Vastu Tips: ଏହି ବାସ୍ତୁଦୋଷ ଦେଇଥାଏ ସରକାରୀ ଚାକିରିରେ ଅସଫଳତା

ଆମ ବ୍ରହ୍ମାଣ୍ଡ କହିଲେ ଆମ ସୌରମଣ୍ଡଳ ଯଥା- ସମସ୍ତ ଗ୍ରହ, ନକ୍ଷେତ୍ର ଏବଂ ପଞ୍ଚଭୂତ ଯଥା- ଆକାଶ, ବାୟୁ, ଅଗ୍ନି, ଜଳ ଓ ପୃଥିବୀ ଆଦିକୁ ବୁଝିଥାଉ । ଏହି ସମସ୍ତଙ୍କ ଶକ୍ତି ପୃଥିବୀ ପୃଷ୍ଠରେ ଥିବା ସମସ୍ତ ସଜୀବ ଓ ନିର୍ଜୀବ ବସ୍ତୁକୁ ପ୍ରଭବାବିତ କରିଥାଏ । ଏହି ପ୍ରଭାବକୁ ଆମ ମୁନିଋଷିମାନେ ଠିକ୍ ଭାବରେ ବୁଝିପାରି ଜନହୀତ ପାଇଁ ଦୁଇଟି ଶାସ୍ତ୍ର ରଚନା କରିଥିଲେ । ପ୍ରଥମ ଶାସ୍ତ୍ର ଜୈତିଷଶାସ୍ତ୍ର ଏବଂ ଅନ୍ୟଟି ବାସ୍ତୁଶାସ୍ତ୍ର ।

ବାସ୍ତୁଶାସ୍ତ୍ର ହେଉଛି ଭଲ ଗୃହ ନିର୍ମାଣର ଶିକ୍ଷା । ଯେଉଁ ଗୃହ ବାସ୍ତୁଶାସ୍ତ୍ର ନିୟମରେ ନିର୍ମାଣ ହୋଇଥିବ, ସେହିଘରେ ବସବାସ କଲେ ସୁଖ ସମୃଦ୍ଧି ଲାଭ ହୋଇଥାଏ । ଆଦିମ କାଳରୁ ସୂର୍ଯ୍ୟଙ୍କୁ ଆମେ ଦେବତା ପରି ପୂଜା କରୁଛୁ । ସୂର୍ଯ୍ୟ ହେଉଛନ୍ତି ସୌରମଣ୍ଡଳର ରାଜା । ସୂର୍ଯ୍ୟ ଆମକୁ ଉତ୍ତାପ ଏବଂ ଆଲୋକ ପ୍ରଦାନ କରିଥାଏ । ସୂର୍ଯ୍ୟ ବିନା ଏ ଜୀବଜଗତ ଅସମ୍ଭବ । ଏଣୁ ଗୃହ ନିର୍ମାଣ କଲାବେଳେ ସୂର୍ଯ୍ୟଙ୍କ ଆଲୋକ ଏବଂ ଉତ୍ତାପ ଯେପରି ଗୃହ ମଧ୍ୟକୁ ଆସିବ ସେଥିପାଇଁ ଗୃହରେ ନିଶ୍ଚିତ ଭାବରେ ବ୍ୟବସ୍ଥା ଥିବା ଦରକାର ।

ସୂର୍ଯ୍ୟଙ୍କ ଚତୁଃପାଶ୍ୱର୍ରେ ଅନେକ ଗ୍ରହ ଉପଗ୍ରହ ନିରନ୍ତର ଘୁରୁଛନ୍ତି । ସୂର୍ଯ୍ୟଙ୍କ ଆଲୋକରେ ସମସ୍ତେ ଆଲୋକିତ ହୁଅନ୍ତି । ସେମାନଙ୍କ ମଧ୍ୟରୁ ପୃଥିବୀ ଗୋଟିଏ ଗ୍ରହ ଯେଉଁଠାରେ ଜୀବଜଗତର ସତ୍ତା ଅଛି । ଅନ୍ୟଗ୍ରହ ଯଥା- ବୁଧ,ଶୁକ୍ର ଆଦି ସୂର୍ଯ୍ୟଙ୍କର ନିକଟବର୍ତ୍ତୀ ଥିବାରୁ ଏହି ଗ୍ରହମାନେ ଅତ୍ୟନ୍ତ ଉତ୍ତତ୍ପ । ଏଣୁ ଏହି ଗ୍ରହମାନଙ୍କରେ ଜୀବଜଗତ ସୃଷ୍ଟି ହେବା ଅସମ୍ଭବ । ବୃହଷ୍ପତି, ଶନି ଗ୍ରହମାନେ ସୂର୍ଯ୍ୟଙ୍କ ଠାରୁ ଅନେକ ଦୂରରେ ଥିବା ଯୋଗୁଁ ସେହି ଗ୍ରହରେ ପ୍ରବଳ ଥଣ୍ଡା ଦ୍ୱାରା ପ୍ରାଣୀ ଜଗତ ପାଇଁ ଠିକ୍ ନୁହେଁ । ଫଳରେ ସେଠାରେ ଜୀବଜଗତର କୌଣସି ସତ୍ତା ନାହିଁ ।

ସୂର୍ଯ୍ୟଙ୍କ ପ୍ରଭାବ ଗ୍ରହ ଏବଂ ଗୃହରେ ପଡ଼ିଥାଏ । ଯଦି ସୂର୍ଯ୍ୟଙ୍କ ଶୁଭଦୃଷ୍ଟି ଗୃହ ଉପରେ ନ ରୁହେ ତେବେ ସେହି ଗୃହରେ ଅନେକ ସମସ୍ୟା ସୃଷ୍ଟି ହୋଇଥାଏ । ଯେଉଁ ଗୃହରେ ସୂର୍ଯ୍ୟଙ୍କ ଶୁଭଦୃଷ୍ଟି ବା ଶୁଭ ପ୍ରଭାବ ପଡ଼ିଥାଏ ସେହି ଗୃହରେ ଯଦି ବି ଅନ୍ୟ କିଛି ଛୋଟ ଛୋଟ ବାସ୍ତୁଦୋଷ ଥାଏ ତେବେ ସୂର୍ଯ୍ୟଙ୍କର ଶୁଭ ପ୍ରଭାବ ଯୋଗୁଁ ସେହି ବାସ୍ତୁଦୋଷ ନଷ୍ଟ ହୋଇଯାଇଥାଏ । ଗୃହରେ ମୁଖ୍ୟଦ୍ୱାରା ଯେଉଁ ଦିଗ ବା କୋଣରେ ଥାଏ ସେହି ଦିଗ ବା କୋଣର ଅଧିପତି ଗ୍ରହଙ୍କ ପ୍ରଭାବ ସେହି ଗୃହରେ ଅଧିକ ପଡ଼ିଥାଏ ।

ବାସ୍ତୁଶାସ୍ତ୍ରରେ ପୂର୍ବ ଦିଗର ଅଧିପତି ଗ୍ରହ ହେଉଛନ୍ତି ସୂର୍ଯ୍ୟ । ଏଣୁ ଯେଉଁ ଗୃହର ମୁଖ୍ୟଦ୍ୱାରା ପୂର୍ବପଟରେ ଥାଏ ସେହି ଗୃହଟି ବେଶି ସୂର୍ଯ୍ୟଙ୍କ ଦ୍ୱାରା ପ୍ରଭାବିତ ହୋଇଥାଏ । ଯଦି ପୂର୍ବଦିଗରେ ଯଥା ସ୍ଥାନରେ ମହାଦ୍ୱାର ଥାଏ ତେବେ ସୂର୍ଯ୍ୟଙ୍କର ଶୁଭଫଳ ପ୍ରାପ୍ତ ହୋଇଥାଏ ଠିକ୍ ସେହିପରି ଯଦି ପୂର୍ବାଭିମୁଖୀ ଗୃହର ମୂଖ୍ୟଦ୍ୱାର ଠିକ୍ ସ୍ଥାନରେ ନଥାଏ, ତେବେ ସୂର୍ଯ୍ୟଙ୍କ ଅଶୁଭଫଳ ସେହି ଗୃହରେ ପଡ଼ିଥାଏ । ସୂର୍ଯ୍ୟ ଯଦି ଅଶୁଭ ଫଳ ଦିଅନ୍ତି ତେବେ ସେହି ଗୃହରେ ବସବାସ କରୁଥିବା ସମସ୍ତ ବ୍ୟକ୍ତି ପ୍ରାୟତଃ ରୋଗରେ ପିଡ଼ିତ ରୁହନ୍ତି ।

ଉକ୍ତ ଗୃହରେ ବସବାସ କରୁଥିବା ଲୋକମାନେ ସରକାରଙ୍କ ଠାରୁ ଶୁଭଫଳ ପାଇପାରନ୍ତି ନାହିଁ । ଅର୍ଥାତ୍ ଯଦି ସରକାରୀ ଚାକିରି କରୁଥାନ୍ତି ତେବେ ପଦୋନ୍ନତି ହେବା ବହୁତ ଡେରି ହୋଇଥାଏ ଏବଂ ଅଧିକ ପରିଶ୍ରମ କଲେ ମଧ୍ୟ ପରିଶ୍ରମର ମୂଲ୍ୟ ନ ରହିଲା ପରି ଲାଗେ ଗୋଟେପ୍ରକାର କହିବାକୁ ଗଲେ ସରକାରୀ ସାହାଯ୍ୟ ଜମା ମିଳେନାହିଁ । ଯେଉଁମାନେ ସରକାରୀ ଚାକିରୀ ପାଇଁ ଚେଷ୍ଟା କରୁଥାନ୍ତି । ସେମାନେ ଅଧିକ ବିଫଳତା ପରେ ସଫଳତା ପାଇଥାନ୍ତି କିମ୍ବା ବେଳେବେଳେ ସରକାରୀ ଚାକିରୀ ଜମା ବି ମିଳେନାହିଁ ।

ପ୍ରତିକାର- ପ୍ରତ୍ୟେକ ଦିନ ସକାଳ ୮ଟା ଭିତରେ ବିଧିବିଧାନର ସହିତ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରନ୍ତୁ । ଏହି ଅର୍ଘ୍ୟ ପ୍ରଦାନ ଫଳରେ ସୂର୍ଯ୍ୟଙ୍କ ଅଶୁଭ ଫଳ କମିଯାଇ ଶୁଭଫଳ ମିଳିଥାଏ । ଏଣୁ ଗୃହ ସଦାସର୍ବଦା ବାସ୍ତୁମତରେ ନିର୍ମାଣ କଲେ ସର୍ବଦା ଶୁଭଫଳ ପ୍ରାପ୍ତ ହୋଇଥାଏ ।

ଇମେଲ୍: [email protected]

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)