୟୁତ ସଂଯୋଗ ଛିନ୍ନ ପାଇଁ ସେସୁର ଚେତାବନୀ ପରେ କଂଗ୍ରେସ ପକ୍ଷରୁ ରାଜରାସ୍ତାରେ ଆନ୍ଦୋଳନ ନିମନ୍ତେ ଧମକ ଦିଆଯାଇଥିଲା। ବିଜେପି ମଧ୍ୟ ଆଜି ସାମ୍ବାଦିକ ସମ୍ମିଳନୀ କରି ସେସୁର ଏଭଳି ଦାଦାଗିରିକୁ ବିରୋଧ କରିବା ସହ ବିଦ୍ୟୁତବଣ୍ଟନକାରୀ ସଂସ୍ଥା ଉପରେ ଗ୍ରୀଡକୋର ବକେୟା କାହିଁକି ଆଦାୟ କରାଯାଉନି ବୋଲି ପ୍ରଶ୍ନ କରିଥିଲା। ଅନ୍ୟ ଦଳଗୁଡ଼ିକ ମଧ୍ୟ ସେସୁର ଏପରି ନୀତିକୁ ବିରୋଧ କରିବା ପରେ କମ୍ପାନୀ ପକ୍ଷରୁ ଆଜି ଏଭଳି ପ୍ରେସ୍ ରିଲିଜ୍ ଜାରି କରାଯାଇଛି।