କାହିଁକି ଆତ୍ମହତ୍ୟା କରିବାକୁ ଚାହୁଁଥିଲେ ଶାମି, କାରଣ କହିଲେ ପୁରୁଣା ବନ୍ଧୁ

ଭାରତର ଷ୍ଟାର ଦ୍ରୁତ ବୋଲର ମହମ୍ମଦ ଶାମି ତାଙ୍କ କ୍ୟାରିଅରରେ ଅନେକ ବାଧାବିଘ୍ନର ସମ୍ମୁଖୀନ ହୋଇଛନ୍ତି । ବିଗତ ତିନୋଟି ଦିନିକିଆ ବିଶ୍ୱକପ୍‌ରେ ଭାରତ ପାଇଁ ସର୍ବାଧିକ ୱିକେଟ୍ ଅକ୍ତିଆର କରିଛନ୍ତି ଶାମି । କିନ୍ତୁ ପ୍ରଦର୍ଶନଠୁ ସେ ତାଙ୍କ ବ୍ୟକ୍ତିଗତ ଜୀବନକୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି । ୩୩ ବର୍ଷୀୟ ମହମ୍ମଦ ଶାମିଙ୍କ ବିରୋଧରେ ତାଙ୍କ ପତ୍ନୀ ହସିନ୍‌ ଜାହାନ ଘରୋଇ ହିଂସା ଓ ମ୍ୟାଚ୍‌ ଫିକ୍ସିଂର ଅଭିଯୋଗ ଆଣିଥିଲେ । ଯାହାକୁ ନେଇ ଚିନ୍ତାରେ ଥିଲେ ଶାମି ।

କୋଭିଡ୍-୧୯ ସମୟରେ ଇରଫାନ୍‌ ପଠାନଙ୍କ ସହ କରିଥିବା ଇନଷ୍ଟାଗ୍ରାମ ଲାଇଭରେ ମହମ୍ମଦ ଶାମି ସ୍ୱୀକାର କରିଥିଲେ ଯେ ତାଙ୍କ ପତ୍ନୀ ମ୍ୟାଚ୍‌ ଫିକ୍ସିଂ ପରି ଅଭିଯୋଗ କରିବା ପରେ ସେ ଆତ୍ମହତ୍ୟା କରିବାକୁ ଚିନ୍ତା କରିଥିଲେ । ତେବେ ଏନେଇ ତାଙ୍କ ବନ୍ଧୁ ତଥା ବିଧାୟକ ଉମେଶ କୁମାର ସେହି ଘଟଣା ସମ୍ପର୍କରେ ବିସ୍ତୃତ ଭାବରେ କହିଛନ୍ତି ।

ଅଧିକ ପଢ଼ନ୍ତୁ: 'ସତସାହସ ଥିଲେ...'ସାନିଆଙ୍କ ନାଁ ଶୁଣି ରାଗିଲେ ସାମି !

ଉମେଶ କୁମାର ଏକ ପୋଡକାଷ୍ଟରେ କହିଛନ୍ତି ଯେ, ସେତେବେଳେ ଶାମି ସବୁକିଛି ସହ ଲଢ଼େଇ କରୁଥିଲେ । ସେ ମୋ ସହ ମୋ ଘରେ ରହୁଥିଲେ । କିନ୍ତୁ ଯେତେବେଳେ ପାକିସ୍ତାନ ସହ ମ୍ୟାଚ୍ ଫିକ୍ସିଂ ଅଭିଯୋଗ ଆସିଲା ସେତେବେଳେ ସେ ଭାଙ୍ଗି ପଡିଥିଲେ । ସେ କହିଥିଲେ ମୁଁ ସବୁକିଛି ସହ୍ୟ କରିପାରିବି, କିନ୍ତୁ ମୋ ଦେଶ ପ୍ରତି ବିଶ୍ୱାସଘାତକତା ଅଭିଯୋଗକୁ ସହ୍ୟ କରିପାରିବି ନାହିଁ ।

ଉମେଶ କୁମାର କହିଛନ୍ତି, 'ମୁଁ ଭୋର ପ୍ରାୟ ୪ଟା ସମୟରେ ଯେତେବେଳେ ପାଣି ପିଇବାକୁ ଉଠି ରୋଷେଇ ଘର ଆଡକୁ ଯାଉଥିଲି, ସେତେବେଳେ ଦେଖିଲି ଯେ ଶାମି ୧୯ ତମ ମହଲାର ବାଲକୋନୀରେ ଠିଆ ହୋଇଥିଲେ । ମୁଁ ଭାବୁଛି କି ସେହି ରାତି ଶାମିଙ୍କ ଜୀବନର ସବୁଠାରୁ ଭୟାନକ ଓ ଦୁଃଖଦ ରାତି ଥିଲା ।

ଉମେଶ କହିଛନ୍ତି, 'ଶାମି ସେଦିନ ଗୋଟିଏ କଥା କହିଥିଲେ । ସେ କହିଥିଲେ ଯେ ‘ଭାଇ, ତୁମେ ମୋତେ ମାର, ମୋତେ ଦଣ୍ଡ ଦିଅ, ଫାଶୀ ଦିଅ, ମୁଁ ସବୁକିଛି ପାଇଁ ପ୍ରସ୍ତୁତ, କିନ୍ତୁ ପାକିସ୍ତାନ ସହ ଫିକ୍ସିଂ ଅଭିଯୋଗ ମୋ ସହନଶୀଳତାର ବାହାରେ’ ।

ଏହା ପରେ ଉମେଶ ମଧ୍ୟ ସେହି ମୁହୂର୍ତ୍ତକୁ ଶାମିଙ୍କ ସହ ସେୟାର କରିଥିଲେ ଯେତେବେଳେ ସେ ବହୁତ ଖୁସି ଥିଲେ | ଉମେଶ କହିଛନ୍ତି, 'ପରେ, ଦିନେ ଅପରାହ୍ନରେ ଯେତେବେଳେ ଆମେ କଥାବାର୍ତ୍ତା କରୁଥିଲୁ, ଶାମିଙ୍କ ଫୋନରେ ଏକ ମେସେଜ୍‌ ଆସିଥିଲା ​​ଯେ ମ୍ୟାଚ୍‌ ଫିକ୍ସିଂ ଘଟଣାର ତଦନ୍ତ କରୁଥିବା କମିଟି ତରଫରୁ ସେ କ୍ଲିନ୍ ଚିଟ୍ ପାଇଛନ୍ତି । ମୁଁ ଭାବୁଛି ଶାମି ସେହିଦିନ ଯେତିକି ଖୁସି ଥିଲେ ବିଶ୍ୱକପ ଜିତିବା ପରେ ମଧ୍ୟ ସେତେ ଖୁସି ହୋଇନଥାନ୍ତେ ।

ଅଧିକ ପଢ଼ନ୍ତୁ: ଗମ୍ଭୀରଙ୍କ ବଡ଼ ବୟାନ; କହିଲେ, ୨୦୨୭ ବିଶ୍ୱକପ୍‌ ଖେଳିପାରନ୍ତି ବିରାଟ-ରୋହିତ