LIVE TV
ଟି-୨୦ କ୍ରିକେଟରେ ନେପାଳର ରେକର୍ଡ ବର୍ଷା । ଭାଙ୍ଗିଲା ଯୁବରାଜ ସିଂଙ୍କ ରେକର୍ଡ। ୯ ବଲ୍ରେ ଅର୍ଦ୍ଧଶତକ ହାସଲ କଲେ ଦୀପେନ୍ଦ୍ର ସିଂ । କ୍ରିକେଟ ହେଉଛି ଅନିଶ୍ଚିତାର ଖେଳ। ଏଠି ପ୍ରତିଦିନ ରେକର୍ଡ ସୃଷ୍ଟି ହୁଏ, ପ୍ରତିଦିନ ରେକର୍ଡ ଭାଙ୍ଗେ। ଯାହା ଆଜି ନେପାଳ-ମଙ୍ଗୋଲିଆ ମ୍ୟାଚରେ ପ୍ରମାଣିତ ହୋଇଛି। ଏସିଆନ୍ ଗେମ୍ସରେ ଆଜିଠାରୁ ଆରମ୍ଭ ହୋଇଛି ପୁରୁଷ କ୍ରିକେଟ ଇଭେଣ୍ଟ। ଟି-୨୦ ଫର୍ମାଟର ଖେଳାଯାଉଥିବା ପ୍ରଥମ ମ୍ୟାଚରେ ମୁହାଁମୁହିଁ ହୋଇଥିଲେ ନେପାଳ-ମଙ୍ଗୋଲିଆ । ଏହି ମ୍ୟାଚ୍ରେ ଅନେକ ରେକର୍ଡ ନିଜ ନାମରେ କରିଛି ନେପାଳ। ଗୋଟିଏ ମ୍ୟାଚ୍ରେ ଭାଙ୍ଗିଛି ଟି-୨୦ରେ ଦ୍ରୁତତମ ଶତକ, ଦ୍ରୁତତମ ଅର୍ଦ୍ଧଶତକ, ସର୍ବାଧିକ ଦଳୀୟ ସ୍କୋର, ସର୍ବାଧିକ ରନ୍ ବ୍ୟବଧାନରେ ବିଜୟ । ଏହି ସବୁ ରେକର୍ଡକୁ ନିଜ ନାମରେ କରିଛି ନେପାଳ ।
ଆଜି ଖେଳାଯାଇଥିବା ମ୍ୟାଚରେ ପ୍ରଥମେ ବ୍ୟାଟିଂ କରି ଇତିହାସ ରଚିଛି ନେପାଳ। ମଙ୍ଗୋଲିଆ ବିପକ୍ଷରେ ୩ ୱିକେଟ ହରାଇ ୩୧୪ ରନର ବିଶାଳ ସ୍କୋର କରିଛି ନେପାଳ। ଯାହା ଅର୍ନ୍ତଜାତୀୟ ଟି-୨୦ ଇତିହାସରେ ସବୁଠାରୁ ବଡ଼ ସ୍କୋର। ୩୦୦ରୁ ଅଧିକ ସ୍କୋର କରିବାରେ ନେପାଳ ହେଉଛି ପ୍ରଥମ ଦଳ।
Also Read
କୁଶଲ ମାଲା ଟି-୨୦ ଫର୍ମାଟରେ ଦ୍ରୁତତମ ଶତକ ରେକର୍ଡ ହାସଲ କରିଛନ୍ତି । ୩୪ଟି ବଲ୍ରେ ଶତକ ପୂରଣ କରି ନୂଆ ଇତିହାସ ରଚିଛନ୍ତି କୁଶଲ । ଏହା ପୂର୍ବରୁ ଏହି ରେକର୍ଡ ଦକ୍ଷିଣ ଆଫ୍ରିକାର ଡେଭିଡ୍ ମିଲରଙ୍କ ପାଖରେ ଥିଲା। ମିଲର ମାତ୍ର ୩୫ ବଲରେ ଶତକ ହାସଲ କରିଥିଲେ । ଏହା ବ୍ୟତୀତ ଦୀପେନ୍ଦ୍ର ସିଂ ଐରୀ ଏକ ବଡ଼ କାରନାମା ନିଜ ନାମରେ କରିଛନ୍ତି । ସେ ୯ ବଲରେ ଟି-୨୦ରେ ସବୁଠାରୁ ଦ୍ରୁତତମ ଅର୍ଦ୍ଧଶତକ ନିଜ ନାମରେ କରିଛନ୍ତି । ଏହାସହ ଦୀପେନ୍ଦ୍ର ସିଂ ଯୁବରାଜଙ୍କ ନାମରେ ଥିବା ଦ୍ରୁତତମ ଅର୍ଦ୍ଧଶତକ ରେକର୍ଡ ଭାଙ୍ଗିଛନ୍ତି । ଯୁବରାଜ ସିଂ ୨୦୦୭ ଟି-୨୦ ବିଶ୍ୱକପରେ ୧୨ ବଲରେ ଦ୍ରୁତତମ ଅର୍ଦ୍ଧଶତକ ହାସଲ କରିଥିଲେ।
ସେହିପରି ସର୍ବାଧିକ ରନ୍ ବ୍ୟବଧାନରେ ବିଜୟ ରେକର୍ଡ ମଧ୍ୟ ନିଜ ନାମରେ କରିଛି ନେପାଳ। ୩୧୫ ରନର ବିଜୟ ଲକ୍ଷ୍ୟ ପିଛା କରି ମଙ୍ଗୋଲିଆ ମାତ୍ର ୪୧ ରନରେ ଅଲ୍ଆଉଟ୍ ହୋଇଥିଲା । ଯାହାଫଳରେ ନେପାଳ ୨୭୩ ରନରେ ବିଜୟ ଲାଭ କରିବା ସହ ଏକ ନୂଆ ରେକର୍ଡ ସୃଷ୍ଟି କରିଛି। ଅନ୍ୟପକ୍ଷରେ ଗୋଟିଏ ଇନିଂସରେ ସର୍ବାଧିକ ଛକାର ରେକର୍ଡ ମଧ୍ୟ ଏହି ମ୍ୟାଚରେ ହୋଇଛି । ନେପାଳ ବ୍ୟାଟିଂ କରି ଗୋଟିଏ ଇନିଂସରେ ୨୬ଟି ଛକା ମାରି ସର୍ବାଧିକ ଛକାର ରେକର୍ଡ ମଧ୍ୟ ନିଜ ନାମରେ କରିଛି ।
