LIVE TV
ବାତ୍ୟା ‘ଦାନା’ର ମୁକାବିଲା ପାଇଁ ଗ୍ରାଉଣ୍ଡ ଜିରୋରେ ବଡ଼ ତୟାରୀ । କେନ୍ଦ୍ରାପଡ଼ାରୁ ଭଦ୍ରକ, ବାଲେଶ୍ୱରରୁ ଜଗତସିଂହପୁର । ପ୍ରଭାବିତ ହେବାକୁ ଥିବା ଜିଲ୍ଲାଗୁଡ଼ିକରେ ଛାଇଯାଇଛନ୍ତି ରେସ୍କ୍ୟୁ ଟିମ୍ । ମିଶନ୍ ଜିରୋ କାଜୁଆଲିଟି ମୋଡରେ ରହିଛନ୍ତି ନୌସେନାଠୁ ଆରମ୍ଭ କରି NDRF, ODRAF ଏବଂ ଅଗ୍ନିଶମ ବାହିନୀ । ବାତ୍ୟାରେ ୧୧ଟି ଜିଲ୍ଲା ପ୍ରଭାବିତ ହେବାକୁ ଥିବା ବେଳେ ଧନଜୀବନର ସୁରକ୍ଷାକୁ ପ୍ରାଥମିକତା ଦେଇ ୪ ଲକ୍ଷ ଲୋକଙ୍କୁ ବାତ୍ୟା ଆଶ୍ରୟସ୍ଥଳୀରେ ରଖିବାକୁ ଯୋଜନା ଥିବା ରାଜସ୍ୱ ମନ୍ତ୍ରୀ ସୂଚନା ଦେଇଛନ୍ତି ।
ସୁ ସୁ ଗର୍ଜନ କରି ସ୍ଥଳଭାଗ ମୁହାଁ ଭୀଷଣ ବାତ୍ୟା ‘ଦାନା’... ଆଉ ମାତ୍ର କେଇ ଘଣ୍ଟା ପରେ ସମୁଦ୍ର ଗର୍ଭରୁ ଆସି ମାଡ଼ ହେବ ଭୂଖଣ୍ଡରେ... ତା’ପୂର୍ବରୁ ତାଉ ଦେଖାଉ ଥିବାବେଳେ ଧନ ଜୀବନର ସୁରକ୍ଷା ପାଇଁ ଚାଲିଛି ମିଶନ୍ ‘ଜିରୋ କାଜୁଆଲିଟି’ । ଧାମରାରେ କାହା ଘର ଚାଳ ଛପର ତ ଆଉ କାହା ଘର ଝାଟିମାଟିର ।
ତଳିଆ ଅଞ୍ଚଳର ଗାଁକୁ ଯିବା ସହ ଲୋକଙ୍କୁ ବୁଝାଇ ସୁଝାଇ ସରକାରୀ ଯାନ ବାହନରେ ବାତ୍ୟା ଆଶ୍ରୟସ୍ଥଳୀକୁ ନେଇଛି ପୋଲିସ । କିଛି ଲୋକ ନିଜ ନିଜ ବାଇକରେ ଅତ୍ୟାବଶ୍ୟକ ସାମଗ୍ରୀ ଧରି ଯାଉଛନ୍ତି ବାତ୍ୟା ଆଶ୍ରୟସ୍ଥଳୀକୁ । ଜଣେ ଅସୁସ୍ଥ ବ୍ୟକ୍ତିମାନଙ୍କୁ ରେଡକ୍ରସ୍ ପକ୍ଷରୁ ଉଦ୍ଧାର କରି ସେଲଟର୍ ସେଣ୍ଟରକୁ ନିଆଯାଉଛି । ଏଭଳି ଭାବେ ଭଦ୍ରକ ଜିଲ୍ଲାରେ ୧୩ ହଜାରରୁ ଅଧିକ ଲୋକଙ୍କୁ ସ୍ଥାନାନ୍ତରଣ କରାଗଲାଣି ।
Also Read
କାଳେ ବର୍ଷା ପବନ ହେଲେ ଚାଳ ଉଡ଼ିଯିବ, ମାଟି କାନ୍ଥ ଭୁଶୁଡ଼ି ଯିବ, ସେହି ଆଶଙ୍କାରେ ଆଶ୍ରୟସ୍ଥଳକୁ ଯିବାକୁ ନାରାଜ ଭିତରକନିକା ବଗପାଟିଆ ଗାଁର ପରିବାର । ସମାନ ଚିତ୍ର କେନ୍ଦ୍ରାପଡ଼ା ସମୁଦ୍ରକୂଳ ପେଣ୍ଠର । କଚ୍ଚା ଘରେ ଅସୁରକ୍ଷିତ ଅବସ୍ଥାରେ ଥିଲେ ବି ଲୋକେ ବାତ୍ୟା ଆଶ୍ରୟସ୍ଥଳୀକୁ ଯାଉନାହାନ୍ତି ।
ସାତଭାୟାରେ ଗାଁକୁ ଖାଲି କରିଛି ଜିଲ୍ଲା ପ୍ରଶାସନ । କାରଣ ବାତ୍ୟା ଆସିବା ଆଗରୁ ସବୁ ଗାଁକୁ ଗିଳିସାରିଛି ସମୁଦ୍ର । କେନ୍ଦ୍ରାପଡ଼ା ଜିଲ୍ଲାର ୧୨ଟି ସ୍ଥାନରେ ଧନଜୀବନର ସୁରକ୍ଷା ପାଇଁ ଓଡ୍ରାଫ୍, ଏନଡିଆରଏଫ ଓ ଅଗ୍ନିଶମ ଟିମ୍ ମୁତୟନ ରଖା ଯାଇଥିବା ବେଳେ ୫୯୬ ଆଶ୍ରୟସ୍ଥଳରେ ଶୁଖିଲା ଏବଂ ରନ୍ଧାଖାଦ୍ୟର ବନ୍ଦୋବସ୍ତ କରାଯାଇଛି ।
୩୭୬ଟି ସମ୍ବେଦନଶୀଳ ଗାଁ ଉପରେ ବିଶେଷ ନଜର ରଖିଛି ଜିଲ୍ଲା ପ୍ରଶାସନ । ତା’ସହ କେନ୍ଦ୍ରାପଡ଼ା ପୋଲିସ ପକ୍ଷରୁ ଜାରି ହୋଇଛି ହେଲପଲାଇନ ନମ୍ବର । ଏସବୁ ଭିତରେ ରାଜନଗର ବ୍ଲକ ଭିତରକନିକା ନିକଟ ପେଣ୍ଠକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ ।
ବାଲେଶ୍ୱର ଜିଲ୍ଲାରେ ମୋଟ୍ ୧୪୪ଟି ବାତ୍ୟା ଆଶ୍ରୟସ୍ଥଳୀ ସହ ବହୁ ସ୍କୁଲ୍ ଘରେ ୩୦ ହଜାରରୁ ଅଧିକ ଲୋକଙ୍କୁ ରଖାଗଲାଣି । ସେହିପରି ଜଗତସିଂହପୁର ଜିଲ୍ଲାର ପାରାଦୀପ ପୌରାଞ୍ଚଳ, ବାଲିକୁଦା, ଏରସମା ଓ କୁଜଙ୍ଗ ଅଂଚଳରେ ବି ପ୍ରାୟ ସରିଆସିଲାଣି ଉଦ୍ଧାର କାର୍ଯ୍ୟ । ଏପଟେ ମୟୁରଭଞ୍ଜ ଜିଲ୍ଲା ଉଦଳାର କାଳ ଡ୍ୟାମ ଟାପୁରୁ ଫସି ରହିଥିବା ମତ୍ସ୍ୟଜୀବୀଙ୍କୁ ଉଦ୍ଧାର କରିଛି ଓଡ୍ରାଫ୍ ଟିମ୍ ।
ତେଣେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୂଚନା ଦେଇ କହିଛନ୍ତି, ବାତ୍ୟା ୧୧ଟି ଜିଲ୍ଲାକୁ ପ୍ରଭାବିତ କରିବ । ବିଶେଷ ପ୍ରଭାବିତ ହେବ ବାଲେଶ୍ୱର, ଭଦ୍ରକ ଏବଂ କେନ୍ଦ୍ରାପଡ଼ା । ୧୧ ଜିଲ୍ଲାର ୬୦ ବ୍ଲକର ୨୧୩୧ ଗାଁ, ୧୨ଟି ପୌରାଞ୍ଚଳର ପ୍ରାୟ ୫୫ ୱାର୍ଡ ପ୍ରଭାବିତ ହେବ । ତେଣୁ ପ୍ରାୟ ୪ ଲକ୍ଷ ଲୋକ ସ୍ଥାନାନ୍ତର ପାଇଁ ଯୋଜନା ଥିବାବେଳେ ଏଯାବତ ସାଢ଼େ ୩ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇଛି ।
୭୩୦୭ ଆଶ୍ରୟସ୍ଥଳୀ ପ୍ରସ୍ତୁତ କରି ଲୋକଙ୍କୁ ରଖାଯାଉଛି । ସେହିପରି ୩୭୦୦ ଆସନ୍ନ ପ୍ରସବାଙ୍କୁ ହସ୍ପିଟାଲରେ ରଖା ଯାଇଥିବା ବେଳେ NDRF ୧୯, ଓଡ୍ରାଫ୍ ୫୧ ଏବଂ ୨୨୦ଟି ଅଗ୍ନିଶମ ଟିମ୍ ପ୍ରସ୍ତୁତ ଥିବା କହିଛନ୍ତି ମନ୍ତ୍ରୀ । ଏପଟେ ନୌସେନା ମଧ୍ୟ ୨ଟି ଜାହାଜକୁ ପ୍ରସ୍ତୁତ ରଖିଥିବା କହିଛି ।
