ଟିକେଟ୍‌ ପାଇଁ ବାରବାଟୀରେ ଧସ୍ତାଧସ୍ତି, ଠେଲାପେଲା: ମହିଳାଙ୍କ ଉପରକୁ ଲାଠିଚାର୍ଜ କଲା ପୋଲିସ୍‌

କଟକ ବାରବାଟୀ ଷ୍ଟାଡିୟମରେ T20 ମ୍ୟାଚ୍‌ ପାଇଁ ଆଜିଠୁ କାଉଣ୍ଟରରେ ଟିକେଟ୍‌ ବିକ୍ରି ଆରମ୍ଭ ହୋଇଛି। ସକାଳ ୯ଟାରୁ କାଉଣ୍ଟରରେ ଟିକେଟ୍‌ ବିକ୍ରି ଆରମ୍ଭ ହୋଇଥିବା ବେଳେ ଟିକେଟ୍‌ ପାଇଁ ଲୋକଙ୍କ ନାହିଁ ନଥିବା ଭିଡ଼ ଦେଖିବାକୁ ମିଳିଛି। 

ଟିକେଟ୍ ବିକ୍ରି ପାଇଁ କାଉଣ୍ଟର ଆଗରେ ବ୍ୟାରିକେଡର ବ୍ୟବସ୍ଥା କରାଯିବା ସହ ଶାନ୍ତି ଶୃଙ୍ଖଳା ରକ୍ଷା ପାଇଁ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ଏସବୁ ସତ୍ତ୍ୱେ ମଧ୍ୟ ଧସ୍ତାଧସ୍ତି, ଠେଲାପେଲା ପରିସ୍ଥିତି ସୃଷ୍ଟି ହୋଇଛି।

#ଟିକେଟ୍‌_ପାଇଁ_ବାରବାଟୀରେ_ଧସ୍ତାଧସ୍ତି_ଠେଲାପେଲା#ଲାଠିଚାର୍ଜ_କଲା_ପୋଲିସ୍‌
ଟିକେଟ୍ ପାଇଁ ପାଗଳ ହୋଇଯାଇଛନ୍ତି କ୍ରିକେଟ୍ ପ୍ରେମୀ। ଲମ୍ୱା ଲାଇନରେ ଠିଆ ହୋଇ ଚାଲିଛି ଭିଡ଼ାଭିଡ଼ି... ଟଣାଓଟରା... ଠେଲାପେଲା... ଧସ୍ତାଧସ୍ତି... #BarabatiStadium#Cuttack#Odishapic.twitter.com/fUuIKGzj7J

— ଓଟିଭି (@otvkhabar) June 9, 2022

ଟିକେଟ୍‌ ପାଇଁ ଗତକାଲି ରାତିରୁ କ୍ରିକେଟପ୍ରେମୀ ଲମ୍ବା ଲାଇନ୍ ଲଗାଇଥିବା ବେଳେ ଆଜି ସକାଳେ ଆହୁରି ପ୍ରବଳ ଭିଡ଼ ହୋଇଥିଲା। ଏତେ ଭିଡ଼ ଯେ ଟିକେଟ୍‌ ପାଇଁ ଠେଲାପେଲା, ପାଟିତୁଣ୍ଡ ସହ ଲୋକଙ୍କ ମଧ୍ୟରେ ହାତାହାତି ପରିସ୍ଥିତି ମଧ୍ୟ ସୃଷ୍ଟି ହୋଇଛି। ସକାଳେ ଲାଇନ୍‌ରେ ଛିଡ଼ା ହେବାକୁ ନେଇ କିଛି ଯୁବତୀ ହାତାହାତି ହୋଇଥିବା ଦେଖିବାକୁ ମିଳିଥିଲା। ଏଥିପାଇଁ ପୋଲିସ୍‌କୁ ନାକେଦମ୍‌ ହେବାକୁ ପଡ଼ିଥିଲା। ଉପସ୍ଥିତ ମହିଳା ପୋଲିସ୍‌ କର୍ମୀ ସେମାନଙ୍କୁ ବୁଝାଇ ଲାଇନ୍‌ରେ ଛିଡ଼ା ହୋଇ ଟିକେଟ୍‌ ନେବା ପାଇଁ କହିଥିଲେ। 

ଏହାପରେ ପୁଣି ଅପରାହ୍ଣରେ ଲୋକଙ୍କ ମଧ୍ୟରେ ଧସ୍ତାଧସ୍ତି, ଠେଲାପେଲା ହୋଇଥିଲା। ମହିଳାଙ୍କ ପାଇଁ ଉଦ୍ଦିଷ୍ଟ କାଉଣ୍ଟର ଲାଇନ୍‌ରେ ଧସ୍ତାଧସ୍ତି, ଠେଲାପେଲା ପରିସ୍ଥିତି ସୃଷ୍ଟି ହୋଇଥିବା ଦେଖିବାକୁ ମିଳିଛି। ଫଳରେ ଭିଡ଼ ନିୟନ୍ତ୍ରଣ ପାଇଁ ମହିଳାଙ୍କ ଉପରେ ପୋଲିସ ଲାଠି ଚାର୍ଜ କରିବାକୁ ପଡ଼ିଛି।