Four Helpless Children: ଦୁଃଖର ପାହାଡ ତଳେ କଅଁଳ ବୟସ , ଏମିତି ଦୁଃଖ କାହାକୁ ନମିଳୁ

ମାଆ ଚାଲି ଯାଇଥିଲା, ଏକମାତ୍ର ସାହାଭରଷା ବାପାକୁ ବି ଛଡାଇନେଲା ଦଇବ । ଆଉ ଦାୟିତ୍ୱର ପାହାଡ ଅଜାଡି ଦେଲା ଏଇ କୋମଳ କାନ୍ଧରେ । ଆକାଶ... ବୟସ ବେଶୀ ନୁହେଁ । ହେଲେ ଦାୟିତ୍ୱ ବଡ଼ । ଖେଳକୁଦ ବୟସରେ ତା' ଉପରେ ୩ କୁନି କୁନି ଭାଇଭଉଣୀଙ୍କର ବୋଝ  । ଭିନ୍ନକ୍ଷମ ଭଉଣୀଙ୍କ ଦାୟିତ୍ୱ ନେବ, ସାନ ଭାଇକୁ ମଣିଷ କରିବ । ସେଥିପାଇଁ କେବେଠୁ ପାଠ ଛାଡିଦେଇଛି ସେ । ପର ଘରେ ମୂଲ ମଜୁରୀ ଲାଗୁଛି । ଏହି ୪ ଅସହାୟ ପିଲାଙ୍କ ଦୁଃଖ ଶୁଣିଲେ ଆପଣଙ୍କର ବି ହୃଦୟ କାନ୍ଦିବ ।

କେନ୍ଦୁଝର ଜିଲ୍ଲା ଚମ୍ପୁଆ ଗୋଧୂଳି ଗାଁର କୁନି କୁନି ୪ ଅସହାୟ ପିଲା । ଦଇବ ଦାଉ ଯେମିତି ସାଧିଛି ଏମାନଙ୍କ ଉପରେ । ୩ ବର୍ଷ ତଳେ ଜନ୍ମକଲା ମାଆ କୁଆଡେ ଚାଲିଗଲା । ମୂଲ ମଜୁରୀ କରି ୪ ପିଲାଙ୍କୁ ପୋଷୁଥିଲେ ବାପା ପଟେଲ । ହେଲେ ସପ୍ତାହେ ହେବ ବାପା ବି ଆରପାରିରେ  । ଆଉ ବାପା ଚାଲିଯିବା ପରେ ୩ ଭାଇଭଉଣୀଙ୍କ ଦାୟିତ୍ୱ ଏବେ ବଡ ପୁଅ ଆକାଶ କାନ୍ଧରେ । ସେ ମୂଲ ଲାଗିଲେ ଘର ଚଳୁଛି । ଆଉ ଏଇ ଭଙ୍ଗା ଝାଟି ମାଟି ଘରଟିଏ ହିଁ ଏହି ଅସହାୟ ୪ ପିଲାଙ୍କ ଆଶ୍ରୟ ।

ଆକାଶର ଦୁଇ ଭଉଣୀ ଲିତୁ ଓ ମିକି ଜନ୍ମରୁ ଭିନ୍ନକ୍ଷମ । ଜଣଙ୍କର ଦୁଇ ହାତ ଅର୍କମଣ୍ୟ ଥିବାବେଳେ ଲିତୁର କାନକୁ ଭଲରେ ଶୁଭେନି । ସାନ ଭାଇ ବିଷ୍ଣୁକୁ ମାତ୍ର ୬ ବର୍ଷ ବୟସ । ମାଆବାପାଙ୍କ ସ୍ନେହ କଣ ସେ ଜାଣିଲା ନାହିଁ । ବାପାମାଆ ଚାଲିଯିବା ପରେ ଏକା ହୋଇଯାଇଛନ୍ତି ଏହି ୪ ପିଲା । ଆକାଶ ହିଁ ନିଜ ଭାଇଭଉଣୀଙ୍କ ପାଇଁ ବାପା ଆଉ ମାଆ । ମାଆ ପରି ଯତ୍ନ ନେଉଛି ଆଉ ବାପା ପରି ଦୁଃଖ କଷ୍ଟ ସହି ସାହାରା ସାଜିଛି । ମୂଲ ଲାଗି ଦି' ମୁଠା ଦାନା ଯୋଗାଡ କରୁଛି  । କିନ୍ତୁ କ'ଣ ଏମାନଙ୍କର ଭବିଷ୍ୟତ ? କେମିତି ଏତେ ବଡ ଦୁନିଆରେ ବଞ୍ଚିବେ ଏ ପିଲା ?

ପ୍ରଶାସନ ଏହି ୪ ଅସହାୟ ପିଲାଙ୍କ ପ୍ରତି ଦୃଷ୍ଟିଦେଇ ଥଇଥାନ କରିବାକୁ ଦାବି କରିଛନ୍ତି ଗ୍ରାମବାସୀ । ଚମ୍ପୁଆ ଏନଏସି ଅଧ୍ୟକ୍ଷ ଗିରିଜା ଶଙ୍କର ସାହୁ ବି ଏହି ଚାରି ପିଲାଙ୍କ ଥଇଥାନ ପାଇଁ ତୁରନ୍ତ ପଦକ୍ଷେପ ନେବେ ବୋଲି ଜଣାଇଛନ୍ତି ।