ପ୍ରାୟ ୩ ଦଶନ୍ଧି ପରେ ପାକିସ୍ତାନରେ ଆୟୋଜିତ ହେଉଛି ଆଇସିସି ଚାମ୍ପିଅନ୍ସ ଟ୍ରଫି । ଏହି ମେଗା ଟୁର୍ଣ୍ଣାମେଣ୍ଟରେ ୮ଟି ଦଳ ଭାଗ ନେଉଛି । ତେବେ ସୁରକ୍ଷା ଏବଂ ଆତଙ୍କବାଦୀ ଆକ୍ରମଣ ଭୟ ଯୋଗୁଁ ବର୍ଷ ବର୍ଷ ଧରି ପାକିସ୍ତାନରେ ଅନ୍ତର୍ଜାତୀୟ ମ୍ୟାଚ୍ ଆୟୋଜିତ ହୋଇନଥିଲା। ଏବେ ଚାମ୍ପିଅନ୍ସ ଟ୍ରଫି-୨୦୨୫ର ଆୟୋଜନ ପାକିସ୍ତାନ ହାତକୁ ଆସିବା ପରେ, ପୁଣି ଥରେ ଆତଙ୍କବାଦୀ ଆକ୍ରମଣର ଭୟ ପାକିସ୍ତାନ ଉପରେ ଘାରିଛି । ପାକିସ୍ତାନରେ ୨୦୨୫ ଚାମ୍ପିଅନ୍ସ ଟ୍ରଫିରେ ISKP ଗ୍ରୁପ୍ ଦ୍ୱାରା ଆତଙ୍କବାଦୀ ଆକ୍ରମଣ କରିବାର ସମ୍ଭାବ୍ୟ ପ୍ରୟାସ ବିଷୟରେ ଗୁଇନ୍ଦା ସଂସ୍ଥା ପକ୍ଷରୁ ଆଲର୍ଟ କରାଯାଇଛି ।
Also Read
ଅଧିକ ପଢ଼ନ୍ତୁ: ୨୦୧୭ର କଡ଼ାଗଣ୍ଡା ବଦଲା ନେଲା ଟିମ୍ ଇଣ୍ତିଆ; ଚାମ୍ପିଅନ୍ସ ଟ୍ରଫିରୁ ବିଦା ହେଲା ପାକିସ୍ତାନ !
ଭାରତୀୟ ଏଜେନ୍ସି ମଧ୍ୟ ଏପରି ଆକ୍ରମଣର ସମ୍ଭାବନା ବିଷୟରେ ପାକିସ୍ତାନକୁ ସୂଚନା ଦେଇଛନ୍ତି । ଇସଲାମିକ୍ ଷ୍ଟେଟ୍ - ଖୋରାସାନ୍ ପ୍ରଦେଶ (ISKP)ର ଆତଙ୍କବାଦୀମାନେ ଚାମ୍ପିଅନ୍ସ ଟ୍ରଫି ଦେଖିବାକୁ ଆସୁଥିବା ବିଦେଶୀମାନଙ୍କୁ ଅପହରଣ କରିପାରନ୍ତି ଏବଂ ବଦଳରେ ମୁକ୍ତି ଦାବି କରିପାରିନ୍ତି ବୋଲି ଗୁଇନ୍ଦା ଏଜେନ୍ସି ପାକିସ୍ତାନକୁ ଆଲର୍ଟ କରିଛନ୍ତି ।
ପାକିସ୍ତାନର ଗୁଇନ୍ଦା ବିଭାଗ ଇସଲାମିକ୍ ଷ୍ଟେଟ୍ ଖୋରାସାନ୍ ପ୍ରଦେଶ (ISKP)ରୁ ଏକ ସମ୍ଭାବ୍ୟ ଆତଙ୍କୀ ଭୟକୁ ନେଇ ଏକ ଚେତାବନୀ ଜାରି କରିଛି, ଯାହାର ରିପୋର୍ଟ ଅନୁଯାୟୀ ICC ଚାମ୍ପିଅନ୍ସ ଟ୍ରଫି-୨୦୨୫ରେ ଯୋଗଦେବାକୁ ଆସୁଥିବା ବିଦେଶୀ ଦର୍ଶକମାନଙ୍କୁ ଅପହରଣ କରିବାକୁ ଯୋଜନା କରୁଛନ୍ତି । ଖେଳ ଦେଖିବାକୁ ଆସିଥିବା ବିଦେଶୀ ଦର୍ଶକଙ୍କୁ ଅପହରଣ କରି ତାଙ୍କ ବଦଳରେ କିଛି ଦାବି କରିପାରନ୍ତି ବୋଲି ଗୁଇନ୍ଦା ବିଭାଗ ପକ୍ଷରୁ କୁହାଯାଇଛି । କୁହାଯାଉଛି ଯେ ଏହି ଆତଙ୍କବାଦୀ ଗ୍ରୁପ୍ ବିଶେଷ ଭାବରେ ଚୀନ୍ ଏବଂ ଆରବ ନାଗରିକମାନଙ୍କୁ ଟାର୍ଗେଟ କରୁଛନ୍ତି ।
ତେବେ ଏହି ଆତଙ୍କୀ ଭୟ ପରେ ପାକିସ୍ତାନରେ ସୁରକ୍ଷା ଏଜେନ୍ସିଗୁଡ଼ିକୁ ସମ୍ପୂର୍ଣ୍ଣ ସତର୍କ ରହିବାକୁ ପଡିବ । ଆପଣଙ୍କୁ କହି ରଖୁଛୁ ଯେ ଚାମ୍ପିଅନ୍ସ ଟ୍ରଫି ଏକ ବଡ଼ ଟୁର୍ଣ୍ଣାମେଣ୍ଟ। ଏଥିରେ ସାରା ବିଶ୍ୱରୁ ୮ଟି ବଡ଼ ଦଳ ଅଂଶଗ୍ରହଣ କରିଛନ୍ତି । ତେଣୁ, ସୁରକ୍ଷା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ପୂର୍ବରୁ ୨୦୦୯ ମସିହାରେ ଲାହୋରରେ ଗଦ୍ଦାଫି ଷ୍ଟାଡିୟମ ନିକଟରେ ଶ୍ରୀଲଙ୍କା ଦଳ ଉପରେ ଆତଙ୍କବାଦୀ ଆକ୍ରମଣ ହୋଇଥିଲା, ଯାହା ପରେ ଅନ୍ତର୍ଜାତୀୟ ଦଳଗୁଡ଼ିକ ପାକିସ୍ତାନ ଗସ୍ତ ବନ୍ଦ କରିଦେଇଥିଲେ । ସେପଟେ ଆଇସିସିର ଏହି ମେଗା ଟୁର୍ଣ୍ଣାମେଣ୍ଟ ପାଇଁ କିନ୍ତୁ ପାକିସ୍ତାନ ଯାଇନି ଭାରତ । ସୁରକ୍ଷା କାରଣରୁ ଟିମ୍ ଇଣ୍ଡିଆ ପାକିସ୍ତାନ ଯିବନି ବୋଲି ବିସିସିଆଇ ପକ୍ଷରୁ କୁହାଯାଇଥିଲା । ଯାହାଫଳରେ ଟିମ୍ ଇଣ୍ଡିଆ ତା’ର ସମସ୍ତ ମ୍ୟାଚ୍ ଦୁବାଇ ଇଣ୍ଟର ନ୍ୟାସନାଲ ଷ୍ଟାଡିୟମରେ ଖେଳିବ । ଏମିତି କି ଯଦି ଭାରତ ଫାଇନାଲରେ ପହଞ୍ଚେ ତେବେ ଚମ୍ପିଆନ୍ସ ଟ୍ରଫି ଫାଇନଲ ମଧ୍ୟ ଦୁବାଇରେ ଖେଳାଯିବ ।