LIVE TV
ଗ୍ରୁପ୍ ରାଉଣ୍ଡର ଶେଷ ମ୍ୟାଚ୍ରେ ଭାରତ ନେଦରଲ୍ୟାଣ୍ଡକୁ ୧୬୦ ରନ୍ରେ ପରାସ୍ତ କରିଛି। ନଭେମ୍ବର ୧୫ରେ ମୁମ୍ବାଇର ୱାନ୍ଖେଡେ ଷ୍ଟାଡିୟମରେ ପ୍ରଥମ ସେମିଫାଇନାଲରେ ଟିମ୍ ଇଣ୍ଡିଆ ନ୍ୟୁଜିଲାଣ୍ଡକୁ ଭେଟିବ। ଏହି ଟୁର୍ନାମେଣ୍ଟ୍ରେ ଏପର୍ଯ୍ୟନ୍ତ ଭାରତ ଅପରାଜିତ ରହିଛି। ସେ ସମସ୍ତ ୯ ପ୍ରତିଦ୍ୱନ୍ଦ୍ୱୀଙ୍କୁ ପରାସ୍ତ କରିଛି। ଏହି ଲିଗ୍ରେ ଅଷ୍ଟ୍ରେଲିଆ, ଆଫଗାନିସ୍ତାନ, ପାକିସ୍ଥାନ, ବାଂଲାଦେଶ, ନ୍ୟୁଜିଲ୍ୟାଣ୍ଡ, ଇଂଲଣ୍ଡ, ଶ୍ରୀଲଙ୍କା, ଦକ୍ଷିଣ ଆଫ୍ରିକା ଏବଂ ନେଦରଲ୍ୟାଣ୍ଡକୁ ଭାରତ ପରାସ୍ତ କରିଛି।
ପଏଣ୍ଟ ଟେବୁଲରେ ଟିମ୍ ଇଣ୍ଡିଆ ୧୮ ପଏଣ୍ଟ ପାଇଛି। ସେ ଗ୍ରୁପ୍ ରାଉଣ୍ଡରେ ପଏଣ୍ଟ ଟେବୁଲ୍ ଶୀର୍ଷରେ ରହିଛି। ଅନ୍ୟପକ୍ଷରେ ନେଦର୍ଲ୍ୟାଣ୍ଡ୍ ଦଶମ ସ୍ଥାନରେ ଗ୍ରୁପ୍ର ସବୁଠାରୁ ନିମ୍ନ ଭାଗରେ ବିଶ୍ୱକପ ଶେଷ କରିଛି। ସେ ୯ ମ୍ୟାଚ୍ରେ ଦୁଇଟି ବିଜୟ ହାସଲ କରିଥିଲା। ସାତୋଟି ମ୍ୟାଚ୍ରେ ନେଦରଲ୍ୟାଣ୍ଡକୁ ପରାଜୟର ସାମ୍ନା କରିବାକୁ ପଡିଥିଲା। ଏହି ପରାଜୟ ପରେ ନେଦର୍ଲ୍ୟାଣ୍ଡ୍ ଚାମ୍ପିଅନ୍ସ ଟ୍ରଫି ୨୦୨୫ରେ ଅଂଶଗ୍ରହଣ କରିପାରିବ ନାହିଁ।
Also Read
ଭାରତ ଟସ୍ ଜିତି ବାଙ୍ଗାଲୋରର ଚିନ୍ନାସ୍ୱାମୀ ଷ୍ଟାଡିୟମରେ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଟିମ୍ ଇଣ୍ଡିଆ ୫୦ ଓଭରରେ ଚାରି ୱିକେଟ୍ ହରେଇ ୪୧୦ରନ୍ ସଂଗ୍ରହ କରିଥିଲା। ଏହାର ଜବାବରେ ନେଦର୍ଲ୍ୟାଣ୍ଡ ୪୭.୪ ଓଭରରେ ୨୫୦ ରନ୍ କରି ଅଲ୍ ଆଉଟ୍ ହୋଇଛି।
ଏହି ଅବସରରେ ଦିୱାଲି ଦିନ ପ୍ରଶଂସକଙ୍କୁ ବିଜୟ ଉପହାର ଦେଇଛି ଟିମ୍ ଇଣ୍ଡିଆ। ୨୦୦୩ ବିଶ୍ୱକପରେ ଭାରତ କ୍ରମାଗତ ଆଠଟି ମ୍ୟାଚ୍ ଜିତିଥିଲା।| ସେ ନବମ ବିଜୟ ସହ ଏଥର ଏହି ରେକର୍ଡ ଭାଙ୍ଗିଛି। ବିଶ୍ୱକପ୍ରେ କ୍ରମାଗତ ସର୍ବାଧିକ ମ୍ୟାଚ୍ ଜିତିବା ପାଇଁ ଅଷ୍ଟ୍ରେଲିଆ ରେକର୍ଡ ରଖିଛି। ୨୦୦୩ରେ ସେ ୧୧ ଟି ମ୍ୟାଚ୍ ଜିତିଥିଲା।
ଏହି ମ୍ୟାଚ୍ରେ ଭାରତୀୟ ବୋଲରମାନେ ଚମତ୍କାର ପ୍ରଦର୍ଶନ କରିଥିଲେ। ରୋହିତ ଶର୍ମା ୧୧ ଖେଳାଳିଙ୍କ ମଧ୍ୟରୁ ୯ ଜଣଙ୍କୁ ବୋଲିଂ କରିଥିଲେ। କେବଳ କେ.ଏଲ୍ ରାହୁଲ ଏବଂ ଶ୍ରେୟସ୍ ଆୟର ବୋଲିଂ କରି ନଥିଲେ। ଟିମ୍ର ବରିଷ୍ଠ ଖେଳାଳି ବିରାଟ କୋହଲି ଏବଂ ରୋହିତ ଶର୍ମା ମଧ୍ୟ ଗୋଟିଏ ଲେଖାଏଁ ୱିକେଟ୍ ନେଇଥିଲେ। ଶୁଭମନ ଗିଲ୍ ଏବଂ ସୂର୍ଯ୍ୟକୁମାର ଯାଦବଙ୍କୁ ମଧ୍ୟ ବୋଲିଂ କରିବାର ସୁଯୋଗ ମିଳିଥିଲା। ଭାରତ ପାଇଁ ମହମ୍ମଦ ସିରାଜ, ଜସ୍ପ୍ରୀତ ବୁମ୍ରା, ରବିନ୍ଦ୍ର ଜାଡେଜା ଏବଂ କୁଲଦୀପ ଯାଦବ ଦୁଇଟି ଲେଖାଏଁ ୱିକେଟ୍ ନେଇଥିଲେ। ଏହି ମ୍ୟାଚ୍ରେ ମହମ୍ମଦ ଶାମିଙ୍କୁ ଗୋଟିଏ ବି ସଫଳତା ମିଳିନାହିଁ।
ନେଦର୍ଲ୍ୟାଣ୍ଡ ପାଇଁ ଏହି ମ୍ୟାଚ୍ରେ କେବଳ ଜଣେ ଖେଳାଳି ଅର୍ଦ୍ଧଶତକ ହାସଲ କରିଥିଲେ। ତେଜା ନିଦା୍ମାନୁରୁ ସର୍ବାଧିକ ୫୪ ରନ୍ ସ୍କୋର କରିଥିଲେ। ସାଇବ୍ରାଣ୍ଡ୍ ୪୫, କଲିନ ଆକାରମ୍ୟାନ ୩୫ ଏବଂ ମ୍ୟାକ୍ସ ଓଡାଡ୍ ୩୦ ରନ୍ କରିଥିଲେ। କ୍ୟାପ୍ଟେନ୍ ସ୍କଟ୍ ଏଡୱାର୍ଡସ ୧୭ ରନ୍ ସଂଗ୍ରହ କରିଥିଲେ। ଲୋଗାନ୍ ୱାନ୍ ବେକ ଏବଂ ରୋଲୋଫ୍ ୱାନ୍ ଡେର୍ ମେର୍ୱେ ପ୍ରତ୍ୟେକ ୧୬ ରନ୍ କରିବା ପରେ ଆଉଟ୍ ହୋଇଥିଲେ। ବେସ୍ ଡି ଲିଡେ ୧୨ ରନ୍, ଆର୍ଯ୍ୟନ୍ ଦତ୍ତ ୫ ରନ୍ ଏବଂ ୱେସ୍ଲି ବାରେସି ୪ ରନ୍ କରିଥିଲେ। ପଲ୍ ୱାନ୍ ମିକେରେନ୍ ୩ ରନ୍ କରି ଅପରାଜିତ ରହିଥିଲେ।
