WhatsApp New Feature: WhatsApp ରେ ଆଉ ଏକ ନୂଆ ଫିଚର; କେହି ନେଇପାରିବେନି ସ୍କ୍ରିନ୍‌ସଟ୍

WhatsApp ରେ ଏକ ନୂଆ ନୂଆ ଫିଚର ଆସିବାର ଧାରା ଲାଗିରହିଛି। ବର୍ତ୍ତମାନ ଏହି ଆପ୍ ଏମିତି ଏକ ଫିଚର ଯୋଡିଛି ଯାହା ସମସ୍ତଙ୍କୁ ଖୁସି କରିଦେବ। ଏହା ମାଧ୍ୟମରେ ଲୋକେ ନିଜର ପ୍ରୋଫାଇଲ୍ ଫଟୋକୁ ଅଧିକ ସୁରକ୍ଷା ଦେଇପାରିବେ। ଏହି ଫିଚର ବର୍ତ୍ତମାନ ବିଟା ସଂସ୍କରଣରେ ଉପଲବ୍ଧ। ଏହାକୁ ବ୍ୟବହାର କରି ପ୍ରୋଫାଇଲ୍ ଫଟୋକୁ ବର୍ତ୍ତମାନ ଅଧିକ ସୁରକ୍ଷିତ କରାଯାଇ ପାରିବ।

ବେଳେବେଳେ କ’ଣ ହୁଏନା କାହିଁକି ଲୋକେ ଅନେକଙ୍କ ପ୍ରୋଫାଇଲ୍‌ ଫଟୋକୁ ଚୋରି କରିବାକୁ ଚେଷ୍ଟା କରନ୍ତି। ଏହାକି ଲକ୍ କଲେ ମଧ୍ୟ ସେମାନେ ପ୍ରୋଫାଇଲ୍ ଫଟୋର ସ୍କ୍ରିନସଟ୍ ନେଇଯାଆନ୍ତି। ବର୍ତ୍ତମାନ ସେମାନେ ଆଉ ଏମିତି କରିପାରିବେ ନାହିଁ। ତେବେ WhatsAppର ଏହି ନୂଆ ସୁରକ୍ଷା ଫିଚର କିପରି କାମ କରିବ ଆସନ୍ତୁ ଜାଣିବା। ପୂର୍ବରୁ ୟୁଜର୍ ପ୍ରୋଫାଇଲ୍ ଫଟୋକୁ ସେବ୍ କରିବା କିମ୍ବା ଡାଉନଲୋଡ୍ କରିବା ବିକଳ୍ପକୁ WhatsApp ବନ୍ଦ କରିଦେଇଥିଲା। ବର୍ତ୍ତମାନ ମେସେଜିଂ ଆପ୍ ସ୍କ୍ରିନ୍ ସଟ୍ ପାଇଁ ମଧ୍ୟ ସମାନ ପଦକ୍ଷେପ ନେବାକୁ ଯାଉଛି। WABetaInfo ର ରିପୋର୍ଟ ଅନୁଯାୟୀ, WhatsApp ବିଟା ସଂସ୍କରଣରେ ପ୍ରୋଫାଇଲ୍ ଫଟୋର ସ୍କ୍ରିନ୍‌ସଟ୍ ବନ୍ଦ କରିବାର ଫିଚର ସାମିଲ କରିଛି।

ଏହି ଫିଚର୍‌ ବର୍ତ୍ତମାନ ଆଣ୍ଡ୍ରଏଡ୍ ବ୍ୟବହାରକାରୀଙ୍କ ପାଇଁ ଉପଲବ୍ଧ ହେବ। ଏହି ନୂଆ ଫିଚର ଯୋଡିହେବା ପରେ, ଯେତେବେଳେ ଆପଣ କାହାର ପ୍ରୋଫାଇଲ୍ ଫଟୋର ସ୍କ୍ରିନସଟ୍ ନେବାକୁ ଚେଷ୍ଟା କରିବେ ସେତେବେଳେ ସ୍କ୍ରିନ୍ କଳା ହୋଇଯିବ ଏବଂ ଏକ ମେସେଜ୍ ମଧ୍ୟ ଦେଖାଯିବ ଯେ ଆପ୍ ରେଷ୍ଟ୍ରିକ୍‌ସନ କାରଣରୁ ସ୍କ୍ରିନ୍‌ସଟ୍ ନିଆଯାଇପାରିବ ନାହିଁ। ଏହି ଫିଚର ମାଧ୍ୟମରେ, WhatsApp ଏପରି ବ୍ୟବହାରକାରୀଙ୍କୁ ପ୍ରୋଫାଇଲ୍ ଫଟୋ କ୍ୟାପ୍‌ଚର୍‌ କରିବାରେ ବାରଣ କରୁଛି, ଯେଉଁମାନେ ଆପଣଙ୍କର ଅନୁମତି ନେଇ ନାହାଁନ୍ତି କିମ୍ବା ଅନୌପଚାରିକ ଭାବରେ ଏକ ଉପଭୋକ୍ତାଙ୍କର ପ୍ରୋଫାଇଲ୍ ଫଟୋର ସ୍କ୍ରିନ୍‌ସଟ୍ ନେବାକୁ ଏବଂ ଏହାକୁ ଶେୟାର୍ କରିବାକୁ ଚାହୁଁଛନ୍ତି।

ଏହି ଫିଚର୍‌ର୍ ଆକ୍ସେସ ବର୍ତ୍ତମାନ ବିଟା ଟେଷ୍ଟର୍ସର ଏକ ଚୟନ ଗୋଷ୍ଠୀକୁ ଦିଆଯାଇଛି। ଖୁବ ଶୀଘ୍ର ଏହା ସମସ୍ତ ବ୍ୟବହାରକାରୀଙ୍କ ପାଇଁ ଉପଲବ୍ଧ ହେବ।

ଅନ୍ୟାନ୍ୟ ଅପ୍‌ଡେଟ୍ସ ବିଷୟରେ କହିବାକୁ ଗଲେ, WhatsApp ଟେକଷ୍ଟ୍ ପାଇଁ ନୂତନ ଫର୍ମାଟିଂ ବିକଳ୍ପଗୁଡିକ ଉପସ୍ଥାପନ କରିଛି। ଏହା ମାଧ୍ୟମରେ ମେସେଜ ଏକ ଉତ୍ତମ ଉପାୟରେ ଉପସ୍ଥାପିତ ହୋଇପାରିବ। ଏହା ମଧ୍ୟ ସମୟ ସଞ୍ଚୟ କରିବାରେ ସାହାଯ୍ୟ କରିବ। ଏହା ବ୍ୟତୀତ ମେସେଜ୍‌ ମାଧ୍ୟମରେ ଯୋଗାଯୋଗ ବର୍ତ୍ତମାନ ଏକ ଉତ୍ତମ ଉପାୟରେ ସମ୍ଭବ ହେବ।

ମେସେଞ୍ଜର୍‌ ଆପ୍ ଏହି ଫର୍ମାଟିଂ ବିକଳ୍ପଗୁଡ଼ିକୁ ବୁଲେଟେଡ୍ ତାଲିକା, ନମ୍ବରଯୁକ୍ତ ତାଲିକା, ବ୍ଲକ୍ କୋଟ୍ସ ଏବଂ ଇନ୍‌ଲାଇନ୍‌ କୋଡ୍ ନାମରେ ଯୋଡିଛି।