ଲିଗାମେଣ୍ଟ ଇନଜ୍ୟୁରିର ଚିକିତ୍ସା ପାଇଁ ରିଷଭ ପନ୍ତଙ୍କୁ ମୁମ୍ବାଇ ଏୟାରଲିଫ୍ଟ

କାର ଦୁର୍ଘଟଣାରେ ଆହତ ହୋଇ ଚିକିତ୍ସିତ ହେଉଥିବା ଷ୍ଟାର କ୍ରିକେଟର ରିଷଭ ପନ୍ଥଙ୍କୁ ଅଧିକ ଚିକିତ୍ସା ପାଇଁ ମୁମ୍ବାଇ ଏୟାରଲିଫ୍ଟ କରାଯାଇଛି । ରିଷଭଙ୍କ ମାଙ୍କ ସହ କଥାବାର୍ତ୍ତା ପରେ ଦିଲ୍ଲୀ କ୍ରିକେଟ ଆସୋସିଏଶନ୍ ପକ୍ଷରୁ ଏହି ପଦକ୍ଷେପ ନିଆଯାଇଛି । ରିଷଭଙ୍କ ଲିଗାମେଣ୍ଟ ଇନଜ୍ୟୁରିର ଅଧିକ ଚିକିତ୍ସା ପାଇଁ ମୁମ୍ବାଇ ସ୍ଥାନାନ୍ତର କରାଯାଇଛି ।

ଡିସେମ୍ବର ୩୦ ତାରିଖ ଭୋରରେ ରିଷଭ ପନ୍ତଙ୍କ ଗାଡି ଦୁର୍ଘଟଣାଗ୍ରସ୍ତ ହୋଇଥିଲା । ୨୫ ବର୍ଷୀୟ ରିଷଭ ସେଦିନ ଭୋରରୁ ଦିଲ୍ଲୀରୁ ଉତ୍ତରାଖଣ୍ଡ ଯାଉଥିବା ବେଳେ ତାଙ୍କ କାରଟି ରୁରକି ନିକଟରେ ଏକ ଡିଭାଇଡରରେ ପିଟି ହୋଇଯାଇଥିଲା । ପରେ ଗାଡିଟି ଜଳିଯାଇଥିଲା । ଗୁରୁତର ଅବସ୍ଥାରେ ରିଷଭ କାରର କାଚ ଭାଙ୍ଗି ବାହାରକୁ ବାହାରି ଆସିଥିଲେ । ସ୍ଥାନୀୟ ଲୋକମାନେ ତାଙ୍କୁ ନେଇ ପ୍ରଥମେ ରୁରକି ହସ୍ପିଟାଲରେ ଭର୍ତ୍ତି କରିଥିଲେ । ଦୁର୍ଘଟଣାଗ୍ରସ୍ତ ଗାଡିରେ ଋଷଭ ଏକୁଟିଆ ଥିଲେ ଓ ଗାଡ଼ି ନିଜେ ଚଳାଉଥିଲେ । ଗାଡି ଚଳାଉଥିବା ବେଳେ ଆଖି ଲାଗି ଯିବାରୁ ରିଷଭଙ୍କ ଗାଡି ଦୁର୍ଘଟଣାଗ୍ରସ୍ତ ହୋଇଥିଲା ।

ତାଙ୍କୁ ରାସ୍ତାରୁ ଉଦ୍ଧାର କରିବା ପରେ ପ୍ରାଥମିକ ଚିକିତ୍ସା କରାଯାଇ ଡେରାଡୁନ୍ ସ୍ଥିତ ମ୍ୟାକ୍ସ ହସ୍ପିଟାଲକୁ ପଠାଇ ଦିଆଯାଇଥିଲା । ସେଠାରେ ତାଙ୍କର ଚିକିତ୍ସା ଚାଲିଥିଲା । ପନ୍ତଙ୍କ କପାଳରେ ଦୁଇଟି କ୍ଷତ ସହ ତାଙ୍କର ଡାହାଣ ଆଣ୍ଠୁ ଲିଗାମେଣ୍ଟ କ୍ଷତିଗ୍ରସ୍ତ ହୋଇଥିଲା । ଏଥିସହ ତାଙ୍କ କହୁଣୀ, ଗୋଇଠି ଓ ପିଠିରେ ଆଞ୍ଚୁଡା ଦାଗ ରହିଥିଲା ।