Sports: ପୁଣି ଗାବାରେ ତ୍ରିରଙ୍ଗା ଉଡ଼ାଇବ କି ଟିମ୍ ଇଣ୍ଡିଆ ?

ଅଷ୍ଟ୍ରେଲୀୟ ଟେଷ୍ଟ ଟିମ୍ ପାଇଁ ଗାବା ଆଉ ଅଭେଦ୍ୟ ଦୁର୍ଗ ହୋଇ ରହି ନାହିଁ । ୨୦୨୦-୨୧ ଗସ୍ତରେ ଟିମ୍ ଇଣ୍ଡିଆ ଅଷ୍ଟ୍ରେଲିଆର ଏହି ଦୁର୍ଗ ଭେଦ କରି କେବଳ ଐତିହାସିକ ବିଜୟ ହାସଲ କରି ନ ଥିଲା, ସିରିଜ୍ ମଧ୍ୟ ହାତେଇଥିଲା ।

ଚଳିତ ବର୍ଷ ପ୍ରାରମ୍ଭରେ ୱେଷ୍ଟଇଣ୍ଡିଜ୍ ମଧ୍ୟ ଏଠାରେ ଟେଷ୍ଟ ଜିତିଥିଲା । ପିଙ୍କ୍ ବଲ୍‌ରେ ଖେଳାଯାଇଥିବା ମ୍ୟାଚ୍‌ରେ କାରିବୀୟ ଟିମ୍ ୮ ରନ୍‌ରେ ରୋମାଞ୍ଚକ ଭାବେ ଆୟୋଜକ ଟିମ୍‌କୁ ମାତ୍ ଦେଇଥିଲା । 

ଏବେ ଅଷ୍ଟ୍ରେଲିଆ ଗସ୍ତରେ ଥିବା ଭାରତୀୟ ଟେଷ୍ଟ ଟିମ୍ ଗାବାରେ ପାଞ୍ଚ ମ୍ୟାଚ୍ ବିଶିଷ୍ଟ ସିିରିଜ୍‌ର ତୃତୀୟ ମ୍ୟାଚ୍ ଖେଳିବ । ବିଶ୍ୱ ଟେଷ୍ଟ ଚାମ୍ପିଅନ୍‌ସିପ୍ (ଡବ୍ଲ୍ୟୁଟିସି) ଫାଇନାଲ୍ ଦୃଷ୍ଟିରୁ ପୂରା ସିରିଜ୍ ଭାରତ ପାଇଁ ଗୁରୁତ୍ୱପୂର୍ଣ୍ଣ ।

ତେବେ ପର୍ଥ ବିଜୟ ପରେ ଆଡିଲେଡ୍‌ରେ ପିଙ୍କ୍ ବଲ୍ ଟେଷ୍ଟ ହାରିବା ଯୋଗୁଁ ଭ୍ରମଣକାରୀ ଟିମ୍ ପାଇଁ ଗାବା ମ୍ୟାଚ୍‌ର ଗୁରୁତ୍ୱ ବହୁତ ବଢ଼ିଯାଇଛି । ଏପରି ସ୍ଥଳେ ପ୍ରଶ୍ନ ଉଠୁଛି ଯେ ଗାବାରେ ୨୦୨୦-୨୧ ଗସ୍ତର ସଫଳତାକୁ ଦୋହରାଇପାରିବ କି ଟିମ୍ ଇଣ୍ଡିଆ?

କେମିତି ପିଚ୍‌ରେ ଖେଳାଯିବ ମ୍ୟାଚ୍

ଆଡିଲେଡ୍ ଓଭାଇ୍‌ରେ ଖେଳାଯାଇଥିବା ପିଙ୍କ୍ ବଲ୍ ଟେଷ୍ଟରେ ଅଷ୍ଟ୍ରେଲୀୟ ଦ୍ରୁତ ବୋଲର୍‌ଙ୍କ ଆଗରେ ଭାରତୀୟ ବ୍ୟାଟର୍ ଅସହାୟ ଜଣାପଡ଼ୁଥିଲେ । ଏବେ ଡିସେମ୍ବର ୧୪ରୁ ଆରମ୍ଭ ହେବାକୁ ଥିବା ତୃତୀୟ ଟେଷ୍ଟରେ ଭାରତୀୟ ଟିମ୍ ‘ଦ୍ରୁତ ବୋଲର୍‌ଙ୍କ ସ୍ୱର୍ଗ’ କୁହାଯାଉଥିବା ଗାବା ଗ୍ରାଉଣ୍ଡରେ ଅଷ୍ଟ୍ରେଲିଆକୁ ଭେଟିବ ।

ଆଡିଲେଡ୍ ଓଭାଇ୍‌ରେ ଖେଳାଯାଇଥିବା ପିଙ୍କ୍ ବଲ୍ ଟେଷ୍ଟରେ

ଗାବା ପିଚ୍‌ରେ ପାରମ୍ପରିକ ଗତି ଓ ବାଉନ୍ସ ଯୋଗୁଁ ଏଥର ବି ଦ୍ରୁତ ବୋଲର୍‌ଙ୍କ ଆଧିପତ୍ୟ ରହିବ ବୋଲି ଆଶା କରାଯାଉଛି, କାରଣ ଏହି ମ୍ୟାଚ୍ ଖ୍ରୀଷ୍ଟମାସ ପରେ ନୁହେଁ ବରଂ ଗ୍ରୀଷ୍ମ ଆରମ୍ଭରେ ଖେଳାଯାଉଛି ।

ଭାରତୀୟ ଟିମ୍ ପୂର୍ବ ଗସ୍ତରେ ଗାବାରେ ଯେଉଁ ଟେଷ୍ଟ ଜିତିଥିଲା, ତାହା ଖ୍ରୀଷ୍ଟମାସ ପରେ ଖେଳାଯାଇଥିଲା । ଏହାପରେ କଙ୍ଗାରୁ ଟିମ୍ ଏଠାରେ ୱେଷ୍ଟଇଣ୍ଡିଜ୍ ଠାରୁ ହାରିଥିଲା । ଏହି ଟେଷ୍ଟ ବି ଖ୍ରୀଷ୍ଟମାସ ପରେ ଆୟୋଜିତ ହୋଇଥିଲା ।

ଅଷ୍ଟ୍ରେଲୀୟ ଖେଳାଳି ଗ୍ରୀଷ୍ମ ଆରମ୍ଭରେ ଗାବାରେ ଖେଳିବାକୁ ପସନ୍ଦ କରନ୍ତି, ଗ୍ରୀଷ୍ମ ଶେଷବେଳକୁ ନୁହେଁ । ସିଜନ୍ ଆରମ୍ଭରେ ସତେଜ ପିଚ୍ ଯୋଗୁଁ ଡିସେମ୍ବରରେ ଏଠାରେ ଆୟୋଜିତ ମ୍ୟାଚ୍‌ଗୁଡ଼ିକରେ ଅଷ୍ଟ୍ରେଲିଆର ଆଧିପତ୍ୟ ରହିଆସିଛି ।

ଗାବାରେ ମ୍ୟାଚ୍ କେଉଁ ସମୟରେ ଖେଳାଯାଉଛି, ତାହା ଗୁରୁତ୍ୱ ରଖେ । ତେଣୁ ପୂର୍ବ ଦୁଇ ପରାଜୟ ଓ ନିଜ ଖେଳାଳିଙ୍କ ପସନ୍ଦକୁ ଦୃଷ୍ଟିରୁ ରଖି ଏଥର ଖ୍ରୀଷ୍ଟମାସ ପୂର୍ବରୁ ଏଠାରେ ଟେଷ୍ଟ ମ୍ୟାଚ୍ ଆୟୋଜନ କରାଯାଉଥିବା ସମ୍ଭବ ।

ପିଚ୍ କ୍ୟୁରେଟର୍ ଡେଭିଡ୍ ସାଣ୍ଡର୍ସକୀ କହିଛନ୍ତି ଯେ ଏହା ସିଜନ୍‌ର ଆରମ୍ଭ । ଏପରି ସ୍ଥଳେ ଏହି ପିଚ୍ ଅଷ୍ଟ୍ରେଲିଆ ପାଇଁ ଲାଭଦାୟକ ହୋଇପାରେ । ସିଜନ୍‌ର ଭିନ୍ନ ଭିନ୍ନ ସମୟରେ ପ୍ରକୃତି ବଦଳିଯାଏ । ସିଜନ୍ ଶେଷରେ ପିଚ୍‌ରେ ଅଧିକ ଫାଟ ଦେଖିବାକୁ ମିଳିପାରେ, ହେଲେ ପ୍ରଥମାବସ୍ଥାରେ ପିଚ୍ ବୋଲର୍‌ଙ୍କ ପାଇଁ ଅନୁକୂଳ ରହିଥାଏ ।

ଗାବାରେ ପାରମ୍ପରିକ ପିଚ୍ ପ୍ରସ୍ତୁତ କରିବା ପ୍ରକ୍ରିୟା ସବୁବେଳେ ଏକାଭଳି । ସେମାନେ ପ୍ରତିବର୍ଷ ଗାବାରେ ଦ୍ରୁତ, ବାଉନ୍ସିଂ ଓ ଆହ୍ୱାନପୂର୍ଣ୍ଣ ପିଚ୍ ପ୍ରସ୍ତୁତ କରିବାକୁ ପ୍ରୟାସ କରିଥା’ନ୍ତି । ଏଥର ବି ଦ୍ରୁତ ବୋଲର୍‌ଙ୍କୁ ପିଚ୍‌ରୁ ବହୁତ ସହାୟତା ମିଳିବ ।

ନଭେମ୍ବରରେ ଏଠାରେ ପିଙ୍କ୍ ବଲ୍‌ରେ ଖେଳାଯାଇଥିବା ଏକ ଘରୋଇ ମ୍ୟାଚ୍‌ର ପ୍ରଥମ ଦିନରେ ୧୫ ୱିକେଟ୍ ପଡ଼ିଥିଲା । ତୃତୀୟ ଟେଷ୍ଟରେ ସେହିଭଳି ପିଚ୍ ହିଁ ଦେଖିବାକୁ ମିଳିବ । ସାଣ୍ଡର୍ସକୀଙ୍କ କହିବାନୁଯାୟୀ ଏଭଳି ୱିକେଟ୍ ପ୍ରସ୍ତୁତ କରିବା ସେମାନଙ୍କ ଲକ୍ଷ୍ୟ ଯେଉଁଠି ବ୍ୟାଟ୍ ଓ ବଲ୍ ମଧ୍ୟରେ ଭଲ ସନ୍ତୁଳନ ରହିବ ।

ଭାରତର ଐତିହାସିକ ଗାବା ବିଜୟ

ପୂର୍ବ ଅଷ୍ଟ୍ରେଲିଆ ଗସ୍ତରେ ଭାରତ ଚାରି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳିଥିଲା । ଶେଷ ମ୍ୟାଚ୍ ଗାବାରେ ଖେଳାଯାଇଥିଲା । ସେଠାରେ ସିରିଜ୍‌ର ସବୁଠାରୁ କଡ଼ା ମୁକାବିଲା ଦେଖିବାକୁ ମିଳିଥିଲା ।

ତେବେ ଶେଷରେ ଅଜିଙ୍କ୍ୟ ରାହାଣେଙ୍କ ନେତୃତ୍ୱାଧୀନ ଟିମ୍ ୩ ୱିକେଟ୍‌ରେ କଙ୍ଗାରୁ ଟିମ୍‌କୁ ହରାଇବା ସହ ୨-୧ରେ ସିରିଜ୍ ଜିତିଥିଲା । ୧୯୮୮ ପରଠାରୁ ଏହି ଗ୍ରାଉଣ୍ଡରେ ଆୟୋଜକ ଟିମ୍‌ର ଏହା ପ୍ରଥମ ଟେଷ୍ଟ ପରାଜୟ ଥିଲା ।

ଏହି ବିଜୟରେ ୱିକେଟ୍‌କିପର୍‌-ବ୍ୟାଟର୍ ରିଷଭ ପନ୍ତ, ଦ୍ରୁତ ବୋଲର୍ ମହମ୍ମଦ ସିରାଜ, ଓପନର୍ ଶୁଭମନ ଗିଲ୍‌, ସ୍ପିନ୍ ବୋଲିଂ ଅଲ୍‌ରାଉଣ୍ଡର୍ ୱାଶିଂଟନ୍ ସୁନ୍ଦର ଓ ଦ୍ରୁତ ବୋଲିଂ ଅଲ୍‌ରାଉଣ୍ଡର ଶାର୍ଦ୍ଦୂଳ ଠାକୁର ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ ।

ଭାରତର ଐତିହାସିକ ଗାବା ବିଜୟ

୨୦୨୧ ଜାନୁଆରୀରେ ଆୟୋଜିତ ଏହି ମ୍ୟାଚ୍‌ରେ ଅଷ୍ଟ୍ରେଲିଆ ପ୍ରଥମ ଇନିଂସ୍‌ରେ ୩୬୯ ରନ୍ କରିଥିବା ବେେଳେ ଭାରତୀୟ ଟିମ୍ ୩୩୬ ରନ୍ କରିଥିଲା । କଙ୍ଗାରୁ ଟିମ୍ ୩୩ ରନ୍‌ରେ ଅଗ୍ରଣୀ ଥିଲା ।

ଏହାପରେ ଅଷ୍ଟ୍ରେଲିଆ ଦ୍ୱିତୀୟ ଇନିଂସ୍‌ରେ ୨୯୪ ରନ୍ କରି ୩୨୮ ରନ୍‌ର ଟାର୍ଗେଟ୍ ଦେଇଥିଲା । ଜବାବରେ ଭାରତ ୭ ୱିକେଟ୍‌ରେ ୩୨୯ ରନ୍ କରି ବିଜୟୀ ହୋଇଥିଲା ।

ଏହି ମ୍ୟାଚ୍‌ରେ ପନ୍ତ ପ୍ରଥମ ଇନିଂସ୍‌ରେ ୨୩ ରନ୍ କରିଥିଲେ, କିନ୍ତୁ ଆହ୍ୱାନପୂର୍ଣ୍ଣ ପରିସ୍ଥିତିକୁ ଦେଖି ଦ୍ୱିତୀୟ ଇନିଂସ୍‌ରେ ଅପରାଜିତ ୮୯ ରନ୍‌ର ଇନିଂସ୍ ଖେଳିଥିଲେ । ସେ ଶେଷ ଯାଏଁ କ୍ରିଜ୍‌ରେ ରହି ଟିମ୍‌କୁ ଜିତାଇବା ପରେ ହିଁ ଫେରିଥିଲେ ଏବଂ ‘ପ୍ଲେୟାର୍ ଅଫ୍ ଦ ମ୍ୟାଚ୍‌’ ବିବେଚିତ ହୋଇଥିଲେ ।

ସେହିପରି ଗିଲ୍ ପ୍ରଥମ ଇନିଂସ୍‌ରେ ମାତ୍ର ୭ ରନ୍ କରିଥିଲେ, କିନ୍ତୁ ଦ୍ୱିତୀୟ ଇନିଂସ୍‌ରେ ୯୧ ରନ୍‌ର ଦୃଢ଼ ଇନିଂସ୍ ଖେଳିଥିଲେ । ପ୍ରଥମ ଇନିଂସରେ ସୁନ୍ଦର (୬୨) ଓ ଶାର୍ଦ୍ଦୂଳ (୬୭) ସପ୍ତମ ୱିକେଟ୍ ପାଇଁ ୧୨୩ ରନ୍‌ର ଉଜ୍ଜ୍ୱଳ ଭାଗୀଦାରୀ କରି ଟିମ୍‌କୁ ବିପର୍ଯ୍ୟୟରୁ ମୁକୁଳାଇଥିଲେ ।

ବୋଲିଂରେ ପ୍ରଥମ ଇନିଂସ୍‌ରେ ୧ ୱିକେଟ୍ ନେଇଥିବା ସିରାଜ ଦ୍ୱିତୀୟ ଇନିଂସ୍‌ରେ ୫ ୱିକେଟ୍ ନେଇ ପ୍ରତିପକ୍ଷ ଟିମ୍‌ର ଅଣ୍ଟା ଭାଙ୍ଗି ଦେଇଥିଲେ । ଏହାଛଡ଼ା ମ୍ୟାଚ୍‌ରେ ଶାର୍ଦ୍ଦୂଳ ୭, ୱାଶିଂଟନ୍ ସୁନ୍ଦର ୪ ୱିକେଟ୍ ନେଇଥିଲେ । ଏଥର ଶାର୍ଦ୍ଦୂଳ ଟିମ୍‌ରେ ନାହାନ୍ତି ।

କିନ୍ତୁ ଭାରତୀୟ ଟିମ୍ ଏଠାରେ ଏଯାବତ ସାତ ଟେଷ୍ଟ ଖେଳି ମାତ୍ର ଗୋଟିଏରେ ବିଜୟ ହାସଲ କରିଥିବା ବେଳେ ପାଞ୍ଚ ମ୍ୟାଚ୍ ହାରିଛି ଏବଂ ଅନ୍ୟ ଗୋଟିଏ ଡ୍ର’ ରହିଛି । ଏ କଥାକୁ ବି ଧ୍ୟାନରେ ରଖିବାକୁ ହେବ ।

ତୃତୀୟ ଟେଷ୍ଟ ଭାରତ ପାଇଁ ଗୁରୁତ୍ୱପୂର୍ଣ୍ଣ କାହିଁକି ?

ଘରେ ନ୍ୟୁଜିଲାଣ୍ଡ ବିପକ୍ଷ ତିନି ମ୍ୟାଚ୍ ବିଶିଷ୍ଟ ସିରିଜ୍‌ରେ କ୍ଲିନ୍ ସୁଇପ୍ ହେବା ପରେ ବର୍ଡର-ଗାଭାସ୍କର ଟ୍ରଫି ଭାରତ ପାଇଁ ଗୁରୁତ୍ୱପୂର୍ଣ୍ଣ ହୋଇଯାଇଛି । ସିରିଜ୍‌ରେ ଭାରତ ଅତି କମ୍‌ରେ ଚାରି ମ୍ୟାଚ୍ ଜିତିଲେ ସିଧା ଡବ୍ଲ୍ୟୁଟିସି ଫାଇନାଲ୍‌ରେ ପ୍ରବେଶ କରିପାରିବ । ଅବଶ୍ୟ ତିନି ବିଜୟ ଓ ଗୋଟିଏ ଡ୍ର’ ଦ୍ୱାରା ଟିମ୍‌ର ପଏଣ୍ଟ ପ୍ରତିଶତ ୬୦ରୁ ଉପରେ ରହିବ । କିନ୍ତୁ ଚାରି ବିଜୟ ଅଧିକ ନିରାପଦ ।

ଟିମ୍ ସେଥିମଧ୍ୟରୁ ଗୋଟିଏ ମ୍ୟାଚ୍ ଜିତିସାରିଛି । ତାହା ଥିଲା ଐତିହାସିକ ପର୍ଥ ବିଜୟ । କିନ୍ତୁ ଆଡିଲେଡ୍‌ରେ ପିଙ୍କ୍ ବଲ୍ ଚାଲେଞ୍ଜ୍‌ର ମୁକାବିଲା କରି ନ ପାରି ପରାଜିତ ହେବା ଟିମ୍ ପାଇଁ ମହଙ୍ଗା ପଡ଼ିଛି । ଏବେ ଅବଶିଷ୍ଟ ତିନି ମ୍ୟାଚ୍ ଜିତିବା ଟିମ୍ ପାଇଁ ଜରୁରୀ ହୋଇଯାଇଛି ।

ବର୍ଡର-ଗାଭାସ୍କର ଟ୍ରଫି ଭାରତ ପାଇଁ ଗୁରୁତ୍ୱପୂର୍ଣ୍ଣ ହୋଇଯାଇଛି

ଡବ୍ଲ୍ୟୁଟିସି ତାଲିକାରେ ଭାରତ ଏବେ ୧୬ ମ୍ୟାଚ୍‌ରୁ ୫୭.୨୯ ପ୍ରତିଶତ ସହ ତୃତୀୟ ସ୍ଥାନକୁ ଖସି ଆସିଛି । ଦକ୍ଷିଣ ଆଫ୍ରିକା (୬୩.୩୩ ପ୍ରତିଶତ) ପ୍ରଥମ ଓ ଅଷ୍ଟ୍ରେଲିଆ (୬୦.୭୧ ପ୍ରତିଶତ) ଦ୍ୱିତୀୟ ସ୍ଥାନରେ ରହିଛି ।

ଗାବା ମ୍ୟାଚ୍‌ରେ ପିଙ୍କ୍ ବଲ୍ ସମସ୍ୟା ନାହିଁ । ଦ୍ୱିତୀୟ ଟେଷ୍ଟ ବିଫଳତାରୁ ମୁକୁଳି ଟିମ୍ ଇଣ୍ଡିଆକୁ ଦମ୍‌ଦାର ପ୍ରତ୍ୟାବର୍ତ୍ତନ କରିବାକୁ ହେବ । ଏହି ମ୍ୟାଚ୍ ଜିତିଲେ ଟିମ୍‌ର ମନୋବଳ ବଢ଼ିବ ।

ବିଶେଷକରି ବ୍ୟାଟର୍‌ମାନେ ବଡ଼ ସ୍କୋର୍ ଓ ବଡ଼ ଭାଗୀଦାରୀ ଛିଡ଼ା କରିବା ଆବଶ୍ୟକ । ଅଧିନାୟକ ରୋହିତ ଫର୍ମକୁ ଫେରିବା ନିହାତି ଜରୁରୀ । ଟିମ୍ ଯଶପ୍ରୀତ ବୁମ୍‌ରାଙ୍କ ନେତୃତ୍ୱାଧୀନ ବୋଲିଂ ବାହିନୀ ଠାରୁ ପର୍ଥ ଟେଷ୍ଟ ଭଳି କମାଲ୍ ଆଶା କରିବ । ଗୋଟିଏ କଥା ସ୍ପଷ୍ଟ ଯେ ଟିମ୍‌କୁ କେବଳ ଜିତିବା ଲକ୍ଷ୍ୟ ନେଇ ଖେଳିବାକୁ ହେବ ।

ଇମେଲ୍: [email protected]

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)