୧୦୦ ଟଙ୍କା ପାଇଁ କୁଳପତିଙ୍କୁ ହତ୍ୟା କରି ବନ୍ଧା ହେଲେ

ସମ୍ବଲପୁର: ଗିରଫ ହୋଇଛି ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ଧ୍ରୁବରାଜ ନାୟକଙ୍କ ହତ୍ୟା ଘଟଣାର ଅଭିଯୁକ୍ତ । ସ୍ଥାନୀୟ ପୋଲିସ ତାଙ୍କୁ ଗିରଫ କରିଛି।  ଗିରଫ ଅଭିଯୁକ୍ତଙ୍କ ନାଁ ପ୍ରବୀଣ ଧରୁଆ।

ଗିରଫ ପ୍ରବୀଣଙ୍କ ଘର ଲଇକେରା ବ୍ଲକ କୁଅଁରମାଲରେ।  ଧ୍ରୁବରାଜଙ୍କ ପୋଖରୀରେ ମାଛ ଚାଷକୁ କେନ୍ଦ୍ର କରି ଏଭଳି ଘଟଣା ଘଟିଥିବା ସୂଚନା ମିଳିଛି । ଗତକାଲି ଧ୍ରୁବରାଜ ନାୟକଙ୍କୁ ନୃଶଂସ ଭାବେ ଟାଙ୍ଗିଆରେ ହାଣି ହତ୍ୟା କରିଥିଲା ପ୍ରବୀଣ ।

ସୂଚନା ଅନୁସାରେ,  ପ୍ରଫେସର ଧ୍ରୁବରାଜ ନାୟକ ଝାରସୁଗୁଡ଼ା ଲଇକେରା ଥାନା କୁଅଁରମାଲ ସରଗିଗୁଡ଼ା ସ୍ଥିତ ତାଙ୍କ ଘରେ ଥିଲେ। ହଠାତ୍‌  ପ୍ରବୀଣ ଟାଙ୍ଗିଆ ନେଇ ତାଙ୍କ ବେଡ୍ରୁମକୁ ପଶି ଆସିଥିଲା। ଅଭିଯୁକ୍ତ ଧ୍ରୁବରାଜଙ୍କୁ ଶହେ ଟଙ୍କା ଦେବାକୁ ଦାବି କରିଥିଲା ।  ଏହି ଘଟଣାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା ।

ହଠାତ ଅଭିଯୁକ୍ତ ଜଣକ ପ୍ରଫେସର ଧ୍ରୁବରାଜଙ୍କୁ ଟାଙ୍ଗିଆରେ ଆକ୍ରମଣ କରିଥିଲା। ମୃତ ଧ୍ରୁବରାଜଙ୍କ ଭାଇ ଦେଇଥିବା ସୂଚନା ଅନୁସାରେ, ତାଙ୍କୁ ପ୍ରଥମେ ଗୁରୁତର ଅବସ୍ଥାରେ ଝାରସୁଗୁଡ଼ାର ଏକ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।

ଲଇକେରା ଥାନା ପୋଲିସ ଅଭିଯୁକ୍ତ ପ୍ରବୀଣଙ୍କୁ ଗତକାଲି ଧରି ଥାନାରେ ଅଟକ ରଖିଥିଲା। ଜେରା ପରେ ତାକୁ ଗିରଫ କରିଛି।