ଜିମ୍ବାୱେ ବିପକ୍ଷ ଦିନିକିଆ ସିରିଜ୍‌ ହାତେଇଲା ଟିମ୍‌ ଇଣ୍ତିଆ

ଜିମ୍ବାୱେ ବିପକ୍ଷ ଦ୍ୱିତୀୟ ଦିନିକିଆରେ ଭାରତର ସହଜ ବିଜୟ । ୧୬୧ ରନର ବିଜୟ ଲକ୍ଷ୍ୟକୁ ମାତ୍ର ୨୫ ଓଭରରେ ଜିଣି ୨-୦ରେ ସିରିଜ ଆଗୁଆ ହୋଇଛି  ଟିମ୍ ଇଣ୍ତିଆ । ଭାରତ ପ୍ରଥମେ ଟସ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲା ।

ପ୍ରଥମେ ବ୍ୟାଟିଂ କରି ଜିମ୍ବାୱେ ୩୮.୧ ତମ ଓଭରରେ ୧୬୧ ରନ କରି ଅଲ ଆଉଟ ହୋଇଯାଇଥିଲା । ଦଳର ପ୍ରାରମ୍ଭିକ ବ୍ୟାଟ୍ସମ୍ୟାନମାନେ ପୁଣି ବିଫଳ ହୋଇଥିବାର ଦେଖିବାକୁ ମିଳିଥିଲା । ତେବେ ସିମ ୱିଲିଅମ୍ସ ଓ ରିଆନ ବର୍ଲ ଲଢୁଆ ବ୍ୟାଟିଂ କରି ଦଳୀୟ ସ୍କୋରକୁ ଏକ ସମ୍ମାନଜନକ ସ୍ଥିତିକୁ ପହଞ୍ଚାଇଥିଲେ ।

ଜବାବରେ ଭାରତ ବ୍ୟାଟିଂ କରି ୨୫.୪ ତମ ଓଭରରେ ୫ ୱିକେଟ ହରାଇ ୧୬୭ ରନ କରି ହାସଲ କରିନେଇଥିଲା । ଭାରତ ପକ୍ଷରୁ ସଂଜୁ ସାମସନ ସର୍ବାଧିକ ୪୩ ରନ କରିଥିବାବେଳେ, ଶିଖର ଧୱନ ଓ ଶୁଭମନ ଗିଲ ୩୩ ରନ ଲେଖାଏଁ କରିଥିଲେ । ସଞ୍ଜୁ ସାମସନ୍‌ଙ୍କୁ ମ୍ୟାନ ଅଫ ଦି ମ୍ୟାଚ୍‌ ପୁରସ୍କାର ମିଳିଛି। ଆଜି ପୁଣି ଉଭୟ ଦଳ ମଧ୍ୟରେ ସିରିଜର ତୃତୀୟ ମ୍ୟାଚ୍ ଖେଳାଯିବ । ...