ବିପଦକୁ ଆଗୁଆ ବାରିପାରିଲା ରକ୍ସି, ମାଲିକ ଆଉ ଗାଁ ଲୋକଙ୍କ ବଞ୍ଚାଇଲା ଜୀବନ

ଢ଼େଙ୍କାନାଳ(ରାଜଶ୍ରୀ ଶତପଥୀ): କୁହାଯାଏ ମଣିଷ ଆଉ କୁକୁର ଅତି ନିକତର ବନ୍ଧୁ । କୁକୁର ନିଜ ମାଲିକ ପ୍ରତି କେବେ ବି ଧୋକା ଦେଇନଥାଏ । ଆହୁରି କୁହାଯାଏ ପଶୁମାନେ ଆସୁଥିବା ବିପଦକୁ ଆଗୁଆ ବାରିପାରନ୍ତି । ଠିକ୍ ଏମିତି ଏକ ଘଟଣା ଏବେ ସାମ୍ନାକୁ ଆସିଛି । ବିପଦକୁ ଆଗୁଆ ବାରିପାରିଥିଲା ରକ୍ସି । ଯାହାଫଳରେ ତା’ର ମାଲିକ ଆଉ ଗାଁ ଲୋକଙ୍କ ଜୀବନ ବଞ୍ଚିଥିଲା ।

କୁକୁର ଯୋଗୁଁ ଜଙ୍ଗଲୀ ହାତୀ କବଳରୁ ବଞ୍ଚିଗଲେ ମାଲିକ ଓ ଗ୍ରାମବାସୀ । ଏହି ଘଟଣା ଘଟିଛି ଢେଙ୍କାନାଳ ଜିଲ୍ଲା ନିହଲ ପ୍ରସାଦ ଥାନା ଅନ୍ତର୍ଗତ ଖଙ୍କିରା ଗାଁରେ । ପ୍ରାତଃ ଭ୍ରମଣ ସମୟରେ ଗ୍ରାମରେ ଥିବା ପଡ଼ିଆ ନିକଟସ୍ଥ ଜଙ୍ଗଲରେ ଲୁଚି ରହିଥିବା ହାତୀପଲଙ୍କ ସୂଚନା ପାଇ ନିଜ ମାଲିକଙ୍କୁ ଅଟକାଇଥିଲା କୁକୁର ରକ୍ସି ।

ଗାଁର ଯୁବକ ମନୋଜ ବ୍ରହ୍ମା ପ୍ରତିଦିନ ଭଳି ନିଜ ପୋଷା କୁକୁର ସହିତ ନିକଟସ୍ଥ ପଡ଼ିଆକୁ ପ୍ରାତଃ ଭ୍ରମଣ ପାଇଁ ଯାଇଥିଲେ । ହଠାତ୍ କୌଣସି ଅଘଟଣର ସନ୍ଧାନ ପାଇ କୁକୁର ରକ୍ସି ଆଉ ଆଗକୁ ଆଗେଇନଥିଲା । ନିଜ ମାଲିକଙ୍କୁ ମଧ୍ୟ ବାରଣ କରିଥିଲା । କୁକୁର ପ୍ରବଳ ଭୁକିବା ଫଳରେ ନିକଟ ଜଙ୍ଗଲରେ ଲୁଚି ରହିଥିବା ହାତୀପଲ ବାହାରକୁ ବାହାରି ଆସିଥିଲେ ।

ଫଳରେ ପାଖରେ ଥିବା ଅନେକ ଗ୍ରାମବାସୀ ମଧ୍ୟ ଜୀବନ ବିକଳରେ ଦୌଡିଥିଲେ । କିଛି ସମୟ ହାତୀ-ମଣିଷ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଏହାପରେ ହାତୀ ପଲ ଜଙ୍ଗଲ ଅଭିମୁଖେ ପଳାଇଥିଲେ । ଫଳରେ ଜଙ୍ଗଲୀ ହାତୀଙ୍କ କବଳରୁ ନିଜ ମାଲିକ ଓ ଗ୍ରାମବାସୀଙ୍କ ଜୀବନ ବଞ୍ଚାଇବାରେ ସକ୍ଷମ ହୋଇଥିଲା ରକ୍ସି ।